Avropa ölkələri özləri QHT-lərə xarici yardımları qadağan edir, Gürcüstanı isə "daşa basırlar"...
Zaur İbrahimli: “Gürcüstanda baş verənlər geosiyasi qarşıdurmaının təzahürüdür”
Gürcüstan parlamenti "Xarici təsir haqqında" qanun layihəsini ikinci oxunuşda qəbul edib. Qanun layihəsinin lehinə 83, əleyhinə isə 23 deputat səs verib. Gürcüstanın baş naziri İrakli Kobaxidze qanun layihəsinə üçüncü, yekun oxunuşda səsvermənin iki həftədən sonra keçiriləcəyini bildirib.
Ölkənin Qərbpərəst prezidenti Salome Zurabişvili, sənəd üçüncü oxunuşda qəbul olunarsa, ona veto qoyacağını vəd edib. Bununla belə, hakim "Gürcü Arzusu" partiyası prezidentin vetosunu ləğv etmək üçün parlamentdə kifayət qədər səs toplayıb.
Bu arada Gürcüstan parlamenti qarşısında etiraz aksiyaları davam edir. Qərbin dəstəyi ilə keçirilən bu aksiyalarda qanun layihəsinin ləğvi tələb olunur.
Maraqlıdır, bəzi Avropa ölkələrində QHT- lər üçün xaricdən maliyyələşməni qadağan edən qanunlar olduğu halda, onlar niyə Gürcüstanda belə qanunun qəbul olunmasına qarşı mübarizə açıblar?
Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Zaur İbrahimli “Bakı-Xəbər”ə açıqlamasında bildirdi ki, Gürcüstan parlamenti “Xarici təsirin şəffaflığı haqqında” qanun layihəsini ikinci oxunuşda qəbul edib: “3-cü səsvermə parlamentin mayın 17-nə təyin edilən iclası zamanı keçiriləcək. Gürcüstan müxalifəti iddia edir ki, bu qanun eynilə Rusiyadan kopyalanıb. Onlar hesab edirlər ki, maliyyəsinin 20 faizdən çoxunu xaricdən alan fiziki və hüquqi şəxslər “xarici təsir agenti” kimi damğalana bilər. Bu zaman onlar həm də 9400 dollar məbləğində cərimə də edilə bilərlər. Qanun layihəsində nəzərdə tutur ki, xaricdən vəsait alan bütün qurumlar yeni yaradılan reytstrdə qeydiyyatdan keçməlidir. Büdcəsinin 20 faizi xarici maliyyədən təşkil olunan hüquqi və fiziki şəxslər ildə bir dəfə hesabat verməlidir. Etirazçılar bildirirlər ki, bu qanun layihəsinin ABŞ-dakından fərqi ondan ibarətdir ki, o şəxs “xarici agent” sayılır ki, həmin adam birbaşa xaricin idarəsində olsun. Yəni ABŞ qanunu yalnız xaricdən maliyyə alanı “xarici agent” kimi nəzərdə tutmur. Gürcüstan müxalifəti hesab edir ki, bu qanunun tətbiqindən sonra hakimiyyət opponentlərinə qarşı fəaliyyətini davam etdirəcək. Reyestr vasitəsilə əldə olunan məlumatlardan onlara qarşı istifadə olunacaq. Biz Gürcüstanda geosiyasi qarşıdurmanın şahidiyik. Rusiyaya loyal yanaşan qüvvələrlə Qərbin dəstəklədiyi qurumlar arasında mübarizə gedir. Hələlik qüvvələr nisbəti elədir ki, Gürcüstan hakimiyyəti etirazları lokallaşdıra bilir. Müxalifətin isə aksiyaları səngimir. Açıq-aşkar görünür ki, aksiyaların möhkəm nüvəsi var. Bu nüvəni asanlıqla dağıtmaq mümkün olmayacaq. Biz qarşıdakı aylarda prosesin gərginləşəcəyinin şahidi olacağıq. İstisna edilmir ki, hər hansı böhran yaranarsa, fövqəladə vəziyyət elan olunacaq. Çünki aksiyaların bu cür davam etdiyi şəraitdə seçkilərin də normal keçiriləcəyi inandırıcı görünmür. Hakimiyyət əzəmətli bir mitinq keçirdi və göstərdi ki, Gürcüstanın heç də hamısı qərbyönümlü deyil. Mən hesab edirəm ki, Gürcüstan hakimiyyəti sona qədər dirəşəcək. Belə təcrübəni biz Belarusda gördük. Gürcüstanda sözügedən qanun layihəsinin qəbulu hüquqidən daha çox siyasi mahiyyət daşıyır. Dünyanın əksər ölkələrində xarici mənbədən maliyyələşən KİV və QHT-lərin bu barədə dövlət qurumlarını məlumatlandırması proseduru nəzərdə tutulub. Bu prosedurların bəzisi hesabat vermə, bəziləri məlumat vermə icraatı ilə məhdudlaşır. Əsas məqsəd bu qanunun necə tətbiq ediləcəyidir. Bu baxımdan qanunun yozumu tərəflərin siyasi baxışlarına görə dəyişir. ABŞ və Qərbdə də hamı anlayır ki, xaricdən maliyyələşən subyektlərlə bağlı məlumat açıq olmalıdır. Çünki özlərində də belə təcrübə var. Gürcüstanda baş verənlər geosiyasi qarşıdurmaının təzahürüdür. Vaxt təsadüfən seçilməyib. Həm Rusiya-Ukrayna cəbhəsində baş verənlərin, həm də Gürcüstandaxili siyasi proseslərin bununla birbaşa əlaqəsi var”.
Məhəmmədəli QƏRİBLİ
