Avroittifaq məmuru ermənilərin təsiri altında Azərbaycana qərəzli hücum etdi...
Tural İsmayılov: “Yaxşı olar ki, bu mövqedə olanlar Fransanın neokolonializm siyasətindən danışsın”
“29 may 2024-cü il tarixində Avropa İttifaqının (Aİ) xarici siyasət və təhlükəsizlik məsələləri üzrə mətbuat katibi Peter Stano tərəfindən səsləndirilən qərəzli və qəbuledilməz bəyanatı tamamilə rədd edirik”.
Bunu Xarici İşlər Nazirliyinin Mətbuat xidmətinin rəhbəri Ayxan Hacızadə Avropa İttifaqının xarici siyasət və təhlükəsizlik məsələləri üzrə mətbuat katibi Peter Stanonun Azərbaycanda insan hüquqlarının vəziyyəti barədə iddiaların əks olunduğu bəyanatına münasibət bildirərkən deyib.
A.Hacızadə bildirib ki, Aİ nümayəndəsinin bəyanatı Azərbaycanda insan hüquqlarının vəziyyəti ilə bağlı reallıqdan uzaq olmaqla yanaşı, açıq-aşkar saxtakarlıqlarla doludur.
“Avropa İttifaqı tək Azərbaycana münasibətdə deyil, daxili və siyasətlə bağlı mövzularla da bağlı aidiyyəti olmayan açıqlamalar verir”
Mövzu ilə bağlı fikir bildirən siyasi şərhçi Tural İsmayılov “Bakı-Xəbər”ə şərhində bildirdi ki, Avropa İttifaqı vahid yekdil bir qurum deyil: “Avropa İttifaqının daxilində müxtəlif maraq dairələri daim bir-birilə toqquşur. Təkcə Azərbaycana münasibətdə deyil, daxili və siyasətlə bağlı mövzularla da bağlı aidiyyəti olmayan açıqlamalar verirlər. Peter Stano Avropa İttifaqının xarici siyasət və təhlükəsizlik məsələləri üzrə mətbuat katibidir. Onu da nəzərə almaq lazımdır ki, Aİ xarici və təhlükəsizlik məsələləri üzrə rəhbəri Cozef Borrel Ermənistanın uydurduğu məsələlər və dezinfomasiyalara ən çox inanan siyasətçilərdən biridir. Bu şəxs dəfələrlə Azərbaycan əleyhinə açıqlamalar səsləndirib. Cozef Borrelin mətbuat katibi də onun iradəsindən kənar fikir səsləndirə bilməz. Avropa İttifaqının daxilində Azərbaycanın önəmini və əhəmiyyətini dərk edən xeyli siyasətçilər, dövlətlər var. Bu səbəbdən də Azərbaycan Aİ-nin üçdə bir hissəsinin enerji məsələləri üzrə partnyorluğa malikdir. Belə olan halda İttifaqın içərisində Azərbaycan əleyhinə fikirlər qəbuledilməzdir. Yaxşı olar ki, bu mövqedə olanlar Fransanın neokolonializm siyasətindən danışsın. Təəssüflər olsun ki, öz gözündə tiri görməyənlər Azərbaycana və Türkiyəyə ağıl öyrətməyə cəhd edir”.
Günel CƏLİLOVA
