Rusiya Dövlət Duması saxta erməni genosidi barədə mövqeyinə yenidən baxacaq...
Əli Orucov: “Təkcə Buça şəhərinə səfər etmələrinə görə Rusiyanın belə addım atacağı real görünmür”
Ermənistan nümayəndə heyəti Buçaya səfər etdikdən sonra Rusiya Xarici İşlər Nazirliyi erməni həmkarlarına etiraz notası göndərib. Bunu Rusiya Xarici İşlər Nazirliyinin rəsmisi Mariya Zaxarova deyib.
Onun sözlərinə görə, Moskva erməni nümayəndələrinin Ukraynanın bu şəhərinə səfərini, eləcə də Rusiyaya ünvanlanan qəbuledilməz bəyanatlar və Kiyevə humanitar yardımın göstərilməsini qeyri-dost addım kimi qiymətləndirir: “Biz paytaxtın Nor-Nork inzibati dairəsinin rəhbərləri Tiqran Ter-Marqaryanın və Ermənistanın diplomatik missiyasının rəhbəri Vladimir Karapetyanın Buça şəhərinə səfərini rəsmi İrəvanın açıq-aşkar qeyri-dost addımı kimi qiymətləndiririk. Biz onların Ukrayna Silahlı Qüvvələrinin ehtiyaclarına yardım ötürməsindən və orada Rusiyaya qarşı qəbuledilməz bəyanatlardan narahatıq. Ermənistan Xarici İşlər Nazirliyinə etiraz notası göndərdik”.
O xatırladıb ki, Ter-Marqaryan qərbyönlü Respublika Partiyasının sədri Aram Sarkisyanın müttəfiqidir, ona görə də onun reaksiyası tamamilə başadüşüləndir.
Maraqlıdır, Ermənistanın bu genosidə dəstək jestinə cavab olaraq Rusiya “erməni genosidi” barədə 1994-cü il qərarına yenidən baxa bilərmi?
“Ermənistan parlamenti baş verənləri soyqırım kimi qəbul etsə, o zaman Duma “erməni genosidi” qərarına yenidən baxa bilər”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında qeyd etdi ki, təkcə Ermənistanın Ukraynadakı səfiri Vladimir Karapetyan və İrəvanın Nor Nork inzibati ərazi dairəsinin rəhbəri Tiqran Ter-Marqaryanın Buça şəhərinə səfər etmələrinə görə Rusiyanın belə addım atacağı real görünmür: “Bəli, həqiqətən də 90-cı illərin ortalarında Rusiya Dövlət Duması saxta “erməni soyqırımı”nı qəbul edib. Özü də bunun Duma səviyyəsində qəbul edilməsində deputat Konstantin Zatulinin xüsusi xidmətləri olub. O zaman Zatulin bununla bağlı yaradılan komissiyaya rəhbərlik edirdi. Hesab edirəm ki, tək Buçaya görə Dövlət Duması 30 il əvvəl saxta genosidlə bağlı qəbul etdiyi qərara baxmayacaq. Yox, əgər Ermənistan parlamenti Buçada baş verənləri soyqırım kimi qəbul etsə, o zaman Duma “erməni genosidi” barədə qərarına yenidən baxa bilər. Həm də məsələ ondadır ki, Rusiya Ermənistanda gedən proseslərə bir qədər fərqli prizmadan yanaşır. Moskva hesab edir ki, Paşinyanın yeritdiyi anti-Rusiya siyasəti erməni ictimaiyyəti demək deyil. Ancaq bir şeyi nəzərə almırlar ki, erməni ictimaiyyəti Paşinyanın arxasında dayanmasaydı, o, hakimiyyətdə qala bilməzdi. Həmin erməni ictimaiyyəti 44 günlük müharibədən sonra 2021-ci ilin iyununda Paşinyanı növbəti dəfə seçdi. Hazırda Paşinyanın reytinqi nə qədər aşağı olsa da, Rusiyapərəst qüvvələrdən qat-qat üstündür. Bəli, Cənubi Qafqazda yoxdan süni şəkildə Ermənistanı yaradan Rusiya olub. Ancaq o da bir reallıqdır ki, ermənilər Rusiyanı Qərbə satıblar. İstisna etmirəm ki, proseslərin gedişindən asılı olaraq, vaxt gələr, Ermənistan Rusiyanın Ukraynada törətdiklərini soyqırım kimi qəbul edər”.
Vidadi ORDAHALLI
