Rusiya Ermənistana təhdid notası verdi - erməni mer və səfir Rusiyaya "genosid həmləsi" etdi...
Elşad Həsənov: “Bütün bunlar Ermənistanın Rusiyaya qarşı olduğunu açıq sübut edir”
İrəvanın Nor Nork inzibati ərazi dairəsinin rəhbəri Tiqran Ter-Marqaryan və Ermənistanın Ukraynadakı səfiri Vladimir Karapetyan Ukraynanın Buça şəhərinə getdiklərinə, burada Rusiya ordusu tərəfindən qətlə yetirildikləri bildirilən mülki insanların şərəfinə qoyulan memorialı ziyarət etdiklərinə görə Rusiya Ermənistana nota təqdim edib.
Notaya səbəb həm də Ermənistanın Ukrayna ordusuna tibbi yardımıdır.
Rusiyanın notasına cavab olaraq Nor Nork inzibati dairəsinin rəhbəri Ter-Marqaryan sosial şəbəkə hesabında cavab yazıb. O bildirib ki, İrəvanın Nor Nork inzibati ərazi dairəsinin başçısı və “Respublika” partiyasının siyasi şurasının üzvü kimi mən həm də humanitar yardım çatdırmaq üçün Buçada idim. Lazım gələrsə, yenidən getməyə hazıram:
“Görüşlərimdə əmin oldum ki, Rusiya Ukraynanı məğlub edə bilməz. Ukraynada hər kəs bu müharibəni müstəqillik və suverenlik uğrunda mübarizə hesab edir”.
Bütün bunlar Rusiyaya qarşı növbəti erməni “buynuzu” sayıla bilərmi?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Ermənistan son iki ildə apardığı siyasətə uyğun olaraq növbəti addımı atıb: “Ermənistan rəsmilərinin orada olması və deyilən kompleksi ziyarət etməsi Rusiyada haqlı qıcıq doğurur. Bu səbəbdən də Rusiya nota verməyə məcbur qalıb. Ermənistan parlamentinin spikeri Alen Simonyan Mariya Zaxrovanın çıxışına sərt cavab verib. Bunun iftra olduğunu bildirdi. Dedi ki, ola bilsin mənim qonşumun əri də harasa gedib, buna nə etmək olar? Görünən budur ki, Ermənistan Ukraynaya açıq dəstəyini ifadə edir. Paşinyanın həyat yoldaşı Anna Akopyan Kiyevdə səfərdə oldu və oradakı çıxışında dəstəklərini açıq ifadə etdi. Bütün bunlar Ermənistanın Rusiyaya qarşı olduğunu açıq sübut edir. Artıq bundan sonra da yaxşı nəsə gözlənilmir. Ermənistan KTMT-ni tam boykot edir. Heç üzvlük haqqını belə ödəmir. Rusiya hələ ki, bunlara dözür. Görünən budur ki, Ermənistan Rusiyadan qopmağa çalışır. Bu da rəhbərliyin istəyindən irəli gəlir. Müharibənin gedişində Rusiya irəliləyişlər əldə edirdi. Son günlər NATO-nun verdiyi dəstək sayəsində Ukrayna əks dönüş edə bilib. Oranı ziyarət edən ermənilərin açıqlaması açıq şəkildə Rusiyaya qarşıdır. Ukraynanın ərazi bütövlüyünü biz də dəstəkləyirik. Ancaq biz konkret tərəf tutmuruq. Rusiyanın notası da əbəs deyil”.
Məhəmmədəli QƏRİBLİ
