Bakıda yanaşı 29-cu və 12-ci konfrans - Azərbaycan 4 iyunda “yaşıl enerji” dövrünün əsasını qoydu...
İlham Şaban: “Bu ondan qaynaqlanır ki, Azərbaycan dünya enerji bazarının, qlobal bazarların nəbzini tutmağı bacaran bir ölkədir”
Bakı Enerji Həftəsi özündə üç mötəbər tədbiri birləşdirir. Bunlar 29-cu Beynəlxalq Xəzər Neft və Qaz Sərgisi “Caspian Oil&Gas”, 12-ci Xəzər Beynəlxalq Energetika və Yaşıl Enerji Sərgisi “Caspian Power” və 29-cu Bakı Enerji Forumudur.
İyunun 4-də 29-cu Beynəlxalq Xəzər Neft və Qaz Sərgisi “Caspian Oil&Gas”, 12-ci Xəzər Beynəlxalq Energetika və Yaşıl Enerji Sərgisi “Caspian Power”nun açılışı oldu. Bunlardan biri neft – qaz sərgisidir, o biri isə “yaşıl enerji” ilə bağlıdır. Bu iki tədbirin paralel keçirilməsi Azərbaycanın hansı niyyətini ortaya qoyur?
Bir çox ekspertlərə görə, bu, neft-qazdan “yaşıl enerji”yə keçidin bir ideologiyasıdır.
“Hökumətin enerji siyasətinin əsas hədəfi “yaşıl enerji”nin inkişafıdır”
Tanınmış ekspert İlham Şaban “Bakı-Xəbər”ə şərhində bildirdi ki, bu tədbirlərin yanaşı keçirilməsinin çox mühüm əhəmiyyəti var və bu tarixdə “yaşıl enerji” dövrünün əsasını qoyuldu.
İ.Şaban hesab edir ki, bu, ənənəvi enerjidən “yaşıl enerji”yə keçid üçün bir vasitədir, bir addımdır. “Cari ildə keçirilən Bakı Enerji Həftəsində neftə marağın nə qədər az olduğu özünü qabarıq şəkildə göstərdi, biz bunu gördük. İyunun 5-də Enerji həftəsi çərçivəsində keçiriləcək konfransın gündəliyinə baxdıqda çıxışların 90 faizi təbii qaz və “yaşıl enerji”yə həsr edilib. Əvvəllər adət etmişdik ki, bu cür sərgi konfransları çərçivəsində neftə dair hansısa bir saziş imzalanırdı. Amma bu gün gördük ki, çox maraqlı tədbir öncəsi iki müqavilə imzalandı. Bunlardan biri Azərbaycan Dövlət Neft Şirkəti (SOCAR) ilə Birləşmiş Ərəb Əmirliklərinin "Masdar" şirkəti arasında ümumi gücü 1000 mqvat olan üç bərpa olunan enerji layihəsi üzrə Səhmdarlar Sazişlərin imzalanmasıdır. Bunun biri Biləsuvarda, ikincisi Neftçalada, üçüncüsü isə Qaradağ rayonunda həyata keçirləcək. İkincisi isə Dövlət Neft Şirkəti (SOCAR) ilə Türkiyənin BOTAŞ şirkəti arasında təbii qaz təchizatı, nəqli və tranziti sahəsində bir sıra müqavilələrin imzalanmasıdır. Biz artıq qabarıq şəkildə “yaşıl enerji”nin və mavi yanacağın önə keçdiyini görürük. Bu ondan qaynaqlanır ki, Azərbaycan dünya enerji bazarının, qlobal bazarların nəbzini tutmağı bacaran bir ölkədir. Hökumətin enerji siyasətinin əsas hədəfi mavi yanacaq və onunla yanaşı “yaşıl enerji”nin inkişafıdır”.
İ.Şabanın qeyd etdiyinə görə, burada məqsəd eyni zamanda ümumbəşəri ideyaların, yəni planetin temperaturunun 2050-ci ilə qədər 1, 5 dərəcədə qızmasının qarşısını almaq, karbon reaktivlərinin havaya atılmasının miqdarını azaltmaqdır. “Digər tərəfdən də, əlbəttə, məqsəd özümüzün təbii şəraitimiz nəticəsində ölkəmizdə olan külək və günəş enerjisini kapitala çevirməkdir”-deyə İ.Şaban əlavə etdi.
İradə SARIYEVA
