Axır ki, banklar kredit məsələsində müştərilərə sərfəli bir addım atdı...
Əkrəm Həsənov: “Yeni qaydalar, həmçinin, əlilliyi olan şəxslərin kreditlərə çıxış imkanlarını artıracaq”
Fiziki şəxslərə kredit verilməsi ilə bağlı yeni qərar verilib. Mərkəzi Bank "Banklarda kredit risklərinin idarə edilməsi Qaydası"nda dəyişiklik edib.
Yeni qərara əsasən, fiziki şəxslərə kredit, o cümlədən məsafədən kredit müqaviləsi bağlanmazdan əvvəl bank müştəriyə həmin kredit üzrə onunla bağlı risqlərə təminat verilməsini nəzərdə tutan sığorta müqaviləsinin də bağlanmasını təklif edəcək. Yeni qərarda əmək qabiliyyətinin itirilməsi hallarından da sığorta nəzərdə tutulur.
Bununla yanaşı, bir sıra xəstəliklər və hallar müqaviləyə əsasən sığorta ödənişindən imtina hesab edilə bilər. Narkotik maddələr, spirtli içki və digər zərərli vərdişlər nəticəsində şəxs həyatını itirərsə onun kredit ödənişi sığorta şirkəti tərəfindən edilməyəcək.
Maraqlıdır, kreditlərlə bağlı verilən yeni qərar vətəndaşlara necə təsir edəcək?
“Vətəndaş kredit ödənişini etməsə sığorta təşkilatı həmin krediti geri qaytaracaq”
Bank məsələləri üzrə ekspert Əkrəm Həsənov “Bakı-Xəbər”ə açıqlamasında bildirdi ki, yeni qərar vətəndaşlara, bank və sığorta sisteminə müsbət təsir edəcək. Banklar üçün kredit risqi azalacaq. Vətəndaş kredit ödənişini etməsə sığorta təşkilatı həmin krediti geri qaytacaq. Elə insanlar var ki, kredit götürəndən sonra işləmək qabiliyyətini itirir, əlil olur, xəstələnir və ya vəfat edir. Bu hər kəsin başına gələ bilən bir hadisədir. Belə olan halda sığorta həmin ödənişi geri qaytaracaq”.
Ekspert onu da əlavə etdi ki, yeni qaydalar həmçinin əlilliyi olan şəxslərin kreditlərə çıxış imkanlarını artıracaq: “Belə ki, əlilliyə və ya mövcud əllilik dərəcəsinin digər yuxarı dərəcə ilə əvəzlənməsinə səbəb olan sığorta hadisəsi zamanı borcalanın kredit müqaviləsi üzrə qalıq borc məbləğinin həcmi nəzərə alınacaq. Həmçinin, onun sağlamlıq imkanlarının pozulması faizinə uyğun həcmdə ödəniş verilməsi nəzərdə tutulur. Borcalanla bağlanmış sığorta müqaviləsinin mövcudluğunu borcalan və ya onun yaxınlarının yoxlamasına imkan verən elektron sistemin qurulması isə şəffaflığın gücləndirilməsinə xidmət edəcək”.
Günel CƏLİLOVA
