Korrupsiya Paşinyanın komandasını sökdü...

Ermənistanın baş naziri Nikol Paşinyan hakimiyyətə gəldikdən sonra korrupsiya ilə mübarizəni fəaliyyətində əsas prioritetlərdən biri elan etsə də, reaalıq tamam fərqli mənzərəni üzə çıxarır. Paşinyan özü də bu fonda çoxsaylı problemlərin olduğunu etiraf edir. Məsələn, orduda bu sahədə dəhşətli vəziyyətin olduğunu vurğulayır.

Onun sözlərinə görə, hərbi yaşda olan vətəndaşların yarısından az hissəsi orduya cəlb olunur: “Bu o deməkdir ki, ya bizim nəslin səhhətində ciddi problemlər var, ya da bu sahə korrupsiya üçün ən çiçəklənən mühit olaraq qalır. Tibb rəsmiləri, hərbçilər və ictimaiyyət bu sahədə bir-biri ilə müttəfiqdir”. Ümimiyyətlə, Ermənistanda korrupsiya və rüşvətin ən geniş yayıldığı təsisatlardan biri də ordudur. İmkanlı şəxslər korrupsiya sxemləri ilə övladlarını hərbi xidmətdən yayındırırlar. Külli miqdarda rüşvət alan erməni generalları iri mülklər, İrəvanın mərkəzində bahalı mənzillər alır, övladları bahalı maşınlarda gəzir. Paşinyan dövlət satınalmaları sahəsinə xüsusi nəzarətin vacibliyini də urğulayıb. Korrupsiyaya qarşı mübarizənin zərurətini diqqətə çatdıran Paşinyan 2018-ci ildən etibarən bu sahədə irəliləyiş əldə edilsə də, prosesin sonralar dayandığı barədə deyilənlərə münasibət bildirib. Onun sözlərinə görə, hökumətin korrupsiya ilə mübarizəsi nəinki səngiməyib, əksinə, güclənib: “Nəzərə almaq lazımdır ki, nə qədər çox irəliləyiş qət edilsə, sonrakı addımlar bir o qədər çətinləşir. Çünki ilk addım, adətən, siyasi iradə ilə baş verir, amma davamında institusional inkişaf lazım gəlir”. O bildirib ki, Nazirlər Kabinetinin üzvləri onlara çatan hesabatlara çox da etibar etməməlidirlər. Bunlar fonunda erməni mediası konkret faktlarla Paşinyanın komandasının da korrupsiya girdabında olduğunu yazır. Ermənistanın “Joğovurd” nəşri konkret misallara nəzər salaraq yazır: “Paşinyanın partiyasından deputat olana qədər fəal Lena Nazaryan gecə-gündüz məmurların fəaliyyətinin şəffaflığından və hesabatlılığından danışırdı, lakin parlamentin sədrinin müavini, sonra isə deputat statusunu qazandıqdan sonra, rəsmi açıqlamaya görə, ən qapalı və gizli şəkildə varlanmış şəxslərdən birinə çevrilib”. Nəşrə görə, Ermənistan parlamentinin deputatları Lena Nazaryan və onun həyat yoldaşı Narek Babayanın bəyanatlarını öyrəndikdən sonra məlum olub ki, cütlük rəsmi sənədlərdə eyni əmlakın qiyməti ilə bağlı çox fərqli rəqəmlər təqdim edib: “Beləliklə, deputat Narek Babayan səlahiyyətli orqana 2022-ci il bəyannaməsi ilə məlumat verib ki, Tsağkadzorda alınan daşınmaz əmlak 27,041 milyon drama alınıb. Onun həyat yoldaşı Lena Nazaryan isə daha sərfəli qiymət - 24,336 milyon dram təqdim edib. Sonda hakim partiyadan olan deputatların Tsağkadzor bağ evi-mənzilini hansı real qiymətə aldıqları hələ də bəlli deyil. Təbii ki, bu ifşanı müxalifət deputatlarının hər qəpik-quruşunu lupa ilə yoxlayan Ermənistan Korrupsiyaya Qarşı Mübarizə Komissiyası etməli idi, lakin maraqlı təsadüf nəticəsində hakimiyyət nümayəndələrinin buraxdığı səhvlər bu ən mühüm strukturun gözündən yayınıb”.  

Qəzet yazır ki, bu azmış kimi, hakim partiyanın üzvləri Ermənistan parlamentinin sədri Alen Simonyanın istefasını tələb edir və bu məsələni Paşinyan qarşısında qaldırıblar: “Bu günlərdə hakim “Vətəndaş Müqaviləsi” Partiyasında Simonyanın məcburi istefası məsələsi qızğın müzakirə olunur. Partiya üzvlərinin sözlərinə görə, Simonyan və onun tərəfdaşları dəfələrlə qalmaqalların mərkəzində olublar, lakin cəzasız qalıblar. Simonyanın arvadı tərəfindən idarə olunan “Freenews” kanalı bir neçə aydır ki, Ermənistan Televiziya və Radio Yayımları Şəbəkəsinə aylıq 1,5 milyon dramı (3,7 min dollar) ödəmir. Hazırda “Freenews”  televiziya şirkətinin borcu 23,3 milyon dramdır (57,7 min dollar). Bundan əlavə, özünü korrupsiya qalmaqalının mərkəzində tapan Simonyanın qardaşının arvadı Ani Gevorqyan bir neçə gün əvvəl həbs edilib. O, vəzifə səlahiyyətlərindən sui-istifadədə ittiham olunur. Hakim partiya bildirir ki, spikerin ətrafında yaranmış bu atmosferə son qoyulmalıdır. Çünki bu, komandanın reytinqinə xələl gətirir. O da qeyd olunub ki, keçən ilin aprelində Simonyan İrəvanın mərkəzində vətəndaşın üzərinə tüpürüb və ictimaiyyətin kəskin reaksiyasına baxmayaraq, cəzasız qalıb. İndi də korrupsiya məsələsi var və Alen cəzalandırılmalıdır. Məsələ ondadır ki, Paşinyan dəfələrlə komanda yoldaşlarına xəbərdarlıq edib ki, korrupsiya proseslərində iştirak bağışlanmayacaq, amma indi Simonyan bağışlanır”. Xatırladaq ki, bu günlərdə Alen Simonyanın qardaşı Karlen Simonyanın həyat yoldaşı Ani Gevorkyan həbs olunub. Onun tutulması İqtisadiyyat Nazirliyi ilə bağlıdır. Bildirilib ki, Ani Gevorkyan Ermənistanda tanınmış “Sinergiya” informasiya texnologiyaları şirkətində uzun illər çalışıb, proqram meneceri olub. Bu müəssisə tenderdə iştirak etsə də, qalib gəlməyib. Ona görə müsabiqə ləğv edilib. Bunun məsuliyyəti isə Ani Gevorkyanın üzərinə qoyulub. “Synergy International Systems” şirkətinin qurucusu və direktoru Aşot Ovanesyan da bu cinayət işi üzrə həbs olunub. Ümumiyyətlə, hakim partiyadan parlamentdə təmsil olunanlar, onların yaxınları korrupsiyanın əsas iştirakçıları sırasındadır. Belə ki, 2018-ci ildə baş tutan “məxməri inqilab”dan əvvəl evsiz olan və kirayələrdə sürünən komanda üzvləri parlamentdə oturduqdan çox qısa müddət sonra İrəvanın ən bahalı yerlərində mənzillərə sahib olublar. Belələrinin arasında Lena Nazaryanla yanaşı, Ovik Ağazaryan, Matevos Asatryan, Vilen Qabrielyan, Arpi Davoyan, Qayan Yeqiazaryan, Arman Yeqoyan, Arsen Torosyan, Hayk Konjoryan, Rustam Bakoyan kimi deputatlar da var. Bir çox deputat mənzili və villanı öz adına rəsmiləşdirməyərək dövlətdən kirayə pulu alır. Ermənistanda icra hakimiyyəti strukturlarında da rüşvət və korrupsiya halları geniş yayılıb. Elə bu günlərdə Milli Təhlükəsizlik Xidməti İqtisadiyyat Nazirliyinin 15 ofisində axtarış aparıb. Bu əməliyyat korrupsiyaya qarşı mübarizə tədbirləri çərçivəsində reallaşıb və qurumun 7 əməkdaşı saxlanılıb. İttihama əsasən, onlar vəzifə səlahiyyətlərindən sui-istifadə ediblər, xüsusən “Dövlət investisiya proqramları üzrə bankın yaradılması” tenderinin bir hissəsi olaraq şirkətlərdən birinin rəhbəri ilə əlbir olub, onun rəqibinin iştirakına süni maneələr yaradıblar. Nəticədə üç dəfə baha, 100 min dollar ərizə təqdim edən şirkət qalib olub. Bütün bunlar Ermənistanda korrupsiya ilə bağlı çoxsaylı nümunələrin az br hissəsidir.

Ramil QULİYEV