Bakı marşrutlarında ilk dəfə elektrik avtobusları işləyəcək...
Bu ilin sonuna qədər Bakıda 100 yeni elektrikli avtobusun istismara verilməsi planlaşdırılır. Bunu Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev Bakıda keçirilən konfransda deyib.
O bildirib ki, avtobus parkı yenilənəcək, yeni velosiped yolları salınacaq. Nazirliyə məxsus "Bakı Taksi Xidməti" MMC-yə isə 150 ədəd elektrik mühərrikli avtobus alınması nəzərdə tutulur.
Maraqlıdır, elektrikli avtobuslar bizə maddi və ekoloji baxımdan nə verə bilər? Ümumiyyətlə, elektrikli avtobusların üstünlükləri nədir?
Fərid Həşimov: “Ekologiyanın çirklənməsinin qarşısını almaq üçün elektrik mühərrikli avtobusların xətlərə buraxılması çox müsbət addımdır”
Nəqliyyat eksperti Fərid Həşimov “Bakı-Xəbər”ə açıqlamasında qeyd etdi ki, Bakı şəhərində istismar müddətini bitirmiş, mühərriki köhnəlmiş kifayət qədər avtobus var, hansı ki, dizellə işləyir: “Həmin avtobuslar atmosferə ciddi ziyan vururlar. Ekoloji cəhətdən təmiz olmayan bu avtobuslar havaya kütləvi şəkildə zəhərli qazın yayılmasına şərait yaradırlar. Ümumiyyətlə, bütün dünya ölkələri avtobusların elektromobilləşməsi ilə əlaqədar proseslərə start verib. Ekologiyanın çirklənməsinin qarşısını almaq üçün elektrik mühərrikli avtobusların xətlərə buraxılması çox müsbət addımdır. Düşünürəm ki, belə avtobusların sayını çoxaltmaq lazımdır”.
Eldəniz Cəfərov: “Əsas məqsəd ekosistemin yaxşılaşdırılması, əhalinin sağlamlığı və atmosferə buraxılan karbon qazının miqdarının azaldılmasıdır”
Nəqliyyat eksperti Eldəniz Cəfərovun sözlərinə görə, il ərzində xətlərdə 100-150 elektrik mühərrikli avtobusun olması mümkündür: “Burada əsas məqsəd ekosistemin yaxşılaşdırılması, əhalinin sağlamlığı və atmosferə buraxılan karbon qazının miqdarının azaldılmasıdır. Digər əsas məqam isə bu sistemin iqtisadi cəhətdən də səmərəli olmasıdır. Məlumat üçün bildirək ki, Nazirlər Kabinetinin 2019-cu il 4 mart tarixli 73 nömrəli Qərarına əsasən, paytaxtda müntəzəm marşrut xətləri üzrə istismarda olan avtobuslar sıxılmış təbii qaz (CNG) və elektrik mühərrikli nəqliyyat vasitələri ilə əvəz edilməlidir. Qeyd edilir ki, Avropada təmiz, alternativ yanacaqlı avtobusların genişmiqyaslı tətbiqini təşviq etmək üçün Təmiz Avtobus Bəyannaməsi (BUS2025) imzalanıb. Belə ki, dünya yollarında hərəkət edən avtobusların təqribən yarısının növbəti beş il ərzində tamamilə elektrik mühərrikli avtobuslara keçidi planlaşdırılır”.
Günel CƏLİLOVA
