Hakimiyyətə dartınan keşişin faşist damğası açıldı - kilsə biabır oldu...

Bir aya yaxındır baş nazir Nikol Paşinyanın istefasını tələb edən keşiş Baqrat Qalstanyan və yüzədək tərəfdarı hələ mayın 27-dən Sərdarabad abidəsinə gələrək burada çadır qurmuşdular. 

Əsas məqsədlərdən biri də Paşinyanın abidəni ziyarət etməsinin qarşısını almaq idi. Qalstantanyan Paşinyanın müxtəlif səbəblərdən, o cümlədən qorxusundan Sərdarabad abidəsinə gəlməyəcəyini iddia etmişdi: 

“Onun bizim ölkəmizlə, onun rəmzləri ilə daha heç bir əlaqəsi yoxdur. O, artıq real və tarixi Ermənistan haqqında absurd bəyanatlarını verib. Görünür, bura da tarixi Ermənistandır. Bunun onun beynindəki real Ermənistanla əlaqəsi yoxdur. İkincisi, ola bilsin, ona xaricdən əmr ediblər ki, bura gəlməsin”.

Keçmiş prezident Robert Köçəryanın “Hayastan” fraksiyasının deputatları da Nikol Paşinyana Sərdarabad abidəsinə gəlməməyi məsləhət görmüşdülər. Amma radikalların bütün təhdidlərinə baxmayaraq, Paşinyan  Sərdarabad abidəsinə gəlib və çıxış da edib. Əksinə, Erməni Kilsəsinin rəhbəri katolikos II Qareginin xatirə kompleksinə girişinə maneələr yaradılıb. Qaregin və başqa ali ruhanilər Sərdarabad abidəsinə Paşinyan buranı tərk edəndən az sonra gəliblər. Ermənistan hökumətinə yaxın bilinən “Baqramyan 26” teleqram kanalı bildirir ki, abidə ərazisində II Qareginə hücum edilib. Kanal bildirib ki, Qaregin əməlinin cavabını alıb: “İndi o, əkdiyini biçir”. Qeyd edilib ki, hüquq-mühafizə orqanları Sərdarabad memorialına yaxınlaşan II Qareginin yolunu kəsib, onun memorial kompleksə daxil olmasına maneə yaradılıb. Katolikos və əshabələri polislərlə toqquşub. Qeyd edək ki, indiyədək Ermənistanın tarixində belə hadisə baş verməyib. Maraqlıdır ki, cəmiyyət bunu normal qarşılayıb.  Ekspertlər isə qeyd edir ki, baş verənlər kilsənin də erməni cəmiyyətində dayağının olmadığını göstərir.  Hər halda, Sərdarabad abidəsində baş verənlər də bunu təsdiq edir. Burada onu da xatırladaq ki, Sərdarabad qalası İrəvan xanı Hüseynqulu xan Sərdar tərəfindən təxminən 1810-cu ildə tikilib. Qala 1928-ci ildə, İrəvan xanının qızğın müqavimətinə baxmayaraq, Rusiya generalı Paskeviçin nəzarətinə keçib. Ermənistana gəlincə, artıq görünən odur ki, kilsənin də Paşinyana qarşı etirazı fiaskoya uğrayır. Elə bu fonda hakimiyyət kilsənin etirazına daha sərt reaksiya sərgiləməyə başlayıb və təşkil olunan aksiyaların iflasa uğradığını bildirib. Nikol Paşinyanın hakim “Vətəndaş müqaviləsi” partiyasından deputat Qagik Melkonyan  qeyd edir: “2018-ci ildəki antihökumət etirazları ümumxalq hərəkatı idi, bu səbəbdən onu indiki və ya əvvəlki hərəkatlarla eyniləşdirmək olmaz. Onda heç kim düşünmürdü ki, hakimiyyət dəyişəcək. Ona qədər də, 2003, 2008 və 2015-ci illərdə etirazlar keçirilmişdi. Onda heç nə etmək mümkün olmamışdı. 2018-ci ildə isə ümumxalq hərəkatı başladı. Bu isə o deməkdir ki, etirazlarda 200 mindən çox adam iştirak edirdi. Rayonlar da nəzərə alınarsa, etirazçı sayı 500 min nəfərdən çox idi”. Melkonyan deyib ki, indiki hərəkatda xəstəxanaya gedən maşınların yolunu kəsirlər: “Mənim üçün o qədər də mühüm deyil ki, “Vətən naminə Tavuş” hərəkatının baş nazirliyə namizədi kim olacaq. Ən mühümü ölkədə baş verənlərdir”. Deputat vurğulayıb ki, Erməni Kilsəsinin arxiyepiskopu Baqrat Qalstanyanın namizədliyini keçirə bilməsələr, başqa namizəd irəli sürə bilərlər: “Bunun əhəmiyyəti yoxdur. Ən əsası odur ki, hər şey qanun çərçivəsində baş versin. Onlar ümidlərini 2026-cı il seçkilərinə bağlayıb işləməlidirlər ki, tərəfdarlarının sayı azalmasın”. Melkonyan iddia edib ki, etirazçıların sayı getdikcə azalır: “Bununla belə, “Vətən naminə” hərəkatının lideri öz namizədliyini baş nazir vəzifəsinə elan edəndən, özünü az qala hökumət başçısı sayır, göstərişlər verir”.

Deputat xatırladıb ki, Rusiya televiziyası mayın 26-da etiraz aksiyasına guya 100 min nəfərin çıxdığını iddia edib. Melkonyanın sözlərinə görə, Ermənistanda hakimiyyətin dəyişməsi ilk növbədə Rusiyaya lazımdır, çünki Moskva Ermənistanın daim vassal kimi qalmasını istəyir: “Biz daha onlardan icazə almırıq ki, hansı ölkələrlə əlaqələrimizi inkişaf etdirə bilərik və bu onların xətrinə dəyir. Axı biz həmişə onlardan icazə alırdıq və ya bizim əvəzimizə onlar danışırdılar”.
 Hakim partiyanın daha bir deputatı olan  Mariya Karapetyan  da müxalifəti sərt tənqid edib: “Dörd ildir ki, müxalifət eyni valı fırladır. Bizə sonuncu şans verir. Hərəkatları daimi və ya həlledici həddə çatdıracağını bildirir”. Qeyd edək  ki, keşiş Baqrat Qalstanyan mayın 26-da keçirdiyi mitinqdə də Paşinyanın istefasına çağırıb və ona sonuncu imkanı verdiyini deyib. Mariya Karapetyan bu xüsusda bildirib: “Bundan əvvəlki hərəkatlar da kifayət qədər həlledici olmayıb. Amma onlar indikindən də daha ağır sözlərlə hədələyirdilər və deyirdilər ki, onların təklif etdikləri “həll yollarını” qəbul etməsək, bizim üçün pis olacaq”. Deputat Karapetyan hakimiyyətin Qalstanyanla dialoqa niyə girməməsi barədə suala cavab verərkən deyib: “O faşistdir. Biz faşistlə nəyi müzakirə etməliyik?”. Bu arada Ermənistanın “Qraparak” nəşri yazıb ki, müxalifət Paşinyanı istefaya göndərmək üçün hüquqi prosedur məsələsində də uduzub: “Mayın 9-da ilk mitinqdə Baqrat Srbazan tələsik bəyan edib ki, Paşinyan könüllü getməsə, o zaman müxalifət fraksiyaları onun vəzifədən uzaqlaşdırılması üçün parlamentdə etimadsızlıq nümayiş etdirmə prosesinə başlayacaq. Bu məqsədlə Baqrat Srbazan mitinq zamanı parlament qüvvələrinin bəzi deputatları ilə məsləhətləşib. Artıq növbəti mitinqdə o, “müstəqil” İşxan Zakaryanla iki dəfə görüşdüyünü, onun prosesə qoşulacağına və təşəbbüsü təqdim etmək üçün çatışmayan 1 səsi təmin edəcəyinə söz verdiyini bildirib. Lakin bəzi məlumatlara görə, etimadsızlıq prosesini qeyri-müəyyən müddətə təxirə salmaq qərarına gəliblər və Baqrat Srbazan son günlər parlament qüvvələrinin nümayəndələri ilə söhbətlərində dolayı mətnlə buna eyham vurub. Hərəkat liderinin sözlərinə görə, Nikol Paşinyanın etimadsızlıq təşəbbüsünü uğursuz etmək üçün hər şeyi edəcəyi indiki mərhələdə prosesi parlamentə gətirmək məqsədəuyğun deyil”.

Nahid SALAYEV