Azərbaycanın müasir “Su strategiyasının” mahiyyəti belə ifadə olundu...
Aydın Hüseynov: “Azalan ehtiyatları bərpa etmək üçün əlavə tədbirlərə ehtiyac var”
Prezident İlham Əliyev Hacıqabul rayonunda yenidən qurulacaq Şirvan suvarma kanalının təməlqoyma mərasimindəki çıxışında bəyan edib ki, növbəti illərdə hökumətin qarşısında duran əsas infrastruktur layihələri içməli su və suvarma layihələri olacaq:
“İqlim dəyişikliyi ilə bağlı dünyada böyük narahatlıq var, o cümlədən Azərbaycanda. Su ehtiyatlarından səmərəli şəkildə istifadə etmək bizim başlıca vəzifəmizdir. Azərbaycanda bir çox infrastruktur layihələri öz həllini tapmışdır. Qazlaşdırmanın səviyyəsi 96 faizə çatıb. Elektrik enerjisi ilə təminat və yeni elektrik stansiyalarının yaradılması geniş vüsət alıb və əhəmiyyətli dərəcədə irəliləyişə nail olmuşuq. Bütün ölkəmiz yeni, müasir yollarla əhatə olunur. Ona görə növbəti illərdə hökumətin qarşısında duran əsas infrastruktur layihələri arasında başlıca vəzifə içməli su layihələri və suvarma layihələri olacaqdır”.
“Su ehtiyatlarından səmərəli şəkildə istifadə etmək üçün hökumət bütün imkanları nəzərdən keçirir, ən qabaqcıl dünya təcrübəsini öyrənir”
Sözügedən məsələnin əhəmiyyətini “Bakı-Xəbər”ə şərh edən millət vəkili Aydın Hüseynov bununla bağlı bir sıra məqamlara toxundu: “İqlim dəyişikliyi ilə bağlı dünyada böyük narahatlıq var. Belə bir problem Azərbaycanda da müşahidə edilir. Ona görə də su ehtiyatlarından səmərəli şəkildə istifadə etmək üçün hökumət bütün imkanları nəzərdən keçirir, ən qabaqcıl dünya təcrübəsini öyrənir. Qarşıdakı illərdə hökumətin qarşısında duran əsas infrastruktur layihələri arasında başlıca vəzifə kimi içməli su layihələri xüsusi yer tutacaq və bu strateji hədəfə uyğun olaraq yeni layihələr icra ediləcəkdir. Həmin layihələrdən biri Xəzər dənizinin suyundan da həm suvarma üçün, həm içməli su kimi istifadə edilməsidir. Dəniz suyunun duzsuzlaşdırılması yolu ilə içməli su istehsalı layihələri dünyanın bir sıra ölkələrində icra edilir. Qlobal istiləşmə, su ehtiyatlarının səmərəsiz istifadəsi və dünyada artan quraqlıq içməli suyun istehsalı üçün duzsuzlaşdırma zavodlarının fəal istifadəsinə təkan verib. Son illərdə dünyada dəniz suyunun duzsuzlaşdırılması layihələrində “Əks Osmos” texnologiyası tətbiq edilir. Bir sıra ölkələrdə bu layihələr dövlət-özəl tərəfdaşlığı modeli ilə həyata keçirilir. Səudiyyə Ərəbistanı, Birləşmiş Ərəb Əmirlikləri, İsrail kimi Yaxın Şərq ölkələrində bu layihələr geniş yayılmışdır. Həmçinin, ABŞ, Avstraliya və bir sıra başqa ölkələrdə də duzsuzlaşdırma zavodları fəaliyyət göstərir. Azərbaycan da həmin təcrübəni tətbiq edəcək. Azərbaycanın hazırda yerüstü su ehtiyatları 17 milyard kubmetrdir. Ancaq vaxtilə bu göstərici 30 milyard kubmetr olub. Ona görə də azalan ehtiyatları bərpa etmək üçün əlavıə tədbirlərə ehtiyac var. Qarabağdakı bolsulu çaylardan istifadə edilərək su anbarları tikiləcək ki, bu da ehtiyatların artmasına səbəb olacaq. Eləcə də alternativ su mənbələrinin təşviqi artırılır və həmin layihələrə əsasən, Sumqayıtda istifadəyə verilən duzsuzlaşdırma zavodu Bakının su tələbatına yönəldiləcək. Eyni zamanda Hövsan su aerasiya sisteminin təmizləməsi sayəsində suyun təkrar istifadəsi mümkün olacaq”.
Vidadi ORDAHALLI
