Şuşanın "mədəniyyət ocağı" statusuna yenilik edildi...
Rauf Zeyni: “Mədəniyyət beşiyimiz olan Şuşanı həm də qəhrəmanlıq, zəfər və sülh rəmzinə çevirən Azərbaycanın igid oğulları, qəhrəmanları olub”
“Şuşaya gələn hər bir insan əyani şəkildə görür ki, burada Azərbaycan ruhu var. Şuşa işğal, əsarət dövründə əyilmədi”. Bu barədə Prezident İlham Əliyev “Xarıbülbül” VII Beynəlxalq Musiqi Festivalında çıxışında bildirib.
Şuşanın şəhər döyüşləri nəticəsində azad edilməsinin tariximizin parlaq səhifəsi olduğunu bir daha vurğulayan dövlət başçısı deyib: “Şuşa mədəniyyət ocağı kimi tanınsa da, hazırda, eyni zamanda, qəhrəmanlıq rəmzidir, zəfər rəmzidir və sülhün rəmzidir”.
“Bu, vüqarlı, əyilməz, qürurlu Şuşaya verilən ən yüksək qiymətlərdən biridir”
Məsələyə şərh verən Milli QHT Forumunun prezidenti Rauf Zeyni “Bakı-Xəbər”ə bildirdi ki, Şuşa tarixən Azərbaycanın mədəniyyət paytaxtı olub, bu gün isə onun statusu daha da genişlənib və qəhrəmanlıq, zəfər və sülh rəmzinə çevrilib. Bu statusların Şuşa ilə çox uyğun gəldiyini deyən R.Zeyni hesab edir ki, bu, tarixi şəhərimizin həm Azərbaycan, həm türk dünyası, həm islam aləmi, həm də dünya üçün əhəmiyyətini bir daha göstərir. “Heç şübhəsiz, Şuşada böyük tədbirlərin keçirilməsi artıq bizim üçün yenilik deyil. Birinci növbədə Şuşanı işğaldan azad edən qəhrəman şəhidlərimizin ruhu şad olsun, qazilərimizə eşq olsun. Dünya hərb tarixində bənzəri olmayan çox möhtəşəm bir əməliyyat keçirib, yalçın qayaları fəth etdilər. Xalqımızın qəhrəmanlıq ruhuna söykənərək, mənəvi, ruhi birliyindən güc alaraq mədəniyyətimizin tacı, paytaxtı olan Şuşanı mənfur düşmənlərin işğalından azad etdilər. Bu çox möhtəşəm tarixi hadisədir. Mədəniyyət beşiyimiz olan Şuşanı həm də qəhrəmanlıq, zəfər və sülh rəmzinə çevirən Azərbaycanın igid oğulları, qəhrəmanları olub”.
R.Zeyni qeyd etdi ki, Azərbaycan xalqına bu zəfəri Ali Baş Komandan İlham Əliyev başda olmaqla Azərbaycan ordusu yaşadıb, biz bu zəfərin sevincini çox yüksək səviyyədə yaşamışıq.
R.Zeyni əlavə etdi ki, Şuşanın yeni statusları Azərbaycan dövlətinin və Azərbaycan xalqının əsl niyyətini ifadə edir. “Uzun illər işğalda qalan Şuşa azad edildikdən sonra dünyanın sülh, barış, zəfər ünvanlarından birinə çevrilib. Şuşada ən müxtəlif mövzularda beynəlxalq tədbirlər, forumlar keçirilir və burada da dünyanın müxtəlif ölkələrindən onlarca insan iştirak edir. Şuşadan dünyaya sülh, barış çağırışları yayılır, bu da xalqımızın və dövlətimizin xoş niyyətlərinin təcəssümüdür. Şuşa zəfəri ilə ordumuz dünyaya sübut etdi ki, bizim üçün dəf edilməsi mümkün olmayan heç bir çətinlik yoxdur. Bütün dünyada Şuşa zəfər, qəhrəmanlıq və sülh rəmzi olaraq da tanınır. Bu baxımdan, cənab Prezidentin Şuşanın yeni statusları barədə fikirləri çox əhəmiyyətlidir. Bu, vüqarlı, əyilməz, qürurlu Şuşaya verilən ən yüksək qiymətlərdən biridir”-deyə R.Zeyni əlavə etdi.
İradə SARIYEVA
