"Cəsur Qəhrəmanlar" adlı kitabın təqdimatı keçirilib
Lənkəran şəhər Heydər Əliyev Mərkəzinin təşkilatçılığı ilə vaxtaşırı "Tariximiz qürurumuzdur" layihəsi çərçivəsində tədbirlər keçirilir. Növbəti tədbir isə Azərbaycan Yazıçılar Birliyinin üzvü, şairə Esmira Günəşin "Cəsur Qəhrəmanlar" adlı kitabının təqdimatına həsr olunmuşdu.
Şəhid ailələrinin, müharibə əlillərinin, veteranların, rayon rəsmilərinin, ziyalılar və ictimaiyyəti nümayəndələrinin qatıldığı mərasimdə əvvəlcə Mərkəzin foyesində Vətən şəhidlərinin fotolarından ibarət sərgiyə baxış oldu.
Tədbirin rəsmi hissəsində Vətən naminə canını fəda edən şəhidlərin xatirəsi bir dəqiqəlik sükutla anıldı və Dövlət Himni oxundu. Ardınca şəhidlərin qəhrəmanlığını əks etdirən video-çarx izlənildi.
Heydər Əliyev Mərkəzinin direktoru Reyhanə Sadıxova Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Azərbaycan Ordusunun 44 gün ərzində Qarabağ uğrunda başladığı haqq savaşını Qələbə ilə başa vurduğunu dedi və bu möhtəşəm Qələbənin müstəqillik tariximizin ən böyük Zəfəri olduğunu bildirdi.
Digər natiqlər isə Zəfərimizin qazanılmasın da əvəzolunmaz payları olan qəhrəman şəhidləri bizim qürur mənbəyimiz, iftixarımız olduğunu dönə-dönə söylədilər.
Tədbirdə Lənkəran şəhər 1 saylı Cəfər Cabbarlı adına uşaq musiqi məktəbinin müəllim və şagirdləri "Qarabağ şikəstəsi"ni böyük şövqlə oxudular. Həmçinin məktəblilərin ifasında Vətəni, qəhrəmanlığı, şəhidləri tərənnüm edən şeirlər də səsləndi.
Söz şəhid analarına veriləndə onlar göstərilən diqqət və qayğıya görə dövlət başçısı cənab İlham Əliyevə, Birinci vitse-prezident Mehriban xanım Əliyevaya minnətdarlıq etdilər və tədbirin ərsəyə gəlməsində zəhməti keçən hər bir kəsə, xüsusilə Mərkəzin direktoru R.Sadıxovaya, şairə Esmira Günəşə səmimi razılığını bildirdilər.
Axırda şairə Esmira Günəş "Cəsur Qəhrəmanlar" adlı kitabını öz imzası ilə Heydər Əliyev Mərkəzinin direktoruna təqdim etdi, şəhid ailələri ilə birgə xatirə şəkli çəkdirildi.
Zəfər ORUCOĞLU
Azərbaycan Jurnalistlər Birliyinin üzvü
