Paşinyan həssas gömrük məlumatlarının ABŞ-a verilməsini rəsmiləşdirdi - Qaluzinin sözü havada qaldı…
Amid Əliyev: “Ermənistana qarşı siyasi, iqtisadi və sosial məzmunlu təzyiqlər güclənəcək”
ABŞ dövlət katibi Entoni Blinkenin Avropa və Avrasiya məsələləri üzrə müavini Ceyms O`Brayen ABŞ-Ermənistan Strateji Dialoqunun iclasında iştirak etmək üçün İrəvanda səfərdədir.
O`Brayenin səfəri zamanı Ermənistanla ABŞ arasında gömrük sahəsində əməkdaşlıq sazişi imzalanıb. Belə izahat verdilər ki, gömrük sahəsindəki əməkdaşlıq əsasən informasiya sahəsində əməkdaşlığı əhatə edəcək.
Rusiya rəsmisi Qaluzin bu yaxınlarda dedi ki, onlar Ermənistanın KTMT məkanına aid məlumatları öz Qərb müttəfiqlərinə verməsini istəmir, çünki bunun adı casusluq olar. Gömrük məlumatları da kifayət qədər məxfilik daşıyır. Ermənistanın gömrük sahəsindəki məlumatları Rusiya ilə düşmən mövqeyində olan ölkəyə verilməsilə bağlı razılıq əldə olunur. Rusiya ilə ABŞ arasında qarşılıqlı sanksiya davası aparılır. Belə iddialar var ki, Ermənistan pul qazanmaq müqabilində Rusiyanı sanksiyadan yayındıran addımlar atır. Bu, həm də Rusiya üçün faydalıdır. ABŞ-la əldə olunan razılıq belə fəaliyyətə mane olacaqsa, Rusiya məsələyə necə münasibət sərgiləyəcək?
Siyasi şərhçi Amid Əliyev “Bakı-Xəbər”ə açıqlamasında bildirdi ki, ABŞ dövlət katibinin müavinin Ermənistana səfərini həm siyasi, həm də iqtisadi cəhətdən qiymətləndirmək daha düzgün olardı:”Belə ki, səfər ərəfəsində Paşinyan tərəfindən KTMT barəsində yenidən fikirlər səsləndirilib. Təşkilata üzvlük haqqının dayandırılması və növbəti iclasda iştirak etməmək haqqında qərarın verilməsi bir daha onu deməyə əsas verir ki, Ermənistanın bu istiqamətdəki addımları artıq tam şəkildə qərarlaşmış bir prosesdən keçib. Ermənistan öz təhlükəsizliyini artıq RF-nin rəhbərlik etdiyi hərbi-siyasi təşkilatla bağlamaq istəmir.
İkinci mühüm məsələ isə Ermənistanı iqtisadi blokadadan çıxarmaqdır ki, Qərb bu məsələdə ciddi addımlar atmaq niyyətindədir. Belə ki, artıq dünən Ermənistanla ABŞ arasında gömrük sazişi bağlanıb. Bu özlüyündə Ermənistanın gömrük sisteminə ABŞ-ın sirayət etməsi kimi də qiymətləndirilə bilər. Bu saziş, çox ehtimal ki, iqtisadi proseslərə nəzarət edilməsi, idxal və ixraca nəzarət, eləcə də Ermənistanın sərhəd buraxılış məntəqələrindəki nəzarətin ələ keçirilməsi kimi dəyərləndirilə bilər. Hələ ki, bu saziş ABŞ-ın Ermənistanın vahid gömrük ittifaqında Rusiyaya qarşı demarşı hesab oluna bilər və daha çox Ermənistanı iqtisadi asılılıqdan xilas etməyə yönəlib.
Gömrük sazişi ilə eyni zamanda gələcəkdə açılacaq Zəngəzur dəhlizində məhz erməni gömrükçülərinin və nəzarətinin olması faktı təşviq edilə və bu da RF-nin bu məsələdən kənarda saxlanılması prosesi kimi qiymətləndirilə bilər. Bütövlükdə isə ABŞ bu və bu qisimdən olan addımlarla Ermənistandakı siyasi nüfuz müharibəsində mövqelərini möhkəmləndirməyə çalışır. Əsas da odur ki, hazırki Ermənistanın siyasi hakimiyyəti bununla razıdır. Bu isə öz növbəsində Moskva tərəfindən rəsmi olaraq qıcıqla qarşılanacaq. Çox böyük ehtimalla, yaxın zamanlarda Baqratın hərəkatının yeni çalarlarını görə bilərik və Ermənistana qarşı siyasi, iqtisadi və sosial məzmunlu təzyiqlər güclənəcək”.
Məhəmmədəli QƏRİBLİ
