Builki buraxılış imtahanında sensasiyalı nəticələr çoxlarını təəccübləndirib...
Kamran Əsədov: “Keçən illə müqayisədə 30-40 faizə qədər test tapşırıqlarında asanlaşma müşahidə etdik”
Martın 3-ü və 10-u keçirilən buraxılış imtahanlarında ölkə üzrə rekord göstərici qeydə alınıb. İllər sonra ümumilikdə 53 nəfər maksimum bal toplayıb. Abituriyentlərin belə uğurlu nəticə göstərməsi imtahanlarla bağlı bəzi sualların yaranmasına səbəb olub. Iddialara görə, bu il suallar əvvəlki illərdən asan olub.
“Monitorinqlərdə verilən test tapşırıqlarının imtahan modelində olması kifayət qədər qəbul imtahanının nəticələrinə öz təsirini göstərir”
Mövzu ilə bağlı fikir bildirən təhsil eksperti Kamran Əsədov “Bakı-Xəbər”ə açıqlamasında qeyd etdi ki, indiyə qədər Azərbaycanın təhsil tarixində olmayan qədər maksimum bal toplayan tələbələr oldu: “Birinci mərhələ imtahanda abitruyentlərə 300 bal toplamaq imkanı verilir və bizim 53 şagirdimiz maksimum bal topladı. Əvvəlki illərlə müqayisədə bu olduqca yüksək nəticədir. Bunun bir neçə səbəbi var. Birinci səbəb son üç ildə Elm və Təhsil Nazirliyinin mütəmadi olaraq məktəblərdə imtahan modelində monitorinq imtahanları keçirməsidir. 2008-ci ildən ölkədə tətbiq edilən kurikulum standartları ilə qiymətləndirmə ilk dəfə idi ki, bu qədər maksimum nəticədə özünü göstərdi, belə bir nəticə gözlənilmirdi. Artıq Dövlət İmtahan Mərkəzinin (DİM) imtahanda tətbiq etdiyi sual modelləri müəllimlərə bəllidir. Yəni müəllimlərimiz imtahan modeli ilə tanış olduqları üçün bu cür nəticələrin olacağını da proqnozlaşdırmalıyıq. Müəllimlər DİM-in sirrini tapıblar və bu, imtahan nəticələrinə öz təsirini göstərir. Həmçinin sualların asan olması da builki nəticələrə öz təsirini göstərib. Onu da deyim ki, keçən illə müqayisədə 30-40 faizə qədər test tapşırıqlarında asanlaşma müşahidə etdik”.
Ekspert onu da bildirdi ki, monitorinqlərdə verilən test tapşırıqlarının imtahan modelində olması qəbul imtahanının nəticələrinə kifayət qədər öz təsirini göstərir.
Günel CƏLİLOVA
