"COP29 Azərbaycanın mühüm qlobal təşəbbüsləri irəli sürməsi üçün unikaldır" - Bayden Bakıya məktub göndərdi...
COP29 Azərbaycanın metan və neft-qaz sektorunun emissiyalarını məhdudlaşdırmaq, eləcə də təmiz enerji keçidini inkişaf etdirmək kimi mühüm qlobal təşəbbüsləri irəli sürməsi üçün unikaldır, çünki biz temperatur artımının 1,5 dərəcə Selsi həddində saxlanılması üzərində kollektiv şəkildə çalışırıq.
Bu barədə ABŞ prezidenti Cozef Baydenin Bakı Enerji Həftəsinin iştirakçılarına ünvanlanmış müraciətində deyilir.
Məktub ABŞ Dövlət Departamentinin Enerji Resursları Bürosunun çoxtərəfli enerji diplomatiyası üzrə baş müşaviri Harri Kemian tərəfindən oxunub.
"Şadam ki, növbəti dəfə Bakı Enerji Həftəsini keçirirsiniz. Bu, Azərbaycanın qlobal enerji landşaftında oynadığı transformasiya rolunu vurğulayır. Bu il baş verən hadisələr xüsusi önəm kəsb edir, belə ki, Bakı noyabr ayında mühüm COP29 tədbirinə ev sahibliyi etməyə hazırlaşır", - müraciətdə deyilir.
Prezident Bayden qeyd edib ki, Azərbaycan xüsusən Avropa üçün qlobal enerji təhlükəsizliyinin mühüm dayağı olaraq qalır.
"Xəzər qazı getdikcə daha çox ölkələrdə hasil edilir ki, bu da Avropa ölkələrinə enerji mənbələrini şaxələndirməyə və karbohidrogenlərdən keçidi sürətləndirməyə kömək edir. Azərbaycan öz enerji tarixinin növbəti fəslini nəzərdən keçirdiyindən, təmiz enerji və metan emissiyaları ilə mübarizəyə yüksək diqqət və sadiqlik məni ruhlandırır", - o deyib.
Məktubda həmçinin qeyd olunub ki, Xəzərin mühüm külək enerjisi potensialı gələcəkdə Azərbaycandan təmiz enerji ixracının neft və qaz ixracını ötməsinə səbəb ola bilər.
"Regional sabitlik və qarşılıqlı əlaqələr ABŞ üçün prioritetdir. Onilliklər boyu davam edən münaqişəyə son qoyan davamlı və layiqli sülh sazişi Cənubi Qafqazı dəyişdirəcək və Azərbaycanın regiondakı rolunu əsaslı şəkildə dəyişəcək. ABŞ bu nəcib səyləri dəstəkləməyə hazırdır. Biz bunu gələcək nəsillər üçün, sülh və tərəqqinin rəhbər prinsiplərimiz olaraq qalması üçün etməliyik. Möhkəm ikitərəfli əlaqələrimizi bərpa etmək imkanını alqışlayıram və qarşıdakı aylarda əməkdaşlığımıza ümid edirəm. Bakı Enerji Həftəsinin uğurlu keçməsi üçün ən xoş arzularımı göndərirəm", - məktubun sonunda deyilir.
