Müstəqillik günündə Xocalıya böyük Qayıdışın ayrı mənaları var...
![Image](/uploads/posts/2024-05/xocali11.webp)
Məhərrəm Zülfüqarlı: “Bu qayıdış köçü siyasi, tarixi, mənəvi qələbəmizin parlaq rəmzlərindən birinə çevrildi”
Xocalıya ilk köç 28 may Müstəqillik Günündə gerçəkləşdi. Xocalıya ilkin mərhələdə köçürülən ailələrin ana yurdlarına dönüşü dostlarımızı sevindirdi, düşmənlərimizin yuxusunu ərşə çəkdi. 32 il sonra xocalılılar öz yurdlarına qədəm qoydular.
28 May Müstəqillik Günündə Xocalıya qayıdışın simvolik mənası, tarixi əhəmiyyəti nədir? Bu qayıdışın o tarixdə baş tutmasının xüsusi mənası varmı?
“Xocalıların öz evlərinə qayıtması düşmənə böyük göz dağıdır, onların bir daha beli sındı”
AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə bildirdi ki, xocalılıların 28 may tarixində Xocalıya köçməsi və Prezident İlham Əliyevin də həmin tarixdə orada olması qətiyyən təsadüfi deyil. “Çünki Xocalı soyqırımı, bu faciə dövlət müstəqilliyini yeni bərpa edən Azərbaycanın sinəsinə çəkilən dağ idi. Xocalının azad olunması uğrunda Azərbaycan xalqı uzun illər mübarizə apardı, şəhidlər verdi, digər ərazilərimiz kimi Xocalı da işğaldan azad olundu. Tamamilə düzgün hesab etmək lazımdır ki, Prezidentin Xocalıya adi günlərdən birində yox, məhz Müstəqillik Günündə getməsi çox qürurverici haldır. Azərbaycanın müstəqilliyinin, dövlətçiliyinin əziz tarixi olan 28 Mayda Prezidentin Xocalıya getməsi, xocalılıların öz evlərinə qayıtması dostlarımızı sevindirir, düşmənlərimizi isə məyus edir”.
M.Zülfüqarlı bildirdi ki, Azərbaycan öz gücünə dövlət müstəqilliyinin bərpasından sonra itirilmiş, işğal olunmuş əraziləri azad etdi və o əraziləri bərpa edir. “Bununla da Azərbaycan regionda güclü dövlət olduğunu bir daha təsdiqlədi. Gələcəkdə də Xocalıya gedəndə Azərbaycan üçün əlamətdar günləri seçməliyik ki, o ağrı-acı bir az da olsa dinşəsin, azalsın. Müzəffər Azərbaycan Ordusu Xocalının intiqamını dəfələrlə aldı. Xocalıların da məhz 28 May Müstəqillik Günündə öz evlərinə qayıtmasının xüsusi simvolik mənası var. Bu qayıdış köçü siyasi, tarixi, mənəvi qələbəmizin parlaq rəmzlərindən birinə çevrildi. Biz bir daha göstərdik ki, Azərbaycan xalqı qorxmaz və qəhrəman xalqdır, Azərbaycanın cəsur, vətənpərvər vətəndaşları, güclü siyasi lideri var. Azərbaycan Prezidentinin Xocalı sakinləri ilə o müqəddəs gündə bir yerdə olması isə bizi həddən artıq qürurlandırdı...
Xocalıların öz evlərinə qayıtması düşmənə böyük göz dağıdır, onların bir daha beli sındı. Şəhid şəhərin sakinləri o şəhəri öz nəfəsləri ilə canlandırıb yaralarını sarıyacaqlar. Bir də 28 May Müstəqillik Günündə Xocalıdan bütün dünyaya mesaj verildi ki, xocalılılar öz qayıdışları ilə düşməndən öz əzizlərinin qisasını aldılar” - deyə M.Zülfüqarlı qeyd etdi.
İradə SARIYEVA