COP29-a Türkiyənin dəstəyi başqalarına bənzəməz...
Arzuxan Əlizadə: “Türkiyənin dəstəyi digər dövlətlərin də mövqeyinə müsbət təsir edir”
Azərbaycanla Türkiyənin əlaqələri yeni keyfiyyət halı alır. Torpaqların işğaldan azad olması tərəflərin regional və qlobal əhəmiyyətli yeni layihələri həyata keçirməyə, təhlükəsizliyin təmin olunmasına, əməkdaşlığı inkişaf etdirməyə əlavə imkanlar yaradır, yollar açır.
Fevralın 19-da İlham Əliyevin növbədənkənar prezident seçkilərində qələbəsindən sonra ilk rəsmi səfərini Ankaraya etməsi əlaqələrin səviyyəsinin göstəricisidir. Prezident Əliyev və Türkiyə Prezidenti Rəcəb Tayyib Ərdoğan görüşdən sonra mətbuata bəyanatlarında iki ölkənin əlaqələrinin yeni istiqamətlərini açıqlayıblar. Prezident Ərdoğan qeyd edib ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına - COP29-a bu il ev sahibliyi etməyinizdən böyük məmnunluq duyuram.
COP29-un Azərbaycanda keçirilməsinə bir sıra dünya ölkələri dəstək verir. Böyük Britaniya baş naziri Rişi Sunak Prezident İlham Əliyevə ünvanladığı təbrik məktubunda qeyd edib ki, Böyük Britaniya COP29-un uğurla keçirilməsi üçün Azərbaycana dəstək verəcək. ABŞ Dövlət katibinin enerji ehtiyatları üzrə köməkçisi Qofri Pyatt bəyan edib ki, Birləşmiş Ştatlar BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasında (COP29) Bakının iqlim prioritetlərini tam dəstəkləyir. Bütün bu deyilənlərin fonunda, COP29 Türkiyənin dəstəyi nə deməkdir? Türkiyənin dəstəyinin özəl yeri nədən ibarətdir?
“Fransadakı müəyyən dairələr tədbirin Bakıda keçirilməsinə qarşı təbliğat kampaniyası aparır”
Sözügedən məsələni “Bakı-Xəbər”ə şərh edən AMİP sədri Arzuxan Əlizadə buna bir neçə aspektdən yanaşdı: “Məsələ ondadır ki, Türkiyə sıradan bir ölkə deyil. Türkiyə Azərbaycana yaxın ölkə olmaqla yanaşı, həm də regional gücdür. Üstəlik, dünya siyasətində aparıcı rola malikdir.Türkiyə bu kimi bir sıra tədbirlərin keçirilməsində böyük təcrübəyə malikdir. Son illər Türkiyə iqlim dəyişiklikləri və ətraf mühütün qorunması ilə bağlı aktual məsələləri gündəmə gətirir. Bununla bağlı keçirilən platformalarda fəal iştirak edir. Türkiyənin COP29-un Bakıda keçirilməsini dəstəkləməsi digər dövlətlərin də mövqeyinə müsbət təsir edir. Biz nəzərə almalıyıq ki, Türkiyənin ərəb ölkələri və Afrika ölkələri arasında böyük nüfuzu var. O da məlumdur ki, son vaxtlar Fransadakı müəyyən dairələr COP29-un Bakıda keçirilməsinə qarşı təbliğat kampaniyası aparırlar. Tədbirin Bakıda keçirilməsi ötən il dekabrın 11-də Dubayda keçirilən COP28 konfransı çərçivəsində rəsmi şəkildə elan olunub. O zaman Fransa buna açıq şəkildə mane ola bilməyib. Ancaq sonrakı dövrdə bununla bağlı bəzi pozucu cəhdlər ediblər. Digər tərəfdən, tədbirin təhlükəsizliyi ilə bağlı Türkiyə həm yardım edə bilər, həm də öz tövsiyələrini əsirgəməyəcəklər”.
Vidadi ORDAHALLI
