Sülhməramlıların fəaliyyətində boşluq nə vaxt bitəcək...
İbrahim Rüstəmli: “Yaxın günlərdə onların getməsi məsələsi də müzakirəyə çıxarıla bilər”
Azərbaycanda müvəqqəti yerləşdirilmiş Rusiya sülhməramlı kontingenti ilə bağlı məlumat boşluğu yaranıb. Rusiya Müdafiə Nazirliyi sülhməramlı qüvvələrinin fəaliyyətinə dair gündəlik informasiya bülleteninin yayılmasını dayandırıb.
Əgər əvvəllər informasiya bülletenləri gündəlik yayımlanırdısa, sonuncu dəfə missiya ilə bağlı xəbər Rusiya Müdafiə Nazirliyinin rəsmi saytında yanvar ayının 9-da yerləşdirilib. Həmin məlumatda sülhməramlı kontingentin Qarabağ iqtisadi rayonu ərazisindəki 18 müşahidə məntəqəsində tapşırıqların icrasını davam etdirdiyi bildirilir. Rusiyanın susqunluğundan doğan bu müəmmalı vəziyyətin səbəbi nə ola bilər?
Hərbi-siyasi şərhçi, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, artıq Qarabağ iqtisadi rayonunda bütün koordinatlar aydın şəkildə formalaşmağa başlayır: “Yəni bərkimiş detallarda bərkimiş həqiqətlər öz yerini tutur. Bununla bağlı Azərbaycan dövlətinin mövqeyi də aydındır. Azərbaycan dövləti orada yaşayan ermənilərlə bağlı öz mövqeyini açıqlayıb, bildirib ki, Azərbaycan vətəndaşlığını, qanunlarını, konstitusiyasını qəbul edən, tabe olan keçmiş Qarabağda yaşayan ermənilər öz evlərində gəlib yaşaya bilərlər. Bir şərtimiz var ki, onlar Azərbaycan pasportu da almalıdırlar. Eyni zamanda Azərbaycan bu məsələ ilə bağlı yarana biləcək hər hansı problemi müstəqil dövlət kimi özünün həll etdiyini, başqa dövlətlərə ehtiyac duymadığını bəyan edib. Bu realdır. Beynəlxalq hüquq, insan haqları tərəfdən də yanaşsaq, Azərbaycan bu məsələdə heç bir qüsurlu addım atmayıb, bundan sonra da atmayacaq. Sular durulduqca, Rusiya sülhməramlılarının da missiyası aşağı düşür. Azərbaycan müstəqil dövlət olaraq öz ərazi bütövlüyünü, süverenliyini bərpa edib və bu işdə başqa xarici dövlətlərin köməyinə ehtiyac duymur. Düşməndən torpaqlarımızı azad etmişik, 30 il işğalda qalan ərazilərimizdə öz nəzarətimizi bərpa etmişik. Rusiya sülhməramlılarının fəaliyyətinin minimuma enməsi normaldır. Artıq heç bir qarşıdurma yoxdur. Mən düşünürəm ki, rus sülhməramlılarının görəcəkləri heç bir iş yoxdur. Yaxın günlərdə onların getməsi məsələsi də müzakirəyə çıxarıla bilər. Azərbaycan sülhməramlıların ərazisində qalmasını istəmir. Zaman özü onları bizim ərazimizdən sıxışdırıb çıxaracaq. Yaxın vaxtlarda bu məsələ öz həllini tapacaq”.
Çox güman ki, Rusiya sülhməramlıların bölgədə qalma müddətini üçtərəfli bəyanatda göstərilən zamana qədər uzatmağa çalışacaq. Çünki Rusiya vaxtından əvvəl çıxıb getsə, üçtərəfli bəyanatın şərtlərindən irəli gələn məsələləri əsaslandıra bilməyəcək. Amma vaxtında getdikdə, deyəcək ki, biz bəyanata əsasən belə davranmışıq. Vaxtından əvvəl sülhməramlıların getməsi inandırıcı deyil. Bu, çox böyük qınağa səbəb olacaq. Deyəcəklər ki, hansısa təzyiqin nəticəsi olaraq Rusiya ərazini daha tez tərk edir.
Azərbaycan Ordusu antiterror tədbirləri keçirdikdən sonra sülhməramlılar çox rahat formada öz missiyalarını həyata keçirirlər. Nə onların qarşısına çıxan, nə də hərbi hissələrinin qarşısında piket keçirən var. Ancaq qanun çərçivəsində Azərbaycan dövlətinin mübafiq qurumları ilə birgə müəyyən məsələlərdə iştirak edirlər. Gedən proseslər onu göstərir ki, 2025-ci ildə Rusiya sülhməramlıları ərazini tərk edəcək.
Məhəmmədəli QƏRİBLİ
