Paşinyan Belarusu da Azərbaycan kimi düşmən sayır - Zatulin qəzəbləndi…
Bədrəddin Quliyev: ”Belə çıxışlar və onlara verilən cavablar erməni bicliyinin əsl mahiyyətini ifşa edir”
Dövlət Dumasının deputatı, ermənipərəstliyi ilə seçilən Konstantin Zatulin Paşinyanın 2020-ci ildə Bakıya yardım göstərdiyinə görə KTMT-yə üzv iki ölkəyə qarşı ittihamlarını belə şərh edib:
“Mənim mövqeyim çoxdan bəllidir. Paşinyan yalançı və əclafdır, erməni xalqının qəzəbini Rusiyaya yönəltməyə çalışır, sələflərinin və bütün erməni xalqının uzun illər mübarizə apardığı hər şeyi uğursuzluğa düçar etmiş və itirmişdir”.
O, Paşinyanın Kollektiv Təhlükəsizlik Müqaviləsi Təşkilatının iki ölkəsi deyərkən Rusiya və Belarusu nəzərdə tutduğunu bildirib.
Qeyd edək ki, Paşinyan ötən gün "KTMT-yə üzv iki ölkəni Azərbaycana yardımda" ittiham edib: “2020-ci ildə müttəfiqlərimiz bizim tərəfimizdə deyil, müharibəyə hazırlıqda iştirak etdilər. Mən KTMT-nin iki ölkəsini tanıyıram ki, bizə qarşı müharibəyə hazırlıqda iştirak edib”.
Paşinyanın Rusiya ilə yanaşı Belarusu da hədəf alması nədən qaynaqlanır?
Müstəqil siyasətçi Bədrəddin Quliyev “Bakı-Xəbər”ə açıqlamasında bildirdi ki,
Zatulin daha çox Azərbaycan əleyhinə təbliğat aparan şəxs kimi tanınıb: “Ermənilər tarixən bu bölgədə rusların dəstəyi ilə yaşayıblar. Onlar hər zaman yaşadıqları imperiyalara xəyanət ediblər. İndi də Rusiyaya buynuz göstərirlər. Onları dövlət edən ruslar olub. Bütün bunlar tarixi Azərbaycan torpaqlarında baş verib. Müharibəyə qədərki vaxtda da ermənilər Qərbə meyl edirdilər. Sarkisyanın zamanında Assosiativ Sazişə qoşildular. Sonra Paşinyan hakimiyyətə gətirildi. Hazırda Ermənistanda Rusiyanın güclü dayaqları var. Buna baxmayaraq, ermənilər Rusiya sərhədçilərinin müəyyən yerlərdən çıxarılmasına nail oldular. Ermənilər Qərbin göstərişi ilə bizə qarşı oyunlardan çıxırlar. 44 günlük müharibədə Rusiya bizə yox, ermənilərə dəstək verib. Onları silah-sursatla təmin edib. Hətta mülki obyektlərimizə atılan bəzi raketlərin də Rusiyaya məxsus olduğu deyildi. Azərbaycan ordusu öz gücünə qələbə çaldı. Ermənilər görür ki, Azərbaycan öz gücünə çox məsələni həll etdi. Sadəcə, Paşinyan bu məğlubiyyəti həzm edə bilmir. Buna görə də uğursuzluğu kiməsə yükləmək istəyir. Belarusun adını əvvəl çəkmirdi. Lukaşenkonun son səfəri onları çox qıcıqlandırıb. Məhz buna görə də belə addım atır. Onlar, bu açıqlamalara baxmayaraq, Rusiyanı sanksiyadan yayındıran fəaliyytlə məşğuldurlar. Rusiyanın hesabına milyardlar qazanırlar. Avrasiya İqtisadi Birliyində fəaliyyətlərini davam etdirirlər. Bilməlidirlər ki, kənarda günahkar axtarmaq zamanı keçdi. Yeni reallıqlara uyğun davranmalıdırlar. Bu da Azərbaycan və Türkiyə ilə normal münasibətlərin qurulmasından keçir. Bu, Rusiya üçün dərs olmalıdır ki, ermənilərə etibar etməsinlər. Belə çıxışlar və onlara verilən cavablar erməni bicliyinin əsl mahiyyətini ifşa edir”.
Məhəmmədəli QƏRİBLİ
