250 dönərxana yoxlandı, hamısı zay çıxdı...
Eyyub Hüseynov: “Bəzi dönərxanalarda nəinki sadalanan qaydalara, heç gigiyena qaydalarına da əməl olunmur”
Məlum olduğu kimi, Azərbaycan Qida Təhlükəsizliyi Agentliyi (AQTA) 250 dönər satışı obyektində monitorinq keçirib. Monitoqrinq zamanı 249 obyektdə nöqsan aşkarlanıb.
Sözügedən obyektlərdə temperatur rejiminə əməl olunmadığı, yararlılıq müddəti ötmüş xammaldan istifadə edildiyi, çiy dönər ətinin hazırlanmasında istifadə olunan ətlərin baytarlıq-sanitariya ekspertizasından keçməsini təsdiq edən müvafiq sənədlərin olmadığı müəyyən olunub. Həmçinin müayinələr nəticəsində 47 müəssisədən götürülən 46 toyuq və 16 mal əti olmaqla, ümumilikdə 62 dönər nümunəsində E.Coli və 1 müəssisədən götürülən 1 toyuq dönəri nümunəsində L.monocytogenes bakteriyası aşkarlanıb.
Qeyd edək ki, monitorinq keçirilən obyektlərin hamısında nöqsanlar aşkarlanıb. Görəsən, dönər satılan yerlərin çoxunda bu qədər nöqsanların olması nə ilə bağlıdır?
“Dönər biznesi ilə məşğul olan əksər sahibkarlar gedib ucuz, murdar, hətta ölmüş heyvanların ətlərindən alıb necə gəldi dönər hazırlayır, nəticədə dönərdən zəhərlənmə halları artıb”
Azad İstehlakçılar Birliyinin sədri Eyyub Hüseynov “Bakı-Xəbər”ə şərhində bildirdi ki, AQTA-nın apardığı bu yoxlama lazımi səviyyədə deyil: “Bu obyektlər indiyə kimi nə qədər insanı zəhərləyiblər, müxtəlif xəstəliklərə yoluxdurublar. Bu yaxınlarda Zaqatalada 40 nəfərin zəhərlənməsi ilə bağlı AQTA-nın son məlumatı ilə biz qətiyyən razı olmadıq. Çünki onların məlumatına görə, 40 nəfərin hamısı bir dönərxanadan zəhərlənib. Amma bizə məlumatlar verildi ki, həmin insanlar müxtəlif obyektlərdən yedikləri dönərdən zəhərləniblər. Buradan belə çıxır ki, dönərxanadan yox, onlara verilən xammaldan danışmaq lazımdır”.
Ekspert bildirdi ki, dönər standart tələblərinə uyğun olaraq, sanitariya norma və qaydalarınaa riayət edilməklə, müəyyən edilmiş reseptlər üzrə hazırlanmalıdır: "Dönərin hazırlanması üçün istifadə edilən, tez xarab olan ərzaq məhsulları qüvvədə olan sanitar norma və qaydalara riayət etməklə soyuducularda saxlanmalıdır. Təəssüf ki, bəzi dönərxanalarda nəinki sadalanan qaydalara, heç gigiyena qaydalarına da əməl olunmur. Ölkəyə gətirilən xarab, murdar ətlərin realizə olunma yerlərindən biri də dönərxanalardır. Təəssüflər olsun ki, dövlət orqanlarının qəbul etdiyi standartlar ayaq altına atılır. Məlumdur ki, Azərbaycanda quş ətindən dönər hazırlanması 2006-cı ildən qadağan olunub. Ancaq bu gün toyuq dönəri hər yerdə satılır. Dönər biznesi ilə məşğul olan əksər sahibkarlar gedib ucuz, murdar, hətta ölmüş heyvanların ətlərindən alıb necə gəldi dönər hazırlayırlar. Ona görə dönərdən zəhərlənmə halları artıb”.
Günel CƏLİLOVA
