Müəllimlərin işə qəbul imtahanlarından narazılığı nə qədər əsaslıdır? - Ekspert rəyləri fərqləndi...
Müəllimlərin işə qəbulu (MİQ) imtahanları ilə bağlı narazılıqlar davam edir. Müəllimlər uzun illərdir ki, bu imtahanların Elm və Təhsil Nazirliyindən alınaraq Dövlət İmtahan Mərkəzinə (DİM) verilməsini istəyirlər.
Onlar imtahanlarda istifadə olunan sualların çox çətin və qəliz olduğunu iddia edir. Bəs müəllimlərim işə qəbul imtahanblarının keçirilməsi Dövlət İmtahan Mərkəzinə verilə bilər?
Elmin Nuri: “Müəllimlərin işə qəbul imtahanlarının DİM-ə verilməsinə qəti ehtiyac yoxdur”
Təhsil eksperti Elmin Nuri “Bakı-Xəbər”ə açıqlamasında qeyd etdi ki, hər il olduğu kimi müəllimlərin işə qəbul mərhələsi yaxınlaşdıqca müəllimləri arasında bitməz-tükənməz narazılıqlar yayılır: “Biz burda müəllimləri nə tam haqlı, nə də haqsız hesab edə bilmərik. MİQ mərhəsinin ikinci etapı testdən ibarətdir. Həmin mərhədə sualların qəlizliyi dəfələrlə bildirib. Mən deyərdim suallar qəliz deyil, sadəcə düşündürücü və çaşdırıcıdır. Məlumdur ki, müəllimlərin işə qəbulu uzun illərdir ki, Elm və Təhsil Nazirli tərəfindən aparılır. DİM isə tək ali məktəbə qəbul həyata keçirmir. Bu qurum bir çox sahələrə də imtahan prosesi təşkil edir. Nəzərə almaq lazımdır ki, MİQ tək imtahan mexanizmi deyil, müəllimin öz işinə nə dərəcədə hazırlıqlı olması, pedaqoji və ümumi dünya görünüş göstəricilərinin necə olmasını müəyyən edir. Bu isə Elm və Təhsil Nazirliyinin bilməli olduğu sahədir”.
Həmsöhbətimiz onu da əlavə etdi ki, eyni fənn üzrə imtahan verən müəllimlərin əksəriyyəti yüksək bal toplayır, qalanları isə zəif nəticə göstərir: “Necə olur ki, x müəllimlər qrupu yaxşı bal toplayır, y müəllimlər isə zəif? Zəif nəticə göstərənlərin şikayəti, narazılığı bitmir. Onlar ya imtahanın gedişatından, ya sualların çətin olmasından giley edir. Doğrudan da problem varsa x qrupuna aid olan müəllimlər də narazılıq etsin. Yüksək nəticə göstərənlər sualların normal şəkildə tərtib olunduğunu, heç bir problem olmadığını bəyan edirlər. Bu hal onu göstərir ki, problem birtərəflidir”.
E.Nuri hesab edir ki, müəllimlərin işə qəbul imtahanlarının DİM-ə verilməsinə qəti ehtiyac yoxdur.
Elçin Əfəndi: “Tədricən bu imtahanların Dövlət İmtahan Mərkəzi tərəfindən keçirilməsi daha yaxşı ola bilər"
Təhsil eksperti Elçin Əfəndi “Bakı-Xəbər”ə açıqlamasında bildirdi ki, müəllimlərin işə qəbul imtahanları da Dövlət İmtahan Mərkəzi tərəfindən keçirilə bilər: “Bu, Elm və Təhsil Nazirliyi ilə Dövlət İmtahan Mərkəzi arasında olan razılıq əsasında mümkün ola bilər. Dövlət İmtahan Mərkəzi buraxılış imtahanlarında 50 mindən çox abituriyent iştirak edir. Müəllimlərin işə qəbulu zamanı da eyni gündə bütün ixtisaslar üzrə imtahanı Dövlət İmtahan Mərkəzi keçirə bilər. Məlumdur ki, artıq Dövlət İmtahan Mərkəzinin elektron imtahan götürmək üçün xüsusi inzibati binası var. O, cümlədən bəzi təhsil müəssisələrində də bu imkan yaradılıb. Hesab edirəm ki, gələcəkdə tədricən bu imtahanların Dövlət İmtahan Mərkəzi tərəfindən keçirilməsi daha yaxşı ola bilər".
Günel CƏLİLOVA
