Azərbaycanda elektromobillər mövzusu beynəlxalq forumun müzakirəsinə ayrıca çıxarılır...
Elməddin Muradlı: “Azərbaycanda buna dövlət səviyyəsində böyük maraq və dəstək var ki, elektrik avtomobillər geniş və kütləvi şəkildə yayılsın”
Bakı Enerji Həftəsi artıq öz işinə başlayıb. Bakı Enerji Həftəsi özündə üç mötəbər tədbiri birləşdirir: 29-cu Beynəlxalq Xəzər Neft və Qaz Sərgisi “Caspian Oil&Gas”, 12-ci Xəzər Beynəlxalq Energetika və Yaşıl Enerji Sərgisi “Caspian Power” və 29-cu Bakı Enerji Forumu.
Enerji Həftəsi çərçivəsində keçirilən Xəzər Beynəlxalq Energetika və Yaşıl Enerji “Caspian Power” sərgisində isə beynəlxalq və yerli şirkətlərin energetika və bərpa olunan enerji mənbələrinin inkişafı və istifadəsi sahəsindəki yeniliklər və bununla bağlı təkliflər gündəmdə olacaq. Sərgidə günəş enerjisi, külək enerjisi, geotermal enerji, istilik energetikası, nüvə enerjisi, maşınqayırma və enerji avadanlıqları, elektrik nəqliyyat vasitələri və elektromobillər, enerji və resurslara qənaət edən texnologiyalar və digər sektorlar üzrə məhsul və xidmətlər, eləcə də yeni layihələr nümayiş olunacaq.
Sərgi çərçivəsində bir sıra sessiyalar və panel müzakirələri də baş tutacaq. Sərgi günlərində "Stereotipləri qıraraq: Enerji həllərinin formatlaşdırılması", Yeni texnologiyalar və rəqəmsallaşma", “İrəliyə doğru yol açmaq: eko-avtomobilin gələcəyi və Azərbaycanda elektromobillərin artan populyarlığı və sair mövzularında panel müzakirələri keçiriləcək.
Bu, ümumiyyətlə elektromobillərin Azərbaycandakı perspektivi ilə bağlı müzakirə deməkdir. Bütövlükdə, Azərbaycanda elektromobillərin mütləq üstünlük əldə etməsi hansı dövrə hesablanmış bir məsələ kimi nəzərdən keçirilə bilər? Yəni nə vaxta gözləmək olar ki, elektromobillər Azərbaycanda üstün mövqeyə keçsin, ənənəvi yanacaqla - qazla, neftlə işləyən avtomobilləri elektromobillər üstələsin? Bunun perspektivi nə qədərdir? Panel iclasın keçirilməsi də məhz bu məsələnin üzərində qurulub. Çünki bunda dünya da maraqlıdır, Azərbaycan da. Gözlənilir ki, Azərbaycan bu sahədə elektomobillərdən istifadəni sürətləndirsin. Azərbaycanda bunun hansı dövr üçün əldə ediləcəyi ehtimal olunur?
“Bakı Enerji Həftəsi çərçivəsində bu mühüm mövzuya yer ayrılması onu göstərir ki, elektromobillərin perspektivi daha yüksəkdir”
Nəqliyyat üzrə ekspert Elməddin Muradlı “Bakı-Xəbər”ə şərhində bildirdi ki, Bakı Enerji Həftəsində elektromobillərin populyarlaşması məsələsinə aid xüsusi panel iclasın keçirilməsi çox mühüm əhəmiyyətə malikdir. Ekspertin fikrincə, Azərbaycanda elektromobillər mövzusunun beynəlxalq forumun müzakirəsinə ayrıca çıxarılması bu məsələnin çox mühüm və böyük perspektiv vəd etdiyini ortaya qoyur. “Elektromobillərin Azərbaycanda geniş yayılması müşahidə olunur. Çünki dövlət tərəfindən elektromobillərə çox böyük güzəştlər tətbiq olunub. Yəni onlar ƏDV-dən və digər bir neçə ödənişdən azaddır. Ətraf mühitin qorunması üçün bu elektromobillərin kütləviləşməsinin böyük əhəmiyyəti var. Düzdür, dünyanın bəzi ölkələrində əks-təbliğat işləri aparılır ki, avtomobillər gələcək üçün ətraf mühitə daha böyük zərbələr vura bilər. Ancaq bu gün elektromobillərin alternativi yoxdur. Ən optimal variant elektromobillərdir”-deyə bildirən E.Muradlı qeyd etdi ki, yanacaq sərfiyyatında olan qənaət, üstəlik bu avtomobillərin müasir avtomobil olması, əsasən də Çin bazarından Azərbaycana kütləvi şəkildə bu avtomobillərin bir qədər də ucuz qiymətə gətirilməsi insanlar arasında marağa səbəb olub. “Bu səbəbdən də bu avtomibillər çox geniş formada alınır. Yəni son dövrlər bazarda artım tempini də müşahidə edirik. Azərbaycanda buna dövlət səviyyəsində böyük maraq və dəstək var ki, elektrik avtomobillər geniş və kütləvi şəkildə yayılsın. Qiymətlər də əlçatan olduğuna görə buna maraq çoxdur. Hətta artıq beynəlxaq konfranslar, forumlar formatında elektromobillərin populyarlığının artırılması məsələsi müzakirəyə çıxarılır. Bakı Enerji Həftəsi çərçivəsində bu mühüm mövzuya yer ayrılması onu göstərir ki, elektromobillərin perspektivi daha yüksəkdir. Bilirsiz ki, bu il ətraf mühüitin qorunması ilə bağlı Azərbaycanda “Yaşıl Dünya Naminə Həmrəylik İli” elan edilib. Bu il çərçivəsində də bir çox tədbirlər, forumlar təşkil edilir, COP29 ərəfəsində daha böyük tədbirlər keçirilməsi planlaşdırılır.
Bu çərçivədə keçirilən tədbirlərdən biri artıq öz işinə başlayan Bakı Enerji həftəsidir ki, burada da panel iclaslardan biri elektomobillərin populyarlaşması məsələsinə həsr ediləcək, bu orada müzakirə ediləcək”-deyə E.Muradlı vurğuladı.
O qeyd etdi ki, ətraf mühitin çirkləndirilməsi məsələsində konkret Bakıdan danışsaq, paytaxtın çirklənməsinin 80 faizi ənənəvi avtomobillərin ixrac etrdiyi zəhərli qazların payına düşür. E.Muradlı bildirdi ki, dünya səviyyəsində bu, 60-70 faiz arasındadır. “Ətraf mühitin çirklənməsi, sağlamlığa mənfi təsiri ənənəvi yanacaqla işləyən avtomobillərlə birbaşa bağlıdır. Ona görə ekoloji təmiz nəqliyyat vasitələrini təbliğ və təşviq etmək hər bir dövlətin, o cümlədən də dünyanın bir parçası olan Azərbaycanın borcudur”-deyə E.Muradlı qeyd etdi.
Ekspert əlavə etdi ki, Azərbaycanda elektromobillər kütləvi yayılır və bu da onun yaxın dövrlər üçün perspektivini daha da artırır.
İradə SARIYEVA
