“Yaşıl enerjimizə” vəsait qoyan dünya şirkətləri o qədərdir ki... Fransanın “Total”ından imtina nəyisə dəyişməz...
Fuad İbrahimov: “Elə məsələlər var ki, biz incə siyasət aparmaqla vəziyyəti öz xeyrimizə dəyişməliyik”
“Yaşıl enerji”nin dünya bazarlarına nəqli Azərbaycan dövlətinin enerji siyasətində əsas istiqamətlərdən biridir. Azərbaycan 2030-cu ilədək 5000 meqavat bərpaolunan enerji istehsalı potensialına malik olmağı planlaşdırır.
Azərbaycanda bərpaolunan enerji sahəsinin inkişaf etdirilməsi məqsədilə Dünya Bankı, Avropa Yenidənqurma və İnkişaf Bankı, Asiya İnkişaf Bankı kimi beynəlxalq maliyyə təşkilatlarının dəstəyi ilə layihələr həyata keçirilir. Birləşmiş Ərəb Əmirliklərinin “Masdar”, Səudiyyə Ərəbistanının “ACWA Power”, Böyük Britaniyanın “bp”, Avstraliyanın “Fortescue Future Industries”, Yaponiyanın “TEPSCO”, İtaliyanın “Maire Tecnimont”, Çinin “China Gezhouba Group Overseas Investment”, Fransanın “Total Energies” və digər xarici şirkətlərlə Azərbaycanda bərpaolunan enerji istehsalına dair müqavilələr imzalanıb və müvafiq tədbirlər həyata keçirilir.
Göründüyü kimi, Azərbaycanın bərpaolunan enerji istehsalı sahəsində bir sıra ölkələrlə sazişləri var. Ümumən, bu sahəyə xarici sərmayə qoyuluşu çox müsbət göstəricidir. Ancaq burada Fransanın “Total Energies” şirkəti də var. O da məlumdur ki, Fransa rəsmən ölkəmizlə düşmənçilik aparır. O baxımdan bərpaolunan enerji sahəsində “Total Energies” ilə imzalanan sazişdən imtina olunması perspektinə ekspertlər necə baxır? Azərbaycan buna getsə, bu, ölkəmizin alternativ enerji sahəsində nümayiş etdirdiyi gücünə hansısa xələl gətirə bilərmi? Bu sahədə Azərbaycanın qazandığı naliyyətlərə kölgə sala bilrmi?
“Prinsipcə, “Total Energies” bu layihələrdən kənarlaşdırılsa, görülən işlərə kölgə düşməyəcək”
Məsələ ilə bağlı “Bakı-Xəbər”ə açıqlama verən iqtisadçı-ekspert Fuad İbrahimov buna bir neçə aspektdən yanaşdı: “Prinsipcə, “Total Energies” bu layihələrdən kənarlaşdırılsa, görülən işlərə kölgə düşməyəcək. Çünki Azərbaycanda bərpaolunan enerji sahəsinin inkişaf maraq göstərən xarici şirkətlərin sayı yetərincə çoxdur. Ancaq bu kimi məsələlərdə incə məqamlar var. Məsələ ondadır ki, hansısa bir ölkə Azərbaycana qarşı kəskin düşmənçilik bəsləsə, o dövlətin şirkəti ölkəmizə sərmayə qoymaz. Hazırda alternativ enerji mənbələrimizin iqtisadi dövriyyəyə cəlb edilməsi prosesi gedir. “Total Energies” kimi böyük şirkətin bu işdə iştirakı hardasa ümumi işə müsbət təsir edir. İqtisadi əlaqələr genişləndikcə, bu, hardasa Fransanın Azərbaycana bağlı siyasətinə öz təsirini göstərəcək. Başqa bir tərəfdən, biz “Total Energies” “Yaşıl enerji” layihələrindən kənarlaşdırsaq, buna görə kompensasiya ödəyəcəyik. Müqavilə bağlanıbsa, o zaman belə bir addım bizə zərər vuracaq. Başqa bir tərəfdən, Fransa Azərbaycan olmadan Orta Asiyaya əlverişli çıxış əldə edə bilməyəcək. Ona görə də elə məsələlər var ki, biz incə siyasət aparmaqla vəziyyəti öz xeyrimizə dəyişməliyik. Onlardan biri də enerji layihələridir”.
Vidadi ORDAHALLI
