AŞPA-da Azərbaycanla bağlı qapalı müzakirə aparıldı - yanvar qərarının səhv olduğunu anlayıblar...
Azər Həsrət: “Onlar başa düşüblər ki, Azərbaycanı kənarda tutmaq ümumilikdə işin xeyrinə deyil”
Məndən xahiş olunub ki, Azərbaycanla bağlı həll yolu tapmaq üçün Nazirlər Komitəsinin nə edəcəyi barədə ətraflı məlumat verim. Bir daha vurğulamaq istərdim ki, əsas məqsədimiz ümumi ideyalarımızı qorumaq və təbliğ etmək üçün birliyi gücləndirməkdir.
Bu fikirləri qurumun Nazirlər Komitəsinin sədri, Lixtenşteynin xarici işlər, təhsil və idman naziri Dominik Hasler Avropa Şurası Parlament Assambleyasının (AŞPA) yaz sessiyasında çıxışında deyib.
Bildirib ki, Azərbaycan 2001-ci ildə üzv olduqdan sonra demokratik keçid prosesində Avropa Şurasının dəstəyindən yararlanıb. Həmçinin Avropa Şurası da Azərbaycanın dəyərlərinin təbliğinə və təsirinin artırılmasına verdiyi töhfədən bəhrələnib. Bu, zaman baxımından məhdud olmayan və şübhəsiz ki, yarımçıq qalan qarşılıqlı faydalı əməkdaşlıqdır.
Azərbaycanın quruma verdiyi töhfələri, nümayəndə heyətinin təşkilatdakı layiqli yerinə tezliklə qayıtmasına ümidvarlığını vurğulayan Dominik Hasler qeyd edib: “Düşünürəm ki, bir-birimizə ehtiyacımız var. Ümid edirəm, Azərbaycan nümayəndə heyəti tezliklə Parlament Assambleyasında öz layiqli yerinə qayıdacaq ki, bizi birləşdirən dəyərlərin qorunması naminə əməkdaşlıq və dialoq davam etsin”.
Belə görünür ki, hardasa qurumun Nazirlər Komitəsində Azərbaycanla bağlı gizli və hələlik qapalı saxlanılan bir müzakirə gedib. Necə deyərlər, onun işartısıdır bu. Yəni hardasa o müzakirə gedib və Dominikə də müəyyən tapşırıq verilib. Bütün bunlar o deməkdir ki, AŞPA-nın Nazirlər Kabinetində Azərbaycanla bağlı həqiqətən hələlik qapalı və gizli saxlanılan, mahiyyəti açılmayan müzakirə gedib. Yaxud da belə müzakirə gedir.
Ümumən, bütün bunları ekspertlər necə şərh edir?
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, bununla bağlı müəyyən media qurumlarında bəzi məlumatlar yayılıb: “Yayılan məlumatlara görə, Nazirlər Kabineti Azərbaycanın AŞPA-ya qaytarılması ilə bağlı israrlıdır. Yəni onlar başa düşüblər ki, Azərbaycanı kənarda tutmaq ümumilikdə işin xeyrinə deyil. Əksinə, işin zərərinədir. Düzdür, bu xəbər hələ ki, rəsmi şəkildə təsdiqlənmir. Ancaq belə məlumatların olması ondan xəbər verir ki, yəni faktiki olaraq Avropa Şurası Azərbaycansız tam olmadığının fərqindədir. Azərbaycan o ölkədir ki, bütövlükdə, bölgəmizdə söz sahibidir. Eyni zamanda bir çox Avropa ölkələri üçün Azərbaycan çox gərəklidir. Belə bir şəraitdə Azərbaycanı kənarda qoymaq işin xeyrinə deyil. Ona görə də ağlı başında olan, nisbətən uzaqgörən siyasətçilər, Avropa ölkələri təmsilçiləri bunun fərqinə varırlar. Bu səbəbdən Azərbaycanın geri qaytarılması üçün bu və ya digər şəkildə çalışırlar. Hesab edirəm ki, Azərbaycan AŞPA-ya qayıtmalıdır və həmin qurumda kürsümüz boş qalmamalıdır. Əlbəttə, kiminsə tənqidi fikirləri varsa o da səsləndirilməlidir. Eyni zamanda təktərəfli deyil, qarşı tərəfin də mövqeyini eşitmək üçün imkan yaradılmalıdır. Yəni Azərbaycan bu kürsüyə qayıdaraq öz sözünü deməli, öz mövqeyini ifadə etməlidir. Bu baxımdan dəyərləndirsək belə çıxışların olması təbiidir. Yəni gözlənilən, anlaşılandır ki, AŞPA-da Azərbaycanın yoxluğu narahatlıq yaradır və ağlı başında olan siyasətçilər sözügedən qurumda bu qüsuru aradan qaldırmaq üçün çalışırlar”.
Vidadi ORDAHALLI
