Çoxsaylı iri beynəlxalq konfranslar Azərbaycançılıq ideologiyasını uğurla yayır...
COP29 kimi mötəbər bir tədbirin Azərbaycanda keçirilməsinə verilən qərar ölkəmizə göstərilən etimad və hörmətin növbəti nümunəsidir. Bu qərarın qəbul olunması bir daha sübut etdi ki, yürütdüyümüz siyasət bütün dünya tərəfindən dəstəklənir. Azərbaycanla yanaşı Ermənistan və Bolqarıstan da namizədliklərini vermişdilər.
Ötən il dekabrın 7-də Ermənistan Azərbaycanın xeyrinə, daha sonra Bolqarıstan öz namizədliyini geri götürüb. 2024-cü ildə COP29-a ev sahibliyi edən ölkəmiz bir daha Azərbaycana qarşı çirkin kompaniya aparanlara tutarlı cavab verdi.
Beynəlxalq tədbirlərin Azərbaycanda təşkili hər şeydən öncə ölkəmizə olan etimad və inamın, dövlət başçısı cənab İlham Əliyevin beynəlxalq aləmdə artan nüfuzunun ölkəmizdə olan siyasi sabitlik və təhlükəsizlik mühitinin göstəricisidir. Bu reallıq ondan xəbər verir ki, dünya dövlətləri və beynəlxalq təşkilatlar Azərbaycanın bu sahədəki təcrübəsinə inanır və bu təcrübəni yüksək qiymətləndirir.
Ölkəmiz ev sahibliyi etdiyi tədbirlər fonunda öz həqiqətlərini də dünya ictimaiyyətinin diqqətinə çatdırır
Heç kimə sirr deyil ki, Azərbaycandan sonra beynəlxalq tədbirlərə ev sahibliyi edən dövlətlərin bir çoxu ölkəmizə müraciət edərək təşkilatçılıqla bağlı məsələlərdə onlarla köməklik göstərməyimizi xahiş edib, “Azərbaycan modeli”ndən faydalanmağa çalışıblar. Bu gün Azərbaycan bütün dünyada beynəlxalq təşkilatların təşkilində zəngin təcrübəyə malik azsaylı ölkələrdən biridir və bu sahədəki təcrübəsini hər yeni tədbirlə daha da inkişaf etdirir, zənginləşdirir. Bu cür tədbirlərin ölkəmizdə təşkilinin dövlətimiz üçün bir çox müsbət nəticəsi mövcuddur. Bu nəticələrdən biri bütün dünyanın diqqətinin Azərbaycana, eyni zamanda Azərbaycan həqiqətlərinə yönəlməsidir. Ölkəmiz ev sahibliyi elədiyi tədbirlər fonunda öz həqiqətlərini də dünya ictimaiyyətinin diqqətinə çatdırır, beynəlxalq aləmdəki nüfuzunu sürətlə artırır. Bu tədbirlər beynəlxalq miqyasda siyasi-iqtisadi təşəbbüslərin Azərbaycanın əlində cəmləşməsinə, ölkəmizin yeni ideya və təşəbbüslərin ixrac mərkəzinə çevrilməsinə səbəb olur.
Azərbaycanın dünyaya daha yaxından tanıdılmasına…
Son illər bir sıra Avropa ölkələrində baş verən dözümsüzlük, ksenofobiya və islamofobiya meyilləri Avropanın özünün bəzi postsosialist dövlətlərindən tolerantlıq örnəyi götürməsinə ehtiyac olduğunu göstərir. Bu baxımdan Azərbaycanda milli və etnik tolerantlığın mövcud vəziyyətini xüsusi qeyd etmək lazımdır. Tarixən müxtəlif dinə, dilə və mədəniyyətə malik insanların ümumi vətəninə çevrilən Azərbaycanda tolerantlıq düşüncəsi tədricən inkişaf edib. Əhalisinin tərkibi etnik, dini və məzhəb baxımından zəngin olan Azərbaycanda indiyədək dini və milli zəmində heç bir qarşıdurma baş verməyib.
Bu və digər beynəlxalq tədbirlər Azərbaycanın dünyaya daha yaxından tanıdılmasına, ölkəmizin investisiya cəlbediciliyinin artırılmasına, mədəniyyətinin və incəsənətinin təbliğinə geniş imkanlar açmaqla yanaşı, respublikanın xaricdə diaspor və lobbi quruculuğu işinin mühüm tərkib hissəsidir.
Ən başlıcası isə, Azərbaycançılıq ideologiyasının əsl mahiyyətini dünyaya çatdırır
Respublikamız dünyada nə qədər çox tanınsa, bir o qədər də öz həqiqətlərini tanıtmaq, maraq və mənafelərini qorumaq imkanı qazanar. Prezident İlham Əliyev praqmatik və realist siyasətçi olaraq bu mərama xidmət edən qlobal tədbirlərin ölkəmizdə yüksək səviyyədə keçirilməsinə çalışır. Bu tədbirlər Azərbaycan mədəniyyətinin, incəsənətinin, musiqisinin təbliği, turizmin inkişafı, sərmayə qoyuluşlarının təşviqi baxımından da mühüm əhəmiyyətə malikdir. Ən başlıcası isə Azərbaycançılıq ideologiyasının əsl mahiyyətini dünyaya çatdırır. Çünki yuxarıda sadalanan amillərin kökündə diran başlıca məsələ məhz azərbaycançılıqla bağlıdır.
Qeyd edək ki, azərbaycançılıq ideologiyasının təbliği və onun təməl prinsiplərinin cəmiyyətə çatdırılması mühüm əhəmiyyət kəsb edir. Bu, siyasi və dövlətçilik ideologiyası kimi toplumun və dövlətin inkişafına, güclü olmasına xidmət etməsi baxımından olduqca vacibdir. Yalnız ölkəmizin parlaq qələbəsindən sonra dünya birliyi anladı ki, bir çox ölkələrdə siyasi, dini, məzhəb, etnik, mədəni zəmində özünü göstərən münaqişələr nəticəsində daxili sabitliyin pozulduğu, vətəndaş qarşıdurmalarının yaşandığı bir vaxtda Azərbaycan özünün milli birlik modelini yaratması ilə fərqlənir. Ölkəmizin ev sahibliyi etdiyi mühüm tədbirlər bu dəyərlərin və məxsusi olaraq başlıca ideologiyamız olan azərbaycançılığın təbliği üçün çox önəmlidir.
Azərbaycançılıq ideologiyasının və milli-mənəvi dəyərlərlə bağlı ölkəmizdə və xaricdə həyata keçirdiyimiz irimiqyaslı layihələr və ev sahibliyi etdiyimiz tədbirlər də söykəndiyimiz mütərəqqi ənənələrin gələcək nəsillərə ötürülməsində misilsiz rol oynayır. Bu layihələr milləti, xalqı, vətəni qəlbən sevməyi, onun naminə yorulmadan, fədakarcasına çalışmağı təşviq edir.
Bu gün təkcə Azərbaycanda deyil, dünyanın bir çox ölkəsində hər bir soydaşımız Azərbaycan ətrafında sıx birləşib. Azərbaycanlı uşaqlara və hətta xalqımıza dost münasibəti bəsləyən əcnəbilərə də Azərbaycan dili, tarixi, mədəniyyəti tədris edilir, azərbaycançılıq ideologiyasının, mültikultural və tolerantlıq dəyərlərinin insanlara aşılanması prosesi sürətlə gedir. Tədbirlərə gələn çoxsaylı qonaqların bu reallıqları yerində görməsi isə olduqca önəmlidir.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
