Nazirliyin məktəb və "texnikumlarda" yoxlamaları lazımi nəticəni verirmi?..
Məlum olduğu kimi, orta ixtisas təhsili müəssisələrində (kollec) monitorinq aparılıb. Elm və Ali Təhsil üzrə Dövlət Agentliyi monitorinqin nəticələrini açıqlayıb.
Qeyd edilir ki, monitorinqlər zamanı kolleclərin maddi-texniki bazasına və bir sıra tədris sənədlərinə baxış keçirilib, eləcə də tədris prosesi izlənilib: “Ağdam Dövlət Sosial-İqtisadi Kolleci, Azərbaycan Dövlət İqtisad Universitetinin (ADİU) nəzdində Sosial-İqtisadi Kolleci, ADİU-nun nəzdində Qida Sənayesi Kolleci və ADİU-nun nəzdində Azərbaycan Maliyyə-İqtisad Kollecinin direktorları və Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kolleclərinin tədris işləri üzrə direktor müavini vəzifəsindən azad edilib".
Monitorinqin nəticələrindən bəlli olur ki, işində qüsur olan direktor, direktor müavinləri vəzifələrindən azad edilir. Maraqlıdır, bu yoxlamaların nəticəsi məqbul sayıla bilərmi?
Kamran Əsədov: “Aparılan yoxlamaların nəticəsi müsbətdir, belə ki, şagirdlərin davranışı, davamiyyəti, qiymət göstəricisi müsbətə doğru dəyişir”
Təhsil eksperti Kamran Əsədov “Bakı-Xəbər”ə açıqlamasında bildirdi ki, ölkədə 4432 orta ümumtəhsil məktəbi var. Həmin məktəblərin 320-si paytaxt Bakının payına düşür: “Hesab edirəm ki, orta məktəblərdə ciddi monitorinq aparılmalıdır. Son bir neçə ay ərzində Bakı Şəhər Təhsil İdarəsi ciddi şəkildə məktəblərdə yoxlama keçirir. Aparılan yoxlamaların nəticəsi müsbətdir. Son ayların statistikası da göstərir ki, şagirdlərin davranışı, davamiyyəti, qiymət göstəricisi müsbətə doğru dəyişir. Bu, Bakı Şəhər Təhsil İdarəsinin təhsilin inkişafında maraqlı olmasından irəli gəlir”.
Həmsöhbətimiz bildirdi ki, təhsil müəssisələrində qanun pozuntusu bir neçə istiqamət üzrə olur: şagirdlərin davamiyyətinin aşağı olması və normativ hüquqi aktlara əməl ediməməsi. Kolleclərdə isə vəziyyət tamamilə fərqlidir: “Belə ki, kolleclərin idarəolunması ürəkaçan səviyyədə deyil. Ölkədə 51 min kollec var və orda 60 minə yaxın şəxs subbakalavr təhsili alır. Etiraf etmək lazımdır ki, subbakalavrlar uğurlu mütəxəssis kimi əmək bazarına daxil ola bilmir. Bunun da səbəbi odur ki, kolleclər əmək bazarının tələbinə və müasir standartlara cavab verən kadr hazırlaya bilmir. Bu kimi problemlərin həll olunması üçün kolleclərdə yoxlamalar davamlı olmalıdır. Kolleclərdə idarəetmə ilə bağlı təkmilləşmə həyata keçirilməlidir”.
Ilham Əhmədov: “Bu yoxlamalar gözlənilmədən olmalıdır”
Təhsil eksperti, professor İlham Əhmədov bildirdi ki, yoxlamanın necə aparıldığı məlum deyil: “Bu yoxlama gəlməmişdən əvvəl məktəbə bildirirlər. Uşaqlar hamısı gəlir. Hər şey yerində olanda gəldilər, 1 gün göründülər. Hər şey yaxşıdır, hesabata da imza atdılar və getdilər. Növbəti gün hər şey həmişəki qaydada olur. Bu yoxlamalar gözlənilmədən olmalıdır. Məktəbdə olmayan və dərs "görməyən" uşağın intizamı da, məsuliyyəti də zəif olur. Baş verənlərə diqqət yetirəndə mən görürəm ki, yoxlamalar yenə də formal olacaq”.
Günel CƏLİLOVA
