Qafqazın inkişafı yunan güzgüsündə - Rusiyanın adı yox, Zəngəzur dəhlizi yox...
Tural İsmayılov: “Yunanıstan siyasi dairələri, yunan mediası və ictimai rəyi qəsdən Rusiya faktoruna köklənmir”
Yunanıstanın “Ethnos” nəşri “Cənubi Qafqazın inkişafı üçün zəruri və kafi şərt” başlıqlı məqalə dərc edib. Məqalədə əsasən Ermənistanın “sülhsevərliyi” və bu ölkənin Baş naziri Nikol Paşinyanın uğursuz və bölgəyə heç bir perspektiv vəd etməyən “Dünyanın kəsişməsi” layihəsi təbliğ olunur.
Məqalədə qeyd edilir ki, Ermənistan Şimal-Cənub dəhlizləri boyunca nəqliyyat əlaqələrini təmin etmək üçün bütün lazımi infrastrukturu tikməyə və bərpa etməyə hazır olduğunu bildirib. Şərq-Qərb regional inteqrasiya və iqtisadi inkişaf üçün əhəmiyyətli potensial təklif edir. Nəşr yazır ki, onun əsas məqsədi yollar, dəmir yolları, boru kəmərləri, kabel və elektrik xətləri daxil olmaqla infrastrukturun yenilənməsi və tikintisi vasitəsilə Ermənistan, İran, Türkiyə, Azərbaycan və Gürcüstan arasında kommunikasiyaları inkişaf etdirməkdir.
“Ethnos” nəşri Ermənistanın dörd qonşu ölkədən ikisi - İran və Gürcüstanla yollarının açıq, Azərbaycan və Türkiyə ilə isə bağlı olduğunu yazır. “Cənubi Qafqazın sülhə ehtiyacı var ki, buna yalnız açıq sərhədlər və güclü iqtisadi, siyasi və mədəni əlaqələr vasitəsilə nail olmaq olar. Əməkdaşlığı asanlaşdıran avtomobil yolları və dəmir yolları kimi infrastruktur olmadan bu əlaqələr mümkün deyil.Yollar olmadan Azərbaycan və Ermənistan arasında sülh qurmaq və onu möhkəmləndirmək çox çətin olacaq”-deyə yazan nəşr “nicat yolunu” Paşinyanın “Dünyanın kəsişməsi” təklifinin reallaşdırılmasında görür, guya bu layihə “regionu siyasi dialoq və beynəlxalq əməkdaşlıq mərkəzinə çevirmək məqsədi daşıyır”.
Bu məqalədə yunanlar Ermənistanın bütün qonşularla kommunikasiyalarının açılmasından danışır, ancaq region dövləti kimi Rusiyanın adını çəkmir, Zəngəzur dəhlizindən danışmır, ancaq Paşinyanın sülh kəsişməsindən danışırlar.
Yunanıstan tərəfindən Rusiya və “Zəngəzur dəhlizi” niyə diqqətə alınmayıb? Nəzərə alsaq ki, “Zəngəzur dəhlizi” “Sülh kəsişməsindən” qat-qat perspektivli və əhatəli layihədir və onun işə düşməsi region üçün də, dünyadan ötrü də daha əhəmiyyətli olardı.
“Amma yunan nəşri olan “Ethnos” bu məsələdə obyektiv davranmır”
Politoloq Tural İsmayılov “Bakı-Xəbər”ə şərhində “ümumiyyətlə, Yunanıstanda bəzi media qurumları var ki, onlar bizim bölgə ilə, regionlarla bağlı yanaşmalarında obyektiv reallığa və rasional jurnalistika prinsiplərinə deyil, özlərinin milliyyətçi, antitürk mövqelərinə əsaslanan qəbuledilməz mövqelər ortaya qoyurlar. “Ethnos” da belə nəşrlərdən biridir. Qafqazın inkişafından və Ermənistanın bütün qonşularla normal münasibətindən danışılırsa, bununla bağlı materail hazırlanırsa mütləq şəkildə bu ölkənin Cənubi Qafqazı qarışdıran 30 illik işğal prosesinə də yer ayrılmalı idi. Hesab edirəm ki, yunan nəşri olan “Ethnos” bu məsələdə obyektiv davranmır. Digər tərəfdən, 10 noyabr bəyanatında Ermənistanın “Zəngəzur dəhlizi” ilə bağlı üzərinə götürdüyü öhtəliklər var”-deyə bildirdi.
T.İsmayılov bildirdi ki, bu gün məhz bu regionda kommunikasiyaların dirənməsinin, barış mühitinin əldə edilməməsinin, dövlətlərarası normal münasibətlərin formalaşdırılmamasının günahı da elə birbaşa Ermənistanın işğalçılıq siyasəti, 10 noyabr bəyanatında öz üzərinə götürdüyü öhdəlikləri yerinə yetirməməsi, həmçinin də “Zəngəzur dəhlizi” ilə bağlı obyektiv reallığı dərk etmək istəməməsidir. “Bu gün yunan nəşrinin də Ermənistanın üzərinə götürdüyü öhtəlikləri yerinə yetirməməsinə gözardı yanaşaraq başqa mövzularda müzakirə aparması gerçəklikdən kənar bir addımdır. Hazırda Ermənistanla, regionla bağlı yazılar hazırlayan yunan nəşri də daxil olmaq üzrə qlobal medianın bəzi ünsürlərinin məqsədli, biryanlı, jurnalistikanın prinsipləri ilə uyuşmayan “fəaliyyətinin” nəticəsidir. Əlbəttə, bu tip materiallar, məhsullar, “analitik yazılarla” bölgəni ifadə edən təhlillər ortaya qoymaq olmaz”.
“Rusiyanı nə üçün qeyd etməyiblər?
Məqalədə, sanki bölgədə Rusiya faktoru yoxdur kimi davranıblar”-deyiminə isə T.İsmayılov “Rusiya bölgədə əsas güclərdən biridir. Yunanıstan da NATO üzvüdür, o, kollektiv Qərbin bölgə ilə bağlı addımlarının sözçüsü kimi iştirak edir. Ona görə də Yunanıstan siyasi dairələri, yunan mediası və ictimai rəyi qəsdən Rusiya faktoruna köklənmir. Rusiya-Ukrayna müharibəsindən sonra bütövlükdə Yunanıstanda Rusiyaya qarşı mövqelərin də, fikirlərin də, yanaşmaların da daha da sərtləşməsi tendensiyasını açıq-aydın müşahidə edirik”-deyə bildirdi.
İradə SARIYEVA
