Bayden Ukraynaya səsləndi - "Bizim silahlarla Moskvanı və Kremli vurmayın"! Hara vurulsun?
Elxan Şıxəliyev: “Moskva təzyiq tempinin artırılmasını gördükdə, müharibəni sonlandırmağı real nəzərdən keçirə bilər”
ABŞ prezidenti Co Bayden müsahibəsində bildirib ki, Vaşinqton Kiyevə Ukrayna Silahlı Qüvvələrinin Moskva və Kremlə Amerika silahları ilə zərbələr endirməsinə icazə vermək niyyətində deyil:
“ABŞ Ukrayna Silahlı Qüvvələrinin Amerika silahları ilə Moskva və Kremlə hücumlarına yaşıl işıq yandırmaq niyyətində deyil. Biz Rusiyanın 200 mil dərinliyində zərbələrə icazə vermirik və Moskvaya və Kremlə zərbələr endirməyə əsla icazə vermirik”.
Baydenin açıqlamasından belə başa düşürük ki, onlar Moskvanı yox, digər yerləri vurmağa icazə veriblər?
Hərbi-siyasi şərhçi, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki,
Rusiya-Ukrayna müharibəsi yeni bir mərhələyə keçib: “Ukraynanı dəstəkləyən güclər, NATO-ya daxil olan 32 ölkə və onlara yaxın əlavə 20 dövlət rəsmi Kiyevə təqdim olunan silahların məhdudiyyətini aradan qaldırdı. Əvvəl ABŞ, Böyük Britaniya, Fransa bəzi raketləri Ukraynaya verirdi, ancaq şərt qoyulurdu ki, bu raketlər həmin ölkənin 1991-ci ildəki sərhədləri daxilində istifadə olunmalıdır. İndi isə vəziyyət tam fərqlidir. Məhdudiyyətin aradan qaldırılması ən azından zərbə endiriləcək mənzillərin məsafəsini 300 kilometrə qədər uzadıb. Bu o deməkdir ki, əvvəl Ukrayna bu raketləri 70 kilometr dərinliyindəki hədəfləri vurmaq üçün istifadə edirdi, indi isə Rusiyanın bir çox vilayətlərini hədəf alacaq. Oradakı strateji obyektləri sıradan çıxaracaq. Baydenin açıqlaması bir az Rusiyaya yönələn mesaj kimi görsənir. Rusiyaya müharibənin dayandırılmasının zəruriliyinə dair mesaj ötürülür. Görünür ki, müharibənin idarə edilməsindəki beyin mərkəzi məhz Pentaqondur. Bunlar deyir ki, bunun arxasınca NATO-nun daha güclü silahları veriləcək. Bura F16-ları aid edə bilərik. Bu addımlar Rusiyada panika yaranır. Rusiya açıq şəkildə döyüşə atılan 52 ölkə ilə vuruşmağa tab gətirə bilməz. Belə addımlar həm də cəbhənin təchizatında problem yaradacaq. Moskva bunun çətin olacağını anlayır, ona görə də nüvə silahının tətbiqinin mümkünlüyünə aksent edir. Ancaq bu nüvə silahı həm də Ukraynanı dəstəkləyən 3 ölkədə var. Artıq ABŞ Rusiyaya dolayı deyil, birbaşa təzyiq göstərir. Deyir ya müharibıni dayandır, ya da geri çəkil. Rusiya nə edəcək? Moskva təzyiq tempinin artırılmasını götdükdə, müharibəni sonlandırmağı real nəzərdən keçirə bilər”.
Məhəmmədəli QƏRİBLİ
