İrəvanın 8 mina xəritəsinə dəqiq ad qoyuldu - xəritə etimad yaradan addım deyil...
Ramil Məmmədli: “Ermənistan ərazilərimizdə guya 400 min mina basdırıldığını qeyd etsə də, reallıqda minaların sayı 1 milyondan artıqdır”
Ermənistan sülh prosesində etimad yaratmaq üçün Azərbaycan tərəfinə 8 mina xəritəsini verməyə hazır olduğunu bəyan edib. Azərbaycan XİN doğru olaraq bunun etimad yaradan addım olmadığını bildirib:
“Ermənistan tərəfinin bu açıqlaması sözügedən ölkənin niyyətinin humanitar prosesə töhfə olmadığını göstərir və bu addım etimad quruculuğu tədbiri kimi qiymətləndirilə bilməz. Azərbaycan tərəfi bugünə qədər Azərbaycana tam şəkildə təqdim edilməyən bütün minalanmış ərazilərin dəqiq xəritələrinin Ermənistan tərəfindən təqdim edilməsini gözləyir”.
Hərbi siyasi şərhçi Ramil Məmmədli “Bakı-Xəbər”ə bildirdi ki, mina xəritələrini tam olaraq Azərbaycana vermək Ermənistanın üzərinə götürdüyü vacib öhdəliyidir: “İşğal etdiyi ərazilərdə mina basdırmağın adı bəşəriyyət adına cinayətdir. Görün, atəşkəsdən sonra nə qədər adam həmin minalara düşərək dünyasını dəyişib. Təəssüflər olsun ki, Ermənistan bu cinayət əməlində bəzi məsələlərdə manipulyasiya edir, onu alver predmetinə çevirir. Müharibənin yenicə bitdiyi dönəmdə Ermənistan Azərbaycanın əlində olan bir neçə terrorçunun əvəzinə bəzi ərazilərin mina xəritəsini verdi. İndi də bu addımı humanitar etimad kimi qələmə verməyə çalışır. Yaxşı olardı ki, Ermənistan son 30 il ərzində itkin düşmüş 4 000-ə yaxın azərbaycanlının aqibəti, habelə azərbaycanlıların dəfn olunduğu kütləvi məzarlıqların yerləri barədə təqdim etsin. Başqa dövlətin ərazisini minalamaq çox böyük cinayətdir. “Ermənilər heç zaman mina xəritələri ilə bağlı məsələdə üzərinə düşən işi icra etməyib. Məlumdur ki, onlar bir dəfə mina xəritələrini ölkəmizə təqdim edib. Ancaq o xəritələrin düzgünlüyü heç 25 faiz belə deyildi.
Minalı ərazilərin təmizlənməsi üçün, əlbəttə ki, xeyli vəsait tələb olunur. Məsələn, Xorvatiyada 2009-2019-cu illər üçün minaların təmizlənməsi proqramı çərçivəsində beynəlxalq donorlardan gələn vəsaitlər də daxil olmaqla 550 milyon avro xərclənib. Bu xərcləri Azərbaycan çəkirsə, Ermənistanın manipulyasiya etmək haqqı yoxdur.
Biz Ermənistandan o xəritələri istəməliyik, bu da düşmənin bir ifşa prosesidir. Qoy davam etsin. Amma biz dövlət olaraq bu işi tez görməliyik, bunu bizim əvəzimizdən heç kəsin etməyəcəyini də bilirik”.
Hərbi şərhçinin sözlərinə görə, 44 günlük Vətən müharibəsinin başa çatmasına baxmayaraq, Ermənistan hələ də minalanmış ərazilərin dəqiq xəritələrini Azərbaycana təqdim etməyib: “Bu vaxta qədər İrəvan həmin xəritələrin Bakıya verildiyini iddia edirdi. Həmin açıqlamalardan sonra Ermənistanın xarici işlər naziri Ararat Mirzoyanın yeni xəritələrin veriləcəyi ilə bağlı danışması çaşqınlıq yaradır. Baş nazir xəritənin olmadığını dediyi halda xarici işlər naziri 8 yeni xəritədən söhbət açır. Təkcə bu faktın özü Ermənistan hakimiyyətində mina məsələsi ilə bağlı vahid, doğru fikrin olmadığını göstərir. Azərbaycan tərəfi daim onu da bəyan edir ki, xəritələr yararsız və natamam olduğu üçün real vəziyyəti əks etdirmir. Məsələn, Ermənistan ərazilərimizdə guya 400 min mina basdırıldığını qeyd etsə də, reallıqda minaların sayının 1 milyondan artıq olduğu faktı mövcuddur.
Təsadüfi deyil ki, son illərdə mina partlayışlarının 55%-dən çoxu Ermənistan tərəfindən təhvil verilən xəritələrdən kənar ərazilərdə baş verib. Qeyri-dəqiq xəritələr təqdim etməklə, İrəvan bir tərəfdən beynəlxalq birlik qarşısında xal qazanmağa, 30 il ərzində minaladığı ərazilərin miqyasını gizlətməyə, digər tərəfdən isə, Azərbaycanın apardığı genişmiqyaslı bərpa-quruculuq işlərinə, məcburi köçkünlərin geri qayıtmasına və öz yerlərində dinc yaşamasına çətinlik törətməyə çalışır”.
Məhəmmədəli QƏRİBLİ
