Fransız qəddarlığı - 800 milyon dollar kompensasiyadan cəmi 63 nəfər polineziyalıya pay düşdü...
Rauf Zeyni: “Fransa polineziyalıları aldatmaqla, onlara qarşı irqi ayrıseçkilik siyasəti yürütməklə özünün əsl simasını ifşa edib”
Fransanın XXI əsrdə dənizaşırı ərazilərdə yaşayan qədim və yerli xalqlara, toplumlara qarşı amansız, qəddar siyasəti ifşa olunduqca gözlərimiz qarşısında çox acı mənzərələr canlanır. Tarixən müstəmləkəçiliyi dövlət siyasətinə çevirən Fransa uzun əsrlər müxtəlif qiitələrdə yaşayan xalqlara qarşı genosid, sömürgəçilik yolu tutub. Bu gün də yeni neomüstəmləkəçiliyi davam etdirməkdən əl çəkmir.
Fransanın müstəmləkəçilik siyasətindən əziyyət çəkənlərdən biri də Sakit okeanın cənubundakı 5 arxipelaqdan ibarət Fransız Polineziyasıdır Xatırladaq ki, Polineziya XIX əsrin ikinci yarısından Fransanın müstəmləkəsidir. Polineziyanın yerli əhalisi səsvermə hüququnu yalnız 1946-cı ildə əldə edib və 1957-ci ildə ilk yerli hökumətini qurub. Buna baxmayaraq, 1977-ci ilədək Polineziya məktəblərində yerli dillər tədris olunmayıb. Polineziya həm də bəzi epidemik xəstəliklərin (çikunqunya böhranı, Denge epidemiyası) yayıldığı ərazi kimi tanınır. Bu azmış kimi, 30 il ərzində - 1966-1996-cı illərdə Fransa tərəfindən burada 200-ə yaxın nüvə sınağı həyata keçirilib. Ümumilikdə təqribən 170 min nəfər Fransanın burada həyata keçirdiyi nüvə sınaqlarının qurbanı olub. Bundan başqa, BMT Nizamnaməsinin 73-cü maddəsinə əsasən, Fransanın Okeaniyadakı dənizaşırı ərazilərindən olan Fransız Polineziyası 1946-cı ildə BMT-nin “Dekolonizasiya edilməli olan ərazilər” siyahısına daxil edilib. Lakin yerli əhalinin razılığı olmadan 1947-ci ildə Fransız Polineziyası həmin siyahıdan çıxarılıb.
Fransa isə ərazisi kiçik olan arxipelaqda nüvə sınağı keçirməklə yeri əhalini genosidə məruz qoyur. 1998-ci ildə Fransa Polineziya əhalisinin nüvə sınaqlarından əziyyət çəkdiyini rəsmən etiraf edib. 2010-cu ildə Paris buna görə təzminat ödəməyə başlayıb. Fransanın irqi ayrıseçkilik, müstəmləkəçilik siyasəti təzminat məsələsində də özünü göstərib. Polineziyada xəstəliklər baş alıb gedir, bədxassəli şişlərdən əziyyət çəkənlərin sayı kifayət qədər çoxdur. Fransa bədxassəli şişlərin müalicəsi üçün təqribən 10 min nəfərə 800 milyon dollar ayırsa da, bu təzminatdan yararlananların əksəriyyəti əsasən fransızlar olub. Polineziyada yerli əhalinin cəmi 63 nümayəndəsi bu təzminatdan ala bilib.
“Fransanın bu ədalətsiz və qəddar siyasəti nəticəsində yerli əhali zülüm çəkir, xəstəliklərlə çarpışır”
Milli QHT Forumun prezidenti Rauf Zeyni “Bakı-Xəbər”ə açıqlamasında bildirdi ki, Fransanın bu davranışı həqiqətən də qəbuledilməzdir. Bu dövlətin sərgilədiyi münasibətin irqi ayrıseçkilik nümunəsi olduğunu deyən R.Zeyni qeyd etdi ki, Polineziyada yerli əhalinin cəmi 63 nümayəndəsinin bu təzminatı ala bilməsi Fransanın əsl simasını göstərir. “Fransa Polineziyada keçirdiyi saysız nüvə sınaqları ilə bu ərazidə həm ekoloji terror törədib, həm də yerli əhalinin sağlamlığına ciddi ziyan vurub. Bundan başqa, Fransa Polineziyada 10 min nəfəri aldadıb və 800 milyon dollar həcmində təzminat ayırıb, o pulu da əhaliyə doğru-dürüst verməyib. Fransa polineziyalıları aldatmaqla, onlara qarşı irqi ayrıseçkilik siyasəti yürütməklə özünün əsl simasını ifşa edib. Burda polizenyalıları aldadır, orada başqa bir dövlətə yalan satır. Avstraliya ilə hərbi müaviolə bağlamaq istəyir, bu alınmır sonra geri çəkilmək məcburiyyətində qalır. O biri tərəfdən Yeni Kaledoniyada insanların azadlıq hüququnu məhdudlaşdırır, orada da neokolonizm siyasəti yeridir. Dünyada demokrat, amma Yeni Kalednoyada neodemokrat obrazı yaradır. Bunlar hamısı Fransanın əsl simasını göstərir”.
R.Zeyni vurğuladı ki, Fransa 2010-2013-cü illərdə Polineziya əhalisinə ayırdığı 800 milyon dollar vəsaiti ədalətli şəkildə ünvanına çatdırmayıb və bununla da öz qəddarlığını, amansızlığını nümayiş etdirib. “Faktlara görə, bu təzminat əsasən fransız əsilli əhaliyə verilib, yerli əhalinin isə yalnız 63 nümayəndəsi bu təzminatı ala bilib. Əziyyəti çəkən yerli xalqdır, onlar hər cür ağır xəstəliyə düçar olur. Fransanın bu ədalətsiz və qəddar siyasəti nəticəsində yerli əhali zülm çəkir, xəstəliklərlə çarpışır”.
R.Zeyni deyir ki, Fransa keçmiş və yeni müstəmləkələrindən çaynaqlarını çəkməmiş indi də Cənubi Qafqaza soxulub burada qarışdırıcılıq etmək istəyir. “Dünya demokratiyasına iddialı ölkələrdən biri kimi Qafqazda sülh yaratmaq əvəzinə başqa yol tutur. Cənubi Qafqazda sülhə nail olmaq ərəfəsində Fransa qarışıqlıq salıb ortalığı qızışdırmaq istəyir, Ermənistanı silahlandırır. Qafqazda öz maraqlarını təmin etməkdən, buraya daxil olmaqdan ötrü dəridən-qabıqdan çıxır. Bilmirsən, Rusiyanın, Türkiyənin, yaxud Azərbaycanın əleyhinə bu hərəkətləri edir. Ermənistanı silahlandırır ki, guya onun dostudur. Ermənistanı silahlandıran onun dostu ola bilməz, elə ən böyük düşmənidir. Bu mənada, Fransa bütün dövlətlərdə maskası düşmüş bir ölkədir. Ona görə də Fransa hökuməti çox ciddi düşünməlidir ki, bu addımların, bu hadisələrin hamısı onun beynəlxalq imicinə zərbə vurur, onu gözdən salır. Hökumət öz siyasətinə yenidən baxmalıdır”-deyə R.Zeyni qeyd etdi.
İradə SARIYEVA
