Azərbaycan-İran münasibətləri bölgədə sabitliyin önəmli amili adlandırıldı...
Vüqar Rəhimzadə: “İki ölkənin əməkdaşlığı Cənubi Qafqazda sabitliyə və təhlükəsizliyə birbaşa təsir edir”
“Bölgənin sabitliyi üçün, gələcək təhlükəsizlik tədbirlərinin gücləndirilməsi üçün İran-Azərbaycan dostluğu, qardaşlığı önəmli amildir”. Bu barədə Araz çayı üzərində inşa edilmiş “Xudafərin” hidroqovşağının istismara verilməsi və “Qız Qalası” hidroqovşağının açılış mərasimində çıxışı zamanı Prezident İlham Əliyev bildirib.
Ölkə başçısı deyib ki, bizim fikrimiz üst-üstə düşür: “İstər beynəlxalq məsələlərlə əlaqədar, istərsə də regional təhlükəsizlik məsələləri ilə bağlı. Bu, çox önəmli bir amildir. Bölgənin sabitliyi üçün, gələcək təhlükəsizlik tədbirlərinin gücləndirilməsi üçün İran-Azərbaycan dostluğu, qardaşlığı önəmli amildir. Biz bütün beynəlxalq təşkilatlarda, üzv olduğumuz təşkilatlarda bir-birimizi dəstəkləyirik və bundan sonra da bu dəstəyi göstərəcəyik. Qoşulmama Hərəkatında, İslam Əməkdaşlıq Təşkilatında, ECO-da və BMT-də bir-birimizə dəstək verməklə, eyni zamanda, öz siyasətimizi, öz niyyətimizi ifadə edirik”.
“İqtisadi sahədə əlaqələrin genişləndirilməsi siyasi münasibətlərin yaxşılaşmasına birbaşa müsbət təsir göstərir”
Sözügedən məsələni “Bakı-Xəbər”ə şərh edən “İki sahil” qəzetinin baş redaktoru Vüqar Rəhimzadə hesab edir ki, İran böyük dövlət olduğu üçün regional təhlükəsizliyin təmin edilməsində özünəməxsus rola malikdir: “Məsələ ondadır ki, region ölkələrinin qarşılıqlı əməkdaşlığı təkcə iqtisadi baxımdan deyil, siyasi, sosial, humanitar baxımdan da özünü göstərir. Bu sahədə əməkdaşlıq regionda sabitliyin bərqərar olunmasına töhfə verir. Azərbaycan-İran əməkdaşlığı Cənubi Qafqazda sabitliyə və təhlükəsizliyə birbaşa təsir edir. Çünki iki ölkə arasında uzun sərhəd var. Azərbaycan yeganə ölkədir ki, həm İranla, həm də Rusiya ilə sərhədlərə malikdir. Bir sıra məsələlərdə Azərbaycanla İranın mövqeyi üst-üstə düşür. Hər iki ölkə regiondankənar dövlətlərin, güclərin bölgəyə gəlməsində maraqlı deyil. Hər iki ölkə regional əməkdaşlığın, bu formatda əlaqələrin genişləndirilməsinin tərəfdarıdır. Nəzərə almaq lazımdır ki, iqtisadi sahədə əlaqələrin genişləndiriməsi siyasi münasibətlərin yaxşılaşmasına birbaşa müsbət təsir göstərir. Üstəlik, Cənubi Qafqazda sabitlik həm Azərbaycanın, həm də İranın maraqlarına cavab verir. Biz bilməliyik ki, müəyyən xarici dairələr Azərbaycan-İran münasibətlərinin gərgin olmasında və bundan öz məqsədləri üçün istifadə etməkdə maraqlıdılar. Ona görə də hər iki dövlət öz milli maraqlarından çıxış edərək buna imkan verməməlidilər. Bu baxımdan hesab edirəm ki, regional məsələlərdə vahid mövqedən çıxış etmək lazımdır”.
Vidadi ORDAHALLI
