AŞPA Azərbaycanın haqlı zərbəsindən doğru nəticələr çıxara biləcəkmi...
Ceyhun Məmmədov: “Müəyyən müddətdən sonra AŞPA öz səhv qərarına yenidən baxa bilər”
Azərbaycanın Avropa Şurası Parlament Assambleyasındakı (AŞPA) nümayəndə heyəti bu qurumda iştirakını qeyri-müəyyən müddətə dayandırdığnı bildirib.
Nümayəndə heyəti yanvarın 24-də Strasburqda bəyanat yayaraq Azərbaycanın AŞPA-dakı nümayəndə heyətinin etimadnaməsinin qəbul edilməməsi ilə bağlı təşəbbüsün Azərbaycana qarşı aparılan qərəzli kampaniyanın bir hissəsi olduğunu qeyd edib: “Azərbaycanın tarixi qələbəsindən və ərazi bütövlüyünün bərpasından sonra Azərbaycanı ləkələmək və Azərbaycan xalqına qarşı inkar edilmiş ədalətin bərpası istiqamətində ölkənin nailiyyətlərinə kölgə salmaq üçün təşkil edilmiş qarayaxma kampaniyası ilə üz-üzəyik”.
Azərbaycanın AŞPA-dakı nümayəndə heyəti AŞPA-da dözülməz irqçilik, azərbaycanfobiya və islamofobiyanın olduğunu vurğulayaraq, AŞPA ilə əməkdaşlığı və təşkilatda iştirakını qeyri-müəyyən müddətə dayandırdığını bildirib və plenar iclası tərk edib.
Bütün bunların fonunda, ehtimal etmək olarmı ki, AŞPA Azərbaycanın bu zərbəsindən lazımı nəticə çıxaracaq və obyektiv olmağa çalışacaq?
“Azərbaycanın regionda lider mövqeyi, Avropanın enerji təchizatında oynadığı rol gözardı edilə bilməz”
Sözügedən məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov prinsipcə bunu istisna etmədi: “Məlum olduğu kimi, son vaxtlar Avropa İttifaqının təsisatlarının Azərbaycana qarşı qərəzli yanaşmaları, qərarları ən pik həddə çatıb. Son addımlar və qərarlar da bu qərəzi açıq-aydın göstərirdi. Həm Cozep Borrelin açıqlamaları, həm Avropa Şurasında Azərbaycanın ünvanına səsləndirilən fikirlər, həm ölkəmizlə bağlı qəbul edilən qərarlar Bakının bu istiqamətdə sərt addımlar atmasını zəruri edirdi. Biz müstəqil və qürurlu dövlətik. Ona görə də bu ittihamları heç vaxt qəbul edə bilməzdik. O üzdən, çox haqlı olaraq Azərbaycan qəti şəkildə öz mövqeyini bildirdi. Yəni qurum daxilində fəaliyyətini qeyri-müəyyən vaxta qədər dayandırdı. Çünki özünü Avropanın əsas aparıcı qurumlarından biri kimi təqdim edən Avroittifaq əslində bu gün Fransanın, Almaniyanın alətinə çevrilib. Onun nəticəsidir ki, Azərbaycana qarşı bu qurum tərəfindən əsassız qərarlar qəbul edilir. Azərbaycan özünə hörmət edən dövlətdir. Harda bizi istəmirlərsə, orada olmarıq. Nə vaxta kimi belə qərəzli olacaqlar, Azərbaycan buna öz sərt etirazını bildirəcək. Hesab edirəm ki, müəyyən müddətdən sonra AŞPA öz səhv qərarına yenidən baxa bilər. Çünki Azərbaycan regionun lider dövlətidir və Avropanın enerji təchizatında mühüm rol oynayır. O cümlədən, ölkəmiz Avropa ilə Mərkəzi Asiya arasında vacib tranzit körpüdür. Şərq-Qərb, Şimal-Cənub dəhlizləri Azərbaycanda kəsişir. Ona görə də bütün bunlar gözardı edilə bilməz”.
Vidadi ORDAHALLI
