Naxçıvana yol beynəlxalq dəhlizin mühüm hissəsinə çevrildi...
Əli Əlirzayev: “Naxçıvana çəkilən yol beynəlxaıq nəqliyyat dəhlizlərini əlaqələndirəcək”
“Bu körpü təkcə Azərbaycanın əsas hissəsini onun ayrılmaz hissəsi olan Naxçıvan Muxtar Respublikası ilə birləşdirən körpü deyil...” Bu barədə Araz çayı üzərində inşa edilmiş “Xudafərin” hidroqovşağının istismara verilməsi və “Qız Qalası” hidroqovşağının açılış mərasimində çıxışı zamanı Prezident İlham Əliyev bildirib.
Ölkə başçısının sözlərinə görə, birgə səylərlə bir çox ölkələrin nəqliyyat təhlükəsizliyini təmin edəcəyik: “Bu gün, eyni zamanda, Ağbənd istiqamətində yeni avtomobil körpüsü tikilir. Bu körpü tikiləndən sonra o da Şimal-Cənub Nəqliyyat Dəhlizinin bir hissəsi olacaq. Bu körpü təkcə Azərbaycanın əsas hissəsini onun ayrılmaz hissəsi olan Naxçıvan Muxtar Respublikası ilə birləşdirən körpü deyil, bu, beynəlxalq nəqliyyat dəhlizinin bir parçasıdır. Qeyd etdiyim kimi, həm Şimal-Cənub, eyni zamanda, Şərq-Qərb Nəqliyyat dəhlizlərinin bir hissəsi olacaq. Azərbaycanın azad edilmiş torpaqlarında bu gün çox genişmiqyaslı nəqliyyat layihələri həyata keçirilir. Avtomobil yolları, hava limanları, dəmir yolu Ağbəndə qədər çəkilir və yaxın gələcəkdə istismara veriləcək. Beləliklə, biz birgə səylərlə həm ölkələrimizin gələcək inkişafını, eyni zamanda, bir çox ölkələrin nəqliyyat təhlükəsizliyini təmin edəcəyik”.
“Bu, həm Azərbaycan, həm region ölkələri, həm də bütün dünya üçün çox faydalı olacaq”
Sözügedən məsələni “Bakı-Xəbər”ə şərh edən iqtisadçı alim Əli Əlirzayev hesab edir ki, Naxçıvana çəkilən yol beynəlxaıq nəqliyyat dəhlizlərini əlaqələndirəcək: “Bəli, Ağbənd üzərindən çəkilən avtomobil və dəmir yolu Naxçıvanın iqtisadiyyatını, bilavasitə Azərbaycan iqtisadiyyatına bağlayacaq. O cümlədən, bu yol Şimal-Cənub və Şərq-Qərb nəqliyyat dəhlizlərini əlaqələndirəcək. Rusiya da həm Şimal-Cənub dəhlizi ilə Hindistana yüklərin daşınmasını təmin edəcək, həm də Naxçıvan vasitəsilə Türkiyəyə yüklərin daşınmasını təmin edəcək. Əvvəllər də belə idi. Rusiyadan gələn bütün yüklər birbaşa Dərbənddən keçirdi. Culfa-İran dəmir yolu fəaliyyət göstərirdi. Hesab edirəm ki, həmin yol yenidən bərpa olunacaq və bunun iqtisadi mənası çox böyükdür. Ölkələrarası yüklərin daşınmasında vacib rol oynayacaq. Bu, həm Azərbaycan, həm region ölkələri, həm də bütün dünya üçün çox faydalı olacaq. Bütövlükdə, ölkələr arasında iqtisadi əlaqələrdə yeni mərhələ yaranacaq. Çindən bu yol vasitəsilə Avropaya yüklərin daşınması artacaq. Naxçıvanın sosial-iqtisadi inkişafında yeni mərhələ açılacaq. Orada daha çox iş yerləri açılacaq. Xidmət və istehsal sektoruna təkan verəcək. Bu da turizmin inkişafına müsbət təsir edəcək. Ona görə də bunun iqtisadi mənası çox yüksəkdir. Digər tərəfdən sözügedən əlaqələr siyasi münasibətlərin yaxşılaşmasında vacib rol oynayacaq. Bir sözlə, bütün ölkələr üçün faydalı olacaq”.
Vidadi ORDAHALLI
