Dünyanın dini liderləri COP29-da Bakıya toplaşacaqlar...
Tural İrfan: “Azərbaycan artıq İslam dəyərlərinin, dini tolerantlıq ənənəsinin, multikulturalizmin real nümunəsi kimi bu görüşə ev sahibliyi etməyi haqq edir”
Prezident İlham Əliyevin Qahirədə Əl-Əzhəri Şərifin şeyxi, böyük imam Əhməd Məhəmməd Əhməd Əl Tayyib ilə görüşdə Azərbaycanda dinlər, mədəniyyətlər və sivilizasiyalar arasında dialoqun inkişafı ilə bağlı mühüm tədbirlərin keçirildiyini, ölkəmizin dinlərarası dialoqa öz töhfəsini verdiyini bildirdi, böyük imam Əhməd Məhəmməd Əhməd Əl Tayyibi ölkəmizə səfərə dəvət edib.
Azərbaycan Prezidenti ölkəmizin bu il COP29-a ev sahibliyi edəcəyini diqqətə çatdırıb və Azərbaycanın Əl-Əzhər ilə birlikdə dini liderlərin növbəti görüşünün COP29 çərçivəsində keçirilməsi təşəbbüsü ilə çıxış etdiyini vurğulayıb.
Prezident Əliyev Azərbaycan torpaqlarının otuz ilə yaxın müddətdə işğal altında qaldığını xatırladaraq, işğal dövründə Azərbaycanın İslam dininə aid maddi-mədəniyyət abidələrinin, o cümlədən 67 məsciddən 65-nin tamamilə dağıdıldığını diqqətə çatdırdı. Prezident İlham Əliyev bu münaqişənin həllinin siyasi yolla mümkün olmadığını təəssüf hissi ilə vurğulayaraq, Azərbaycanın özünümüdafiə hüququndan istifadə edib işğala son qoyduğunu, ərazi bütövlüyünü və suverenliyini tam bərpa etdiyini dedi. Dövlətimizin başçısı azad olunmuş ərazilərdə məscidlərin, İslam irsinin bərpası istiqamətində tədbirlərin həyata keçirilməsinə başlandığını, artıq beş məscidin bərpa olunduğunu bildirdi. Prezident İlham Əliyev vurğulayıb ki, Azərbaycan İslam həmrəyliyinə töhfə verir və bu istiqamətdə qardaş müsəlman ölkələri ilə birlikdə səylərini davam etdirir.
Azərbaycan Prezidenti Şuşa şəhərinin İslam mədəniyyətinin paytaxtı elan olunmasının və bu çərçivədə Şuşada keçirilən tədbirlərin önəmini vurğuladı. Dövlətimizin başçısı, həmçinin vaxtilə Şuşada mövcud olmuş 17 məsciddən 16-sının işğal dövründə tamamilə dağıdıldığını deyib.
Əl-Əzhəri Şərifin şeyxi, böyük imam Əhməd Məhəmməd Əhməd Əl Tayyib Azərbaycanın ərazi bütövlüyünü və suverenliyini tam təmin etməsindən məmnunluğunu bildirib. COP29-a dəvətə görə təşəkkürünü bildirən Əhməd Məhəmməd Əhməd Əl Tayyib bu tədbirdə məmnunluqla iştirak edəcəyini deyib.
Əl-Əzhəri Şərifin şeyxi Bakıda dünya dini liderlərinin II Sammitinin keçirildiyini xatırladaraq, Azərbaycanın İslam həmrəyliyinə verdiyi töhfəyə görə Prezident İlham Əliyevə şəxsən təşəkkürünü bildirib və COP29 çərçivəsində də dini liderlərin toplantısının keçirilməsi üçün birgə işlərin aparıldığını qeyd edib.
O, Əl-Əzhəri Şərifin Azərbaycanda ərəb dilinin tədrisinə öz dəstəyini verməyə hazır olduğunu vurğulayıb, Əl-Əzhərdə azərbaycanlı tələbələrin də təhsil aldıqlarını diqqətə çatdırıb.
Ölkəmizdə ərəb dilinin tədrisinə dəstək niyyətinə görə təşəkkürünü ifadə edən Prezident İlham Əliyev tarixən Azərbaycanda ərəb dilinin və İslam mədəniyyətinin tədqiqinə və tədrisinə böyük diqqət yetirildiyini vurğulayıb, Bakı Dövlət Universitetində şərqşünaslıq fakültəsinin, Azərbaycan Milli Elmlər Akademiyasında Şərqşünaslıq İnstitutunun fəaliyyət göstərdiyini qeyd edib.
“Hesab edirəm ki, Azərbaycanda keçiriləcək bu görüş Azərbaycanın İslam dünyasına böyük töhfəsi olacaq”
Milli Cəbhə Partiyasının sədr müavini, tanınmış ilahiyyatçı Tural İrfan “Bakı-Xəbər”ə şərhində bildirdi ki, COP29 çərçivəsində də dini liderlərin toplantısının keçirilməsi olduqca mühüm əhəmiyyətə malikdir. “Dini liderlərin Azərbaycana toplaşması böyük önəm daşıyır. Bu, həm müsəlman aləminin vəhdətinin, həmrəyliyinin, həm də Azərbaycana olan diqqət və yüksək münasibətin təzahürüdür. Cənab Prezident İlham Əliyevin təşəbbüsünü yüksək qiymətləndirmək lazımdır. Dini, mənəvi, mədəni dəyərlərin yaşadılması və müsəlman dünyasının ortaq dəyərlərinin, tarixinin fonunda bu görüşün ölkənizdə keçirilməsini təklif etməsi cənab Prezidentin bu dəyərlərə verdiyi böyük önəmdən xəbər verir.
Azərbaycan artıq İslam dəyərlərinin, dini tolerantlıq ənənəsinin, multikulturalizmin real nümunəsi kimi bu görüşə ev sahibliyi etməyi haqq edir” - deyə bildirən T.İrfan qeyd etdi ki, Misir, ərəb danyasının aparıcı ölkələrindən biridir. İlahiyyatıçının sözlərinə görə, Əl-Əzhər akademiyası İslam aləmində ən qədim təhsil ocaqlarından biridir. “Odur ki, o təhsil ocağının dünyaya verdiyi töhfələr, yeritdiyi alimlər məşhurdur. Bu elm ocağı ilə Azərbaycan Milli Elmlər Akademiyasının da elmi münasibətlərinin inkişafı vacibdir. Hesab edirəm ki, Azərbaycanda keçiriləcək bu görüş Azərbaycanın İslam dünyasına böyük töhfəsi olacaq. Son zamanlar Avropada müsəlmanlara və İslam dininə qarşı təxribatlar, basqılar, bəzi narahatlıqlar yalnız müsəlman ölkələrinin birgə müzakirəsi zamanı cavablana, həlli yolları arana bilər. Qarabağ zəfərindən sonra şübhəsiz ki, Azərbaycanın nüfuzu müsəlman ölkələri arasında da öndədir. Son əsrlərdə işğaldan torpaq azad edən müsəlman ölkəsi demək olar ki, yox idi. Bu ölkə məhz Azərbaycan oldu. Ona görə İslam aləmində Azərbaycanın nüfuzu, apardığı sülh siyasəti, birlik, inkişaf diqqət çəkməyə bilməz. Bu təşəbbüs cənab Prezidentdən gəldiyinə görə hesab edirəm ki, Azərbaycan üçün böyük fayda kəsb edəcək” - deyə T.İrfan bildirdi.
İradə SARIYEVA
