Avropanın deputatları təzələndi - Bakı-İrəvan, Ankara-İrəvan münasibətlərinə yeni baxış olacaq…
Tofiq Abbasov: “Qlobal proseslərdəki təşəbbüslər də fərqli olacaq”
Avropa Parlamentində bazar günü keçirilən seçkilərdə ifrat sağçı partiyalar əhəmiyyətli nəticə əldə edib. Bu da Aİ-nin gələcək siyasi istiqamətinə qeyri-müəyyənlik əlavə edir.
Seçki günü keçirilən sorğulara əsasən, mərkəzçi, liberal və sosialist partiyalar, 28 yer itirməklərinə baxmayaraq, 720 yerlik parlamentdə çoxluğu qoruyub saxlayacaq. Fransada Marin Le Penin ifrat sağçı partiyası prezident Emmanuel Makron partiyasından daha yaxşı nəticə göstərib. Makron seçki nəticəsinin onun hökuməti üçün acınacaqlı olduğunu və bunu gözardı edə bilməyəcəyini deyib. Bu hal Makronu növbədənkənar milli seçki çağırmağa vadar edib. Əgər Le Penin Milli Toplantı partiyası parlament çoxluğunu qazanarsa, Makronun daxili siyasətə təsiri əhəmiyyətli dərəcədə azalacaq.
Avropa Parlamenti seçkilərinin nəticələri Olaf Şolts üçün də ağır olub. Onun Sosial Demokratlar partiyası əsas mühafizəkarlar və ifrat sağçı - Almaniya üçün Alternativ partiyası qarşısında zəif nəticə göstərib.
Analitiklər Avropadakı millətçi partiyaların üstünlük qazanmasını artan qiymətlərdən narazılıq, miqrasiya ilə bağlı narahatlıqlar və yaşıl keçidin yaratdığı xərclər, eləcə də Ukraynadakı müharibə ilə əlaqələndirirlər.
Görünən budur ki, Avroparlamentin yeni tərkibi formalaşdı. Əsasən sağçılar: millətçilər, mühafizəkarlar qələbə qazandı. Yeni tərkibli Avroparlamentin Qafqaza və Azərbaycan-Ermənistan və Ermənistan-Türkiyə normallmasına münasibəti necə olacaq?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Avropaplamentə baş tutan seçkilər bütün proqnozları doğrultmuş oldu: “Avropada sağlaşma günün tələbinə çevrilmişdi. Bir çox mərkəzçi partiyalar belə öz mövqelərini sağa yönəltdilər və səs çoxluğu qazandılar. Avropa Xalq Partiyası taktiki qələbəsinin sevincini yaşasa da, onlar yalnız öz mövqelərini qoruya biliblər. Əsas tendensiya ondan ibarətdir ki, Qərbdəki gənclik sərt mövqeyə tərəf çıxır. Buna görə də, liberallara qalib gəldilər. Bu bizim üçün sərt mübarizə vəd edir. Onlarla gələcək münasibətlərdə, ziddiyyətlərdə bizim siyasi elitamız müqavimət hissini artırmalıdır. Liberallarla ortaq məxrəc tapmaq olurdusa, sağçılarla bir qədər problem yaşana bilər. Çünki biz görürük ki, Avropada sağçılardan sonra bir qədər yumşaq xəttin nümayəndələri gəlir, öz dividendlərini bitirdikdən sonra yenidən sərt xəttin nümayəndələri peyda olur. İndi həmin dönəmdir. Avropada proses ciddi müzakirə edilir. İnsanlar bu dəyişikliyin onlarda buraxdığı izi görmək istəyir. Təbiidir ki, bu yeniik bütün sahələrə təsirini göstərəcək. Qlobal proseslərdəki təşəbbüslər də fərqli olacaq. Sağçılar açıq deyirlər ki, miqrantlara və qlobal Cənuba qarşıdırlar. Onlar çalışacaqlar ki, öz mövqelərini daha sərt şəkildə qorusunlar. Bunun bizim üçün nə vəd etməsi ilə bağlı təfərrüatları bir qədər sonra müşahidə edəcəyik”.
Məhəmmədəli QƏRİBLİ
