Ermənistan hakimiyyəti Xocalıya görə hansı formada üzr istəyəcək?..
Mübariz Göyüşlü: “Ermənistan Xocalıda törətdiyi vəhşiliyi etiraf etməli və buna görə ölkəmizdən üzr istəməlidir”
“Ermənistan özü Xocalıda törətdiyi vəhşiliyi etiraf etməlidir, özü bizdən üzr istəməlidir”. Bu sözləri Prezident İlham Əliyev Xocalı şəhərinə köçən sakinlərlə söhbəti zamanı deyib. Prezident qeyd edib ki, bunu etməklə indiki Ermənistan rəhbərliyi o vəhşilərin, vandalların, qaniçənlərin günahlarını bir qədər yumuş ola bilər:
“Bunu etməsə, məncə, Ermənistan özü heç vaxt ayağa dura bilməyəcək. Gərək, ilk növbədə Ermənistan özü bu faciəni, bu cinayəti, hərbi cinayətini tanısın".
Maraqlıdır, bu üzr istəmə nə formada olsa Azərbaycan onu qəbul edəcək? Ümumiyyətlə, bu üzr istəmə birbaşa Xocalı qatillərinin bağışlanması anlamına gəlirmi?
“Ermənistanın üzrü nə qətl edilən insanları geri qaytaracaq, nə də ağrı-acını unutduracaq, nə edilsə də Xocalı soyqırımı yarası sağalmayacaq”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, belə bir təcrübə xarici ölkələrdə olub: “Ermənistan etdiyi vəhşiliklərə görə üzr istəməlidir. Üzr istəməklə yanaşı, təzminat da ödəməlidir. Məlumdur ki, onlar Azərbaycan mədəniyyət abidələrini dağıdıblar, yerli vətəndaşların evlərini yerlə yeksan ediblər. Düzdür, onların üzrü nə qətl edilən insanları geri qaytaracaq, nə də ağrı-acını unutduracaq. Nə edilsə də Xocalı soyqırımı yarası sağalmayacaq. Ermənistanın Xocalı faciəsi ilə bağlı üzrü yalnız Azərbaycan xalqı, qətlə yetirilən insanların yaxınları üçün təsəlli olacaq”.
Həmsöhbətimiz bildirdi ki, ikinci Qarabağ müharibəsi zamanı Azərbaycan ordusu Xocalı faciəsinin qisasını alıb. Xocalı qaytarılmaqla da bu qisas yenidən alınıb: “Qatillər əli qandallı şəkildə Bakıya gətirilib. Ermənistan Xocalıda törətdiyi vəhşiliyi etiraf etməli və buna görə ölkəmizdən üzr istəməlidir. Bütün dünya bu soyqırımını tanımalıdır. Ermənistan bu qeyri-insani cinayətə görə üzr istəməli və bu cinayəti törədənlərin hər biri layiqli şəkildə cəzalandırılmalıdır”.
Günel CƏLİLOVA
