Ermənistan Azərbaycana yeni ərazi iddiaları hazırlayır...
Sahil Kərimli: “Biz ordumuzu daim gücləndiririk ki, gələcəkdə də bu cür təhlükəli meyllərin qarşısını qətiyyətlə və dərhal ala bilək”
Prezident İlham Əliyev Xocalı şəhərinə köçən sakinlərlə söhbəti zamanı deyib ki, şəhidlərin qəhrəmanlığı, fədakarlığı sayəsində biz bu gün buradayıq:
“Onlar sinələrini qabağa verərək düşmənə elə bir sarsıdıcı zərbə endirmişlər ki, əminəm, bundan sonra Ermənistan heç vaxt Azərbaycana qarşı hər hansı bir hərbi təxribat törətməyə cəhd etməyəcək. Halbuki, Ermənistanda revanşistlər də kifayət qədər çoxdur. Biz son hadisələri də izləyirik, görürük ki, bizə qarşı yenidən ərazi iddiaları irəli sürmək cəhdləri var. Ona görə biz hər an hazır olmalıyıq. Əlbəttə ki, ilk növbədə, ordumuzu daha da gücləndirməliyik və bunu edirik. Bu gün hərbçilər üçün inşa edilmiş evlərlə də tanış oldum. Bütün Qarabağ və Şərqi Zəngəzur çox möhkəm bir istehkam zonası olacaq və burada artıq bu istiqamətdə işlər görülür ki, Azərbaycan xalqı əbədi əmin olsun, bir daha bu faciələr bizim xalqımızın başına gəlməyəcək. Bu gün bax, burada – Xocalıda, - cəmi 8 ay ərzində bərpa edilmiş Xocalıda, - görüşməyimiz əlbəttə ki, xüsusi məna daşıyır. Məhz Müstəqillik Günündə mən sizinlə yenidən görüşmək istəmişəm. Üç ay bundan əvvəl - fevralın 26-da hər birimiz üçün faciəli gündə Xocalıda Memorial Kompleksin təməlini qoyduq. Bu gün isə artıq xocalılılar qayıdır və şəhər də göz oxşayır”.
Göründüyü kimi, Prezident Ermənistanın hələ də Azərbaycana ərazi iddialarının olduğunu deyir. Bu vəziyyəti necə şərh etmək olar?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, son dövrdə Ermənistanda baş verən proseslərdən açıq-aydın görünür ki, xaricdən çox güclü, həm siyasi, həm də maliyyə dəstəyi alan revanşist və radikal qüvvələr bölgədə yeni müharibə ocağı yaratmağa çalışırlar: “Həmin qüvvələr Azərbaycana qarşı müxtəlif ərazi iddiaları da səsləndirirlər. Çünki biz bilirik ki, Ermənistan uzun illərdir ölkə kimi daim işğalçılığı, revanşizmi, qonşulara qarşı ərazi iddialarını öz siyasi kursunda prioritet kimi saxlayıb. Son dövrlərdə Ermənistan hakimiyyəti yaxşı anlayır ki, bu işğalçılıq, qonşularla düşmənçilik siyasəti Azərbaycanın qətiyyətli siyasəti, Azərbaycan ordusunun gücü və qüvvəsi qarşısında məğlubiyyətə uğrayıb. Ermənistanın gələcək taleyi üçün əsas hədəf yalnız bu iddialardan əl çəkmək, qonşularla sülh və təhlükəsizlik şəraitində yaşamaqdır. Amma təəssüf ki, bu gün Ermənistanda olan revanşistlər, radikal qüvvələr yenə də 30 il əvvəlki ərazi iddiaları prinsiplərinə əsaslanırlar, sülh müqaviləsinin imzalanmasına da bu istiqamətdə çox ciddi mane olmağa çalışırlar. Paşinyan hakimiyyətinin istefaya çağırılması, Azərbaycanın işğalda saxlanılan kəndlərinin Azərbaycana qaytarılması, sərhədlərin delimitasiya və demrkasiya prosesi istiqamətində bu revanşist qüvvələr ciddi maneələr yaratmağa çalışırlar, bununla da işğalçılığa davam demək istəyirlər. Bu isə təhlükəli tendensiyadır. Təbiidir ki, Qazaxın kəndlərinin qaytarılmasına qarşı çıxan qüvvələr buna qarşı çıxmaq planları ilə ərazi iddialarında olduqlarını da təsdiq edirlər. Həmin qüvvələr yenə də Azərbaycanın suveren ərazisi olan Qarabağa da iddialarını ortaya qoyurlar, gələcəkdə də bu ərazilərin işğalı ilə ortaya plan qoyacaqları gözlənilir. Azərbaycan dövləti, ordusu son illərdə çox yüksək şəkildə inkişaf edib, qüdrətlənib. Biz döyüş meydanlarında işğalçılara unudulmaz dərs vermişik. Ancaq revanşist qüvvələr həmin dərsdən nəticə çıxarmayıblar. Əgər yenidən işğalçılıq siyasəti ortaya çıxarsa, cənab Prezidentin də dünən Xocalıda qeyd etdiyi kimi, Azərbaycan bütün təhdidlərin qarşısını qətiyyətlə almağa hazırdı. Bu istiqatdə biz ordumuzu daim gücləndiririk ki, gələcəkdə də bu cür təhlükəli meyllərin qarşısını qətiyyətlə və dərhal ala bilək”.
Məhəmmədəli QƏRİBLİ
