Avroparlamentdə rüsvayçı korrupsiya axtarışları başladı - iplər "Qara brilyantçı" Karampetyana bağlanır...
![Image](/uploads/posts/2024-05/avroparlament-ermeni-almas.webp)
Məlum həqiqətdir ki, demək olar bütün Avropa dövlətləri Azərbaycanın ərazi bütövlüyünü tanıyır, qəbul edir. Fransa istisna olmaqla, Avropada heç bir dövlət başçısı Azərbaycan əleyhinə fikirlər səsləndirmir. Amma Avropa və ayrı-ayrı dövlətlərin parlamentləri bütün bunlara əks mövqe sərgiləyir.
Daha bir fakt budur ki, erməni milyarderlər bir çox Avropa Parlamenti üzvünü pul müqabilində ələ ala bilirlər. Bəzi hallarda parlamentarilərin xüsusi məqsədli çıxışları və hərəkətləri də elə bundan qaynaqlanır. Əslində, Avropa Parlamentində rüşvət və korrupsiya məsələləri yenilik deyil. Avropa Parlamentinin Yunanıstandan olan vitse-prezidenti Eva Kailinin adının milyonlarla dollarlıq korrupsiya skandalları ilə gündəmə gəlməsi bunun təzahürüdür. Ötən ilin fevralında Avropa Parlamentində dəstək müqabilində Qətər və Mərakeşdən rüşvət almaqda şübhəli bilinən Avropa Parlamentinin iki deputatı saxlanıb. Bu arada, Belçika federal prokurorunun bəyanatına görə, polis Avropa Parlamentinə “Rusiyanın müdaxiləsi” ilə bağlı reydlər keçirib. Brüsseldəki şəxsi iqamətgahda, Avropa Parlamentinin Strasburq və Brüsseldəki ofislərində aparılan axtarışlar “Avropanın Səsi” internet saytında Rusiya təbliğatını aparmaq üçün Avropa Parlamentinin deputatlarına müraciət edildiyi və onlara pul ödənildiyi iddia edilən “Rusiya işi” ilə bağlıdır. Belçika hüquq-mühafizə orqanları bildirib ki, Avropa Parlamentinin müvafiq əməkdaşının bunda mühüm rol oynadığına dair əlamətlər var. Bu fonda Belçika polisi mübahisəli siyasi partiya olan “Almaniya üçün Alternativ” üçün çalışmış deputat köməkçisinin əlaqələrini araşdırır. Həmin şəxs hazırda indi ifrat sağçı hollandiyalı Avropa Parlamentinin üzvü Marsel de Qraaff üçün işləyir. Bundan əvvəl aparılan əməliyyat isə Avropa Parlamentinin deputatı Maksimilian Krahın köməkçisinin həbsi ilə nəticələndi. Alman səlahiyyətliləri köməkçinin “Çin məxfi xidmətinin əməkdaşı” olduğunu bildirib. Bundan qısa müddət sonra Almaniyanın Drezden dövlət prokurorları Krahın Avropa Parlamenti deputatı kimi fəaliyyətinə görə ”Rusiya və Çindən ödənişlər qəbul etməsi ilə bağlı ilkin araşdırmalara başlayıb. Bu ayın əvvəlində Belçika və Almaniya polisi casusluq təhqiqatı ilə əlaqədar Krahın Avropa Parlamentinin ofisində axtarış aparıb.
Ötən il isə Belçika polisi və alman müstəntiqləri Almaniyada başladılan istintaq çərçivəsində sağ mərkəzçi Avropa Xalq Partiyasının (EPP) Brüsseldəki qərargahına basqın ediblər. EPP Avropa səviyyəsində ən böyük partiyadır. Onun üzvləri Avropa Parlamentində ən çox yer tutur. İstintaqla bağlı əlavə məlumat verilməsə də, Almaniyanın “Thueringer Allgemeine” qəzeti mənbələrə istinadən xəbər verirdi ki, basqın Xristian Demokratların mərkəzi Türingiya əyalətində lideri Mario Voigta qarşı davam edən korrupsiya istintaqı ilə bağlıdır. 2019-cu il Avropa seçkiləri üçün rəqəmsal EPP seçki kampaniyasındakı rolu ilə əlaqədar. İstintaq Voigtin kampaniya zamanı müqavilə bağladığı internet şirkətindən təzminat alması ilə bağlı iddialara əsaslanır. EPP üzvləri arasında Avropa Parlamentinin sədri Robert Metsola, Yunanıstanın Baş naziri Kiriakos Mitsotakis və İsveçin Baş naziri Ulf Kristersson kimi tanınmış siyasətçilər var. Bütün bunlar rüşvətxorluq və korrupsiyanın Avropa institutlarında artıq sistemli xarakter aldığını göstərdi. Bundan erməni milyarderlər də yetərincə istifadə edirlər.
Belələrindən biri erməni mafiyasının Belçikadakı əsas siması Kaspar Karampetyandır. Eyni vaxtda Yunanıstan, Ermənistan və Luksemburq vətəndaşı olan Karampetyan “Ədalət və Demokratiya Naminə ümumAvropa Erməni Federasiyası” adlı təşkilatın prezidentidir. Bu şəxs öz biznesini, qanunsuz almaz qaçaqçılığı da daxil olmaqla, müxtəlif qeyri-leqal biznes fəaliyyətləri hesabına qurub. Adı mafiya əməllərində də hallanan Karampetyan Ermənistanın və özünün biznes maraqlarının müdafiəsi üçün avropalı məmur və deputatlara bu vaxtadək milyonlarla vəsait paylayıb. Avroparlamentarilərə külli miqdarlarda rüşvət verən daha bir erməni əsilli oliqarx isə Vartan Sirmakesdir. İsveçrə vətəndaşı olan Sirmakes işğal dövründə Qarabağda bank sektoru, kənd təsərrüfatı, mədən sənayesi kimi müxtəlif sahələrdə tamamilə qanunsuz biznes fəaliyyətləri göstərib və Azərbaycanın sərvətlərini talayaraq öz biznes imperiyasını genişləndirib. Serj Sarkisyanın Ermənistanın Marselə baş konsul təyin etdiyi Sirmakes əldə etdiyi vəsaitlərdən avroparlamentarilərə rüşvət və bahalı hədiyyələr şəklində paylayaraq həm Ermənistanın, həm də şəxsi maraqlarının müdafiəsində dəstək toplamağa çalışıb. Bu və digər erməni oliqarxların, mafiya başçılarının verdiyi rüşvəti qəbul edən bəzi Avropa Parlamentinin deputatları təbii olaraq Azərbaycan əleyhinə qərəzli fəaliyyətləri ilə seçilirlər və parlamentin korrupsiya şəbəkəsinin üzvləridirlər. Hələ də Avropada ictimai-siyasi mühit istər erməni oliqarxları, istərsə də digər maraq qrupları üçün öz niyyətlərinə qanunsuz şəkildə çatmaq fürsətləri təqdim edir. Bu da Avropa Parlamentinin Azərbaycana qarşı qərəzinin mahiyyətini açıq şəkildə izah edir. Avroparlamentin korrupsiya və rüşvət vasitəsilə digər ölkələrə qarşı ədalətsiz qətnamələr qəbul etməsi artıq adi hal alır. Şübhəsiz ki, lobbiçilik müqabilində rüşvətalma faktlarının üzə çıxması Avropa Parlamentinin imicini yerlə bir edib, amma qurum baş verənlərdən nəticə çıxarmaq istəmir. İndi də Azərbaycana qarşı ədalətsiz və qərəzli mövqe tutur. Lakin bununla daha çox özünə zərər vurur.
Samirə SƏFƏROVA