Yas mərasimində kabab verdilər - adətlərimizi məhv edirlər...
Tural İrfan: “İndi yasda kabab verirlər, bir azdan çaxır da verəcəklər”
Bir neçə il əvvəl hüzr mərasimlərində ehsan verilməsi qaydaları ilə bağlı nəzarətin həyata keçirilməsi qərarı verildi. O zaman qeyd olunurdu ki, məqsəd yas mərasimlərində israfçılıq hallarının qarşısının alınmasıdır. Hətta rəsmi qurumlar bununla bağlı konkret standartlar - menyu da müəyyənləşdirdi.
Bu qərardan sonra bir müddət regionlarda və paytaxtda yas mərassimlərinin dəbdəbəli keçirilməsinə son qoyuldu. İnsanlar artıq sadə, cəmi bir neçə təamla yola verilən mərasimlər təşkil etməyə öyrəşdilər. Lakin son zamanlar yenidən yas məclislərində dəbdəbəli ehsan süfrələrinin açılmasının şahidi oluruq. Belə ki, bir neçə gün əvvəl Tərtər rayonunda yas mərasimində kabab verilib. Bu məsələ sosial şəbəkədə müzakirə olundu. Milli Məclisin ötən iclaslarında da yas mərasimlərində yemək vermək adətinin aradan qaldırılması barədə fətva verilməsi müzakirə olunub.
Qeyd edək ki, zamanla yas məclislərində dəbdəbəli ehsan süfrələrinin verilməsi qınaqla qarşılanıb. Buna baxmayaraq, hələ də ehsan süfrələrində ifrata varılır.
“Kimin yasına daha çox adam gəldisə, kim yasında daha yağlı yemək verdisə onunla fəxr edir, bu, mağara təfəkkürüdür”
Ilahiyyatçı Tural İrfan “Bakı-Xəbər”ə açıqlamasında bildirdi ki, dəbdəbəli yas məclisləri, bahalı süfrələr açılması düzgün deyil, israf da Quranda haramdır: “Din xadimləri belə məclislərə etiraz etsələr, bir ayın içində qarşısı alınar. İndi yasda kabab verirlər, bir azdan çaxır da verəcəklər. Tədricən yas məclisi İslam qaydasından çıxıb kef məclisinə çevriləcək. Ehsan deyəndə bizdə ancaq qarın, yemək ağıla gəlir. Ancaq bu belə deyil. Ehsan yaxşılıq deməkdir. İstənilən adamın istənilən xeyirli iş etməsi ehsandır. Vəfat edən adam üçün dərhal borca düşüb, əziyyətə düçar olub yemək dalınca qaçmaq doğru deyil. İslam dinində ölü sahibinin qonaqlara yemək verməsi qəbul edilmir. Əksinə, gələnlər yas sahibinə ərzaq, yemək gətirməlidir ki, onun başı yasa qarışıb. Bu mövzuda ən çox danışan ilahiyyatçı bəlkə də mənəm. Başqaları o qədər də danışmır. Çünki bəzi din xadimlərinə bu sərf edir. Gedib toqqanın altını bərkidirlər. Ancaq Şəkidə və Şərurda bir neçə kəndin ağsaqqalları yığılıb bunu ləğv etdilər. Demək başqa yerlərdə də ola bilər. Türkiyədə bizim kimi çox da təmtəraqlı yas məclisləri olmur. Buna baxmayaraq, onlar da yığışdırır. Çünki bunun dini cəhətdən əsası yoxdur və israfçılıqdır, ölü sahibinə əziyyətdir. Camaat da bir-biri ilə bəhsə girir. Kimin yasına daha çox adam gəldisə, kim yasında daha yağlı yemək verdisə onunla fəxr edir. Bu, mağara təfəkkürüdür. Bir çox belə adət halını almış ənənələr xalqımızın adına yaraşan işlər deyil. Acgözlük, yekəxanalıq, görməmişlik bizə yaraşmaz. İslam dinində üç gün yas olmalıdır, o günlər ərzində də camaat ölü yiyəsinin evinə ərzaq, yemək, pul aparıb onlara dəstək olmalıdır. Üç gündən sonra da bitməlidir. 7,40,52, il məclisi bidətdir və günahdır. Yəni İslam dinində olmayan bir adəti dinə gətirməkdir ki, bu da dinimizdə ən pis günahlardandır”.
Günel CƏLİLOVA
