“Qara xəbərə” İlham Əliyevin reaksiyası unikal və nadir fakt oldu…
Tural İsmayılov: “...Qarşıdakı dövrdə Azərbaycan İranla münasibətləri inkişaf etdirmək istiqamətində öz siyasətini səylə davam etdirəcək”
İran Prezidenti İbrahim Rəisi və onu müşayiət edən heyətin hamısı helikopter qəzasında həlak olub. Qeyd edək ki, helikopterin göyərtəsində Rəisi ilə yanaşı xarici işlər naziri Hüseyin Əmir Abdullahiyan, Şərqi Azərbaycan əyalətinin qubernatoru Malik Rahmati və Təbriz şəhərinin imam cüməsi Məhəmməd Ali əl-Haşim də olub.
İran prezidenti İbrahim Rəisini daşıyan helikopterin qəza enişi etməsi xəbəri yayılan kimi, olaya region və dünya dövlətləri rəhbərləri arasında ilk münasibəti Azərbaycan Prezidenti İlham Əliyev bildirib. Prezident Əliyev münasibətini X sosial şəbəkə hesabında etdiyi paylaşımda ifadə edib: “Bu gün İran İslam Respublikasının Prezidenti İbrahim Rəisi ilə dostcasına xudahafizləşdikdən sonra ali nümayəndə heyətini daşıyan helikopterin İranda qəza enişi etməsi barədə xəbər bizi ciddi şəkildə narahat etdi. Uca Allahdan dualarımız Prezident İbrahim Rəisi və onu müşayiət edən nümayəndə heyəti ilədir. Qonşu, dost və qardaş ölkə olaraq Azərbaycan Respublikası hər cür dəstək göstərməyə hazırdır".
Azərbaycan Prezidentinin bu məsələyə operativ reaksiya verməsi nəyin əlamətidir? Münasibətlərin bundan sonrakı mərhələsində bu fakt necə rol oynayacaq?
“Azərbaycan Prezidenti bu məsələ ilə bağlı İran tərəfinə öz dərin narahatlığını bildirən ilk xarici ölkə rəhbəri oldu”
Politoloq Tural İsmayılov “Bakı-Xəbər”ə şərhində bildirdi ki, Azərbaycan Prezidentinin bu addımı çox dəyərli fakt kimi xarakterizə olunur. O hesab edir ki, Əliyevin baş verən qəza ilə bağlı çevik reaksiyası gələcək münasibətlər üçün çox mühümdür. “Əlbəttə ki, İranda baş verən hadisə dərin bir faciədir. Azərbaycan Prezidenti bu məsələ ilə bağlı İran tərəfinə öz dərin narahatlığını bildirən ilk xarici ölkə rəhbəri oldu. İranla Azərbaycan arasındakı münasibətlərdə son dövrlər müsbət tendensiya davam edir. Eyni zamanda nəzərə almaq lazımdır ki, ikitərəfli münasibətlərdə aylar əvvəl baş verən o böhran da artıq aradan qalxıb. Həm Azərbaycan, həm də İran tərəfdən münasibətlərin inkişaf etdirilməsi ilə bağlı müsbət açıqlamalar verilir”-deyə bildirdi.
T.İsmayılov həmçinin qeyd etdi ki, münasibətlərdə prezidentlərin mayın 19-da Xudafərində keçirilən görüşü də mühüm əhəmiyyətə malik olub. “Həm Prezident İlham Əliyevin, həm mərhum İran prezidentinin verdiyi mesajlar iki ölkə münasibətlərində yeni müsbət bir məcranı ortaya çıxarırdı. Eyni zamanda Azərbaycanın reallaşdıracağı Ağbənd yolu da mühüm regional logistik mərkəzlərdən biri halına gələcək. Ordan Türkiyə və İran vasitəsilə Fars körfəzinə yüklərin daşınması həyata keçiriləcək, qarşıdakı aylarda Ağbənd tərəfdən dəmir yolu da çəkiləcək ki, bu da bütövlükdə ölkələrin, həmçinin də regionun iqtisadiyyatına mühüm töhfə verəcək. Eyni zamanda Azərbaycan səfirliyinin də yaxın aylarda açılması ilə bağlı razılıq əldə edilib. Bu məsələdə də Azərbaycanla İran arasında anlaşılmazlıqlar ortadan qalxıb. Hesab edirəm ki, qarşıdakı dövrdə Azərbaycan İranla münasibətləri inkişaf etdirmək istiqamətində öz siyasətini səylə davam etdirəcək”-deyə T.İsmayılov qeyd etdi.
İradə SARIYEVA
