Əliyev nefti olan və olmayan ölkələrin münasibətlərinə dair bu formulu təklif etdi...
Bəhruz Quliyev: "Prezident İlham Əliyevin COP üçün yeniliklər barədə fikirləri ölkələrin bir-birini qınamaq, günahlandırmaq əvəzinə ekoloji sahədə daha səmərəli işlərlə məşğul olmaları üçün təşəbbüsdür"
“Əgər yaşıl dünyaya doğru əlavə və davamlı olan konkret addımlar ata bilsək, bu, ən vacib miras olacaq”. Bunu Prezident İlham Əliyev aprelin 26-da Almaniyanın paytaxtı Berlində keçirilən “15-ci Petersberq İqlim Dialoqu”nun Yüksək Səviyyəli Seqmentində iştirakı zamanı “Euronews” telekanalına müsahibəsində "COP29-un davamlı mirası olaraq nəyi görmək istərdiniz" sualına cavabında bildirib.
“Eyni zamanda, bildiyiniz kimi COP üçün yenilik olan bir təşəbbüs bizim tərəfimizdən irəli sürülmüşdür. Üçlük, üç ölkə mexanizminin yaradılması. Burada məqsəd bu üçtərəfli əməkdaşlıq formatını yaratmaq üçün BƏƏ-nin, Azərbaycanın və sonra Braziliyanın təcrübəsindən istifadə etməkdir. Çünki hər üç ölkə müxtəlif regional, iqtisadi, siyasi və sair məsələlərdə iştirak edir. Beləliklə, biz qarşılıqlı səylər, həmrəylik göstərməli, bir-birimizi günahlandırmağı dayandırmalıyıq. Nefti olmayan ölkələr nefti olan ölkələri ittiham etməməlidir, kiçik və inkişaf etməkdə olan ölkələr inkişaf etmiş böyük ölkələrə “siz iqlim fəlakətinə görə məsuliyyət daşıyırsınız” deməklə onlara qarşı tələblər irəli sürməməlidirlər. Beləliklə, bu, diplomatiyadır, siyasətdir, maliyyədir və əlbəttə ki, ev sahibi ölkəsi kimi biz bunun üçün bir platforma yarada bilərik”, – deyə dövlət başçımız müsahibəsində qeyd edib.
"Məqsəd əməkdaşlıq formatı yaratmaq, mexanizmlər işləmək və onları hərəkətə gətirmək, daha sonra isə iqlim fəlakətlərini önləmək üçün gücləri birləşdirməkdir"
“Bakı-Xəbər”ə açıqlamasında “Səs” qəzetinin Baş redaktoru, siyasi ekspert Bəhruz Quliyev “Azərbaycan təmiz ətraf mühit və yaşıl dünya uğrunda geniş spektrli fəaliyyət proqramı həyata keçirən ölkə olaraq dünyaya nümunə kimi təqdim olunur. Xüsusən belə təqdimat ölkə Prezidenti İlham Əliyev tərəfindən beynəlxalq platformalarda irəli sürülüb. Qeyd etmək yerinə düşər ki, BMT-nin bir sıra qlobal öhdəliklərinin həyata keçirilməsində ölkəmiz dövlət siyasətinin mühüm işlər həyata keçirir. Ekoloji sahədə həyata keçirilən tədbirlər və “yaşıl iqtisadiyyat”ın dəstəklənməsi məqsədilə icra olunan layihələr də bu istiqamətlidir. Prezident İlham Əliyevin rəhbərliyi altında Azərbaycan yaşıl dünyaya doğru konkret addımlar atmaqdadır. COP29-un davamlı mirasının da yeni yaşıl sahələrin inkişaf etdirilməsi və iqlimlə bağlı tədbirlərin gücləndirilməsi və ekoloji problemlərin həlli olacağını düşünmək olar”-deyə bildirdi.
B.Quliyev qeyd etdi ki, işğaldan azad olunmuş ərazilərin bərpasında, yenidənqurulmasında və ölkə iqtisadiyyatına reinteqrasiyasında müasir infrastruktura uyğun olaraq “ağıllı şəhər və ağıllı kənd” konsepsiyalarının, eləcə də “yaşıl enerji zonası” layihələrinin tətbiqi Azərbaycanın bu məsələlərə ciddi yanaşmasından xəbər verir: “Berlində keçirilən “15-ci Petersberq İqlim Dialoqu”nun Yüksək Səviyyəli Seqmentində iştirakı zamanı “Euronews” telekanalına müsahibəsində Prezident İlham Əliyevin COP üçün yeniliklər barədə fikirləri ölkələrin bir-birini qınamaq, günahlandırmaq əvəzinə ekoloji sahədə daha səmərəli işlərlə məşğul olmaları üçün təşəbbüsdür. Məqsəd əməkdaşlıq formatı yaratmaq, mexanizmlər işləmək və onları hərəkətə gətirmək, daha sonra isə iqlim fəlakətlərini önləmək üçün gücləri birləşdirməkdir. Qarşıdan COP 29 gəlir, payızda keçiriləcək beynəlxalq tədbirə qədər bütün ölkələrin vahid platformada çalışmasını və yekdil qərarlar qəbul etmələrini təmin etmək olar. Azərbaycan, BƏƏ və Braziliya kimi üçlük ölkələrin nümunəsini göstərmək olar. Hər üç ölkənin təcrübəsi COP-un davamlı mirası üçün səmərəli olar. COP29 kimi mötəbər və olduqca əhəmiyyətli bir tədbirin respublikamızda keçirilməsi və bu nəhəng tədbirə Azərbaycanın ev sahibliyi etməsi onu göstərir ki, ölkəmiz qlobal səviyyədə iqlim dəyişiklikləri ilə mübarizə aparan dövlət kimi özünü tanıda bilib və beynəlxalq ictimaiyyət tərəfindən qəbul edilib. Bu tədbirin ölkəmizdə keçirilməsi Azərbaycanın bu istiqamətdə də tanınmasına və beynəlxalq mövqeyinin möhkəmlənməsinə şərait yaradacaq”-deyə B.Quliyev əlavə etdi.
İradə SARIYEVA
