Türmədən "universitet diplomu" ilə çıxacaqlar - Azərbaycanda inanılmaz yenilik....
Əliməmməd Nuriyev: “Cəzaçəkmə müəssisələrində ali təhsil proqramının olmasının bir çox sosial faydası var”
Yaxın zamanlarda cəzaçəkmə müəssisələrində ali təhsil verilməsi planlaşdırılır. Bunu "Cəza Çəkmiş Qadınların Cəmiyyətə Qayıdışı" İctimai Birliyinin sədri Firuzə İsgəndərova "V Kitabqurdu məhkum qadınların oxu marafonu" adlı layihənin keçirilməsinə həsr olunmuş tədbirdə jurnalistlərə açıqlamasında deyib.
O qeyd edib ki, hazırda cəzaçəkmə müəssisələrində ali təhsil verilməsi məsələsi barədə danışıqlar gedir.
“Ali təhsil məhkumların cəmiyyətə inteqrasiyasını asanlaşdıracaq, onların yenidən cinayət törətmə ehtimalını azaldacaq”
Məhbusların ali təhsil alması barədə fikir bildirən Konstitusiya Araşdırmalar Fondunun rəhbəri Əliməmməd Nuriyev “Bakı-Xəbər”ə şərhində bildirdi ki, Azərbaycanda cəzaçəkmə müəssisələrində ali təhsilin verilməsi çox mühum və innovativ təşəbbüsdür: “Bu yanaşma məhkumların islah olunması, onların cəmiyyətə yenidən inteqrasiyası üçün əhəmiyyətli bir addım ola bilər. Hazırda bu məsələlərlə bağlı geniş müzakirələr aparılır. Ilk növbədə təhsil proqramının məqsədinin nədən ibarət olacağı araşdırılmalıdır. Məhkumların təhsil imkanın olması onların yeni bilik-bacarıq əldə etməsinə səbəb olacaq. Ali təhsil məhkumların cəmiyyətə inteqrasiyasını asanlaşdıracaq, onların yenidən cinayət törətmə ehtimalını azaldacaq. Təhsil prosesində iştirak edən məhkumların vəziyyəti yaxşılacaq, bu da onların emosiyasına müsbət təsir edəcək”
Həmsöhbətimiz bildirdi ki, məhkumlara hansı sahə üzrə ali təhsil veriləcəyi əsas müzakirə mövzusuna çevrilib: “Bununla yanaşı, təhsilin əyani və distant formada keçiriləcəyi də marağa səbəb olub. Texniki vasitələrin mövcudluğu müzakirə olunan məsələlər sırasındadır. Eyni zamanda, təhsilin keyfiyyətinin yüksək olması üçün müəllim heyətinin seçimi də önəmlidir. Təhlükəsizlik tədbirinin necə təşkil olunacağı vacibdir. Ən əsası, bu sahədə qanunvericilikdə dəyişikliyin olunub-olunmayacağı maraqlıdır. Qanunverciliyə dəyişiklik olunarsa prosesdə hansı qurumun iştirak edəcəyi maraqlıdır. Qanunvericilikdə təhsilin hansı sahələri əhatə edəcəyi, müddəti, distant və ya əyani formada olacağı kimi suallara cavab verilməlidir. Bir çox ölkələrdə məhkumlar üçün ali təhsil proqramı var. Məsələn, Norveçdə məhkumların ali təhsil alması üçün şərait yaradılıb. ABŞ-ın bir sıra cəzaçəkmə müəssisələrində onlayn ali təhsil proqramları mövcuddur. Bu qayda Türkiyədə də var”.
Ə.Nuriyev xüsusi olaraq vurğuladı ki, cəzaçəkmə müəssisələrində ali təhsil proqramının olmasının bir çox sosial faydası var: “Məhkumların ali təhsil alması onlar azad olandan sonra iş tapmaq problemini asanlaşdıracaq. Cəzaçəkmə müəssisələrində peşə və orta təhsil var. Ancaq burda resurs çatışmazlığı müşahidə olunur. Bununla yanaşı, təhlükəsizlik məsələsi üçün xüsusi tədbir görülməlidir. Bir neçə cəzaçəkmə müəssisəsində pilot layihə kimi bu işə başlamaq olar”.
Günel CƏLİLOVA
