İrəvanın “Türkiyə ilə Azərbaycansız açılım” ümidlərinə növbəti zərbəni də Əliyev vurdu...
Elşad Musayev: “Yalnız o halda Türkiyə ilə münasibətlər yaxşılaşa və sərhədlər açıla bilər...”
Türkiyə ilə bizi nəinki müttəfiqlik Bəyannaməsi, həmçinin bir çox digər məsələlər birləşdirir. Türkiyə-Azərbaycan birliyi regional təhlükəsizliyin və sabitliyin mühüm meyarıdır.
Bu fikirləri Prezident İlham Əliyev aprelin 23-də ADA Universitetində keçirilən “COP29 və Azərbaycan üçün Yaşıl Baxış” mövzusunda beynəlxalq forumda səsləndirib.
“Bilirəm ki, həm Azərbaycan, həm də Türkiyədə aydın mövqe var: iki proses paralel getməlidir. Türkiyə ilə Ermənistan arasında yaxınlaşma və Azərbaycan ilə Ermənistan arasında normallaşma paralel getməlidir. Bu, bizim mövqedir və bu, həmçinin Türkiyə Prezidentinin mövqeyidir”, - deyə dövlət başçısı vurğulayıb. Bununla əslində Prezident Əliyev Ermənistana mesaj verdi ki, iki proses paralel getməlidir. Yəni Türkiyə ilə sərhədlərin açılması ilə paralel Azərbaycanla sülh sazişi imzalanmalıdır. Ermənistan sülh sazişi olmadan Türkiyə ilə münasibətlərin normallaşacağına ümid etməsin.
“Yəni Azərbaycanla münasibətlər nə qədər yaxşı inkişaf edərsə, o qədər də Türkiyə ilə münasibətlər yaxşı inkişaf edəcək”
Sözügedən məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayevin fikrincə, Prezident Əliyev bir sıra məsələlərlə bağlı çox mühüm mesajlar verdi: “Bununla Azərbaycan dövlətinin mövqeyini ifadə etdi. Bu mesajlardan biri də Ermənistan-Türkiyə münasibətləri ilə bağlı idi. Eyni zamanda, Ermənistan-Azərbaycan və Azərbaycan-Türkiyə münasibətləri ilə bağlı idi. Doğrudan da Azərbaycanla Türkiyə qardaş olmaqla bərabər, Şuşa Bəyyannaməsini imzalayıblar. İqtisadi, siyasi, sosial, humanitar və digər sahələrdə Azərbaycanla çox ciddi əməkdaşlıq edir. Xüsusən də ordu quruculuğunda. Bütün bunları da dünya görür. Məhz bu səbəbdəndir ki, Cənubi Qafqazda təhlükəsizlik məsələsində əsas qarant rolunu oynayan ölkələr Azərbaycanla Türkiyədir. Yəni bunu nəzərə almaq lazımdır. Burada qızışdırıcı mövqedən çıxış edənlər, ara qarışdıranlar çoxdur. Azərbaycanla Türkiyənin mövqeyi ortada olduğu üçün müəyyən qədər ora nüfuz edə bilmirlər. Azərbaycanla Ermənistan arasında münasibətlər nisbətən normallaşır, yavaş-yavaş addımlar atılır. Bu da onunla bağlıdır ki, Azərbaycan Ermənistanı sülhə məcbur edir. Yəni sülhə məcburetmə mexanizmi işə düşüb. Yoxsa bunlar öz xoşları ilə nəsə etmirlər. Təbii ki, Ermənistan iqtisadiyyatını inkişaf etdirmək, bölgədə sülh istəyirsə, ilk növbədə Azərbaycanla sülh sazişi imzalamalıdır. Yalnız o halda Türkiyə ilə münasibətlər yaxşılaşa və sərhədlər açıla bilər. Yəni Azərbaycanla münasibətlər nə qədər yaxşı inkişaf edərsə, o qədər də Türkiyə ilə münasibətlər yaxşı inkişaf edəcək. Çünki bu, hər iki qardaş dövlətin mövqeyidir. Biz paralel hərəkət edirik və Azərbaycan-Türkiyə prezidentləri də zaman-zaman bunu ifadə ediblər. Bundan sonrakı mərhələdə də belə olacaq. Ən yaxşı uyğun variant Ermənistanla Azərbaycan arasında sülh müqaviləsinin imzalanmasıdır. Həm də paralel olaraq delimitasiya və demarkasiya prosesinin həyata keçirilməsidir. Eyni zamanda Zəngəzur dəhlizinin açılmasıdır”.
Vidadi ORDAHALLI
