Bu üç amil xarici siyasətin uğur şərtidir...
Samir Hümbətov: “Azərbaycan Prezidentinin son çıxışında da məhz bu məsələlərə toxunması Azərbaycanın gələcək inkişafının əsas yol xəritəsi, strategiyası kimi dəyərləndirilə bilər”
Prezident İlham Əliyev fevralın 14-də keçirilən andiçmə mərasimindəki nitqində bildirib ki, biz heç kimdən heç nə xahiş etmirik:
“Mən 20 ildən çoxdur ki, prezidentəm, bugünə qədər heç kimdən heç nə xahiş etməmişəm, çünki buna ehtiyac da olmayıb. Biz özümüzü tam təmin edən ölkəyik. Biz ikitərəfli formatda əməkdaşlığın tərəfdarıyıq və xarici siyasətimiz də buna hesablanıb – bərabərhüquqlu münasibətlər, bir-birinə hörmət, bir-birinə, necə deyərlər, xoş münasibət, bir-birinin işinə qarışmamaq. Bu, bizim prinsiplərimizdir və bu prinsipləri biz diqtə etmişik, bunları qəbul etdirə bilmişik”.
Ölkə başçısı deyib ki, güclü iqtisadiyyat, güclü ordu, daxili sabitlik, xalq-iqtidar birliyi xarici siyasətimizin əsas amilləridir: “Çünki xarici siyasət, – bunu hamı bilir, – daxili siyasətin davamıdır. Ona görə bundan sonra da xarici siyasətimiz çox aydın olacaq, açıq olacaq və bu gün dünya ictimaiyyəti bizim siyasətimizi bəyənir və dəstəkləyir. Əgər belə olmasaydı, 155 ölkə bizi BMT Təhlükəsizlik Şurasına üzv seçməzdi. Əgər belə olmasaydı, 120 ölkə bizi Qoşulmama Hərəkatına sədr seçməzdi. Əgər belə olmasaydı, dünya birliyi COP29 Konfransının Azərbaycanda keçirilməsi ilə bağlı qərar qəbul etməzdi”.
Göründüyü kimi, Prezident güclü ordu, iqtisadi inkişaf və cəmiyyətin vahid ideya ətrafında birləşməsini müstəqil xarici siyasəti təmin edən komponentlər kimi dəyərləndirir. Prezidentin bu tövsiyələrinə əməl olunmasının ölkəmizin gələcək inkişafına nə kimi təsiri olacaq?
Politoloq Samir Hümbətov “Bakı-Xəbər”ə açıqlamasında bildirdi ki, Azərbaycan Prezidenti İlham Əliyevin andiçmə mərasimində söylədiyi fikirlər üç istiqamət üzrə qeyd edilə bilər: “Daxili siyasətin bu günə qədər olan hissəsi, bundan sonra formalaşacaq olan hissə, xarici siyasətin bugünə qədər olan və formalaşacaq hissəsi, dünyanın mövcud vəziyyəti, nizamı. Mən hesab edirəm ki, Azərbaycan Prezidentinin söylədiyi fikirlər, xüsusilə də son 20 ildə Azərbaycanın istər region, istər beynəlxalq birliklə etdiyi əməkdaşlıq, apardığı siyasət çox açıq şəkildə göstərildi. Burda da, təbii ki, Azərbaycanın İkinci Qarabağ savaşından başlayaraq bugünümüzə kimi 4 il baş verən hadisələrə diqqət yetirilir. Son 20 ildə Azərbaycanın beynəlxalq birlik tərəfindən qəbul edilən etibarı da çox vacibdir. Cənab Prezidentin də qeyd etdiyi kimi, 155 ölkə Azərbaycanı BMT - nin qeyri-daimi üzvü kimi iki illik seçmişdi. Eyni zamanda, 120 ölkəyə qoşulmama hərəkatına sədr seçmişdi. 4 il bu prosesi Azərbaycan icra etdi. Ölkəmiz xarici siyasətdə balansı qoruyub saxlayır, öz dövlət maraqlarının təmin olunması istiqamətində addımlar atır. Mən hesab edirəm ki, burda üç önəmli məsələ var. Ordu, iqtisadi inkişaf və cəmiyyətin vahid bir ideya ətrafında birləşdirilməsi. Ordumuz artıq güclüdür, döyüş görmüş, qazi bir ordudur. Bunun da biz İkinci Qarabağ savaşında, ondan sonrakı müddətdə, hətta sonuncu olaraq 19 - 20 sentyabrda antiterror əməliyyatı zamanı şahidi olduq. İqtisadiyyata gəldikdə isə, şaxələnmə var, inkişaf özünü göstərir. İnkişafın ən önəmli tərəflərindən biri ondan ibarətdir ki, Azərbaycan son beş, on il ərzində neft sektorundan qeyri - neft sektoruna keçən ölkələr sırasındadır. Azərbaycan enerji diplomatiyasında mühüm amilə çevrilib. Son dövrlər ərzaq tədarükündə daha çox özünün ərzaq təminatını ödəyən ölkələr sırasına daxildir. Müəyyən bir idxal prosesi olsa da, çalışır ki, öz - özünün təminatını ödəsin. Bu da xüsusilə önəmlidir. Çünki ölkənin təhlükəsizlik məsələsini özündə ehtiva edir. Eyni zamanda cəmiyyətin vahidliyi məsələsi də Azərbaycan üçün çox önəmli bir prosesdir. Dünyada çox ciddi siyasi proseslər gedir. Bunun içərisində dövlətlərarası toqquşmalar, müharibələr, bəzi güc mərkəzlərinin digər dövlətlərin daxili işlərinə qarışması, onların cəmiyyətində pozuculuq fəaliyyətinin gücləndirilməsi, xaotik durumun formalaşdırılması kimi proseslər nəzərimizdən qaçmır. Ona görə də biz hesab edirik ki, Azərbaycan dövlətinin vahidliyi, milli - mənəvi dəyərlərə sadiqlik Azərbaycanın vahid bir xətt üzrə inkişafına çox ciddi təkan verəcək. Mən düşünürəm ki, Azərbaycan Prezidentinin son çıxışında da məhz bu məsələlərə toxunması Azərbaycanın gələcək inkişafının əsas yol xəritəsi, strategiyası kimi dəyərləndirilə bilər”.
Məhəmmədəli QƏRİBLİ
