Avroparlament 7 fevralı müşahidə etməsə "dünya dağılacaq"?..
Avropa Parlamenti Azərbaycanda keçiriləcək prezident seçkilərini müşahidə etməyəcək. Bu barədə Avropa Parlamentinin bəzi üzvlərinin Azərbaycanda 2024-cü il fevralın 7-də keçiriləcək növbədənkənar prezident seçkiləri ilə bağlı mətbuata bəyanatında bildirilir.
Avroparlamentin bir qrup deputatının bəyanatında deyilir ki, Azərbaycanda 7 fevral seçkilərini müşahidə etməyəcəklər, nə prosesin özünə, nə də nəticələrinə şərh verməyəcəklər. Bəyanata əlavə olunub ki, deputatlardan kiməsə belə səlahiyyət də verilməyib.
Avropa Parlamentinin bu qərarı Azərbaycanda prezident seçkilərinin mötəbərliyinə nə dərəcədə kölgə salmaq gücündə olacaq? Ümumiyyətlə o gucdə olacaqmı?
Nahid Salayev: “Avroparlamentin rəhbərliyi yaxşı bilir ki, Azərbaycan onun heç bir qərarını qəbul etməyəcək və haqlı olaraq hesablaşmayacaq”
Əməkdaşımız Nahid Salayev qeyd edir ki, bu əslində gözlənilən idi. “Əvvəla, Avroparlament son bir ildə Azərbaycan əleyhinə bir neçə qərəzli qətnamə qəbul edib və Azərbaycanın açıq etirazlarını görüb. Hətta Prezident İlham Əliyev yerli TV- lərə müsahibəsində, Avrokomissiyadan fərqli olaraq, Avropa parlamentinin qərəzli və düşmən mövqe tutduğunu açıq qeyd edib.
İkinci, Avroparlament hələ də Azərbaycanın öz ərazi bütövlüyünü bərpa etməsi ilə barışa bilmir.
Üçüncü, Avroparlamentin rəhbərliyi yaxşı bilir ki, Azərbaycan onun heç bir qərarını qəbul etməyəcək və haqlı olaraq hesablaşmayacaq. Məşhur kinoda deyildiyi kini, "böş yerə əziyyət çəkib gəlmə, Abasqulu bəy"-deyə N.Salayev şərhində qeyd edib.
Akif Nağı: “Avroparlamentin bu qərarı Azərbaycanda keçiriləcək növbədənkənar Prezident seçkilərinin obyektivliyinə heç bir kölgə sala bilməz”
Azad Vətən Partiyasının sədri Akif Nağı “Bakı-Xəbər”ə bildirdi ki, Avropa Parlamentinin bu mövqeyi gözlənilən idi: “Çünki Avroparlament Azərbaycanın 2020-ci ildə qazandığı böyük zəfərdən sonra tam qəti şəkildə Azərbaycana qarşı qərəzli mövqedə dayanıb. Heç bir halda Azərbaycanın qələbəsini qəbul etmək istəmirlər. Dəfələrlə qərarlar, qətnamələr qəbul ediblər, çıxışlar ediblər, Azərbaycanı günahlarda ittiham ediblər. Bu qurumun qərəzi həmişə aydın şəkildə hiss olunub. Keçən ilin 19-20 sentyabr hadisələrindən sonra Azərbaycana qarşı heç bir reallığa uyğun gəlməyən iddialar, ittihamlar səsləndiriblər ki, guya Azərbaycan erməniləri Qarabağdan çıxarıb, Ermənistanın hansısa ərazilərini “işğal edib”. Bu real olmayan bir işdir. Əgər reallıqda baş verməyən, uydurma bir məsələdən Azərbaycana qarşı istifadə etmək istəyirlərsə, demək burada qərəz var, arxa planda gizlənən hansısa məqsədlər var, regionda Azərbaycanın yüksəlişini qəbul etmək istəmirlər, burada xristian təəssübkeşliyi diqqətdən qaçmır. Ona görə də belə bir qurumun Azərbaycanda keçiriləcək növbədənkənar Prezident seçkilərinə müşahidəçi, nümayəndə göndərməsi bizə heç gərək də deyildi. Bildiyim qədər, Azərbaycan heç Avroparlamentə müraciət də etməyib ki, müşahidəçilərinizi göndərin. Doğru da edib. Əvvəlcədən bilirik ki, onlar bura ancaq nə isə mənfi bir şey axtarıb tapmaq üçün gəlirlər. Belə qərəzlə gəlirlərsə, obyektivliklərini itiriblərsə, onda onların “xidmətindən” imtina edilməlidir. Gəlmirlər, çox yaxşı, öz qərarlarıdır. Avroparlamentin bu qərarı Azərbaycanda keçiriləcək növbədənkənar Prezident seçkilərinin obyektivliyinə heç bir kölgə sala bilməz.
Bundan sonra da Azərbaycan siyasətini müstəqil şəkildə qurmalıdır. Ümumiyyətlə, Avropanın, Qərbin arbitr rolundan imtina edilməlidir. Bu rolu onlara kim verib? Hansı haqla onlar dünyanın harasındasa bir hadisə baş verirsə hesabat bildirirlər, münasibət bildirirlər, guya sanksiyalar tətbiq edəcəklər. Bu haqqı onlara kim verib? Azərbaycan Avropa parlamentinin heç üzvü də deyil, onun qarşısında öhdəliyi də yoxdur. Avropa İttifaqı ilə Şərq Tərəfdaşlığı çərçivəsində əməkdaşlıq edir. O da heç bir uğurlu qurum olmadı. Nə işlə məşğuldurlar, nəyi həyata keçirmək istəyirlər?Ancaq Azərbaycana təzyiq göstərməyə çalışırlar”.
A.Nağı qeyd etdi ki, Azərbaycan özü öz daxilində ədalətli sistem qurmalıdır, demokratiyanı heç kəs Qərbin inhisarına verməyib ki, onların dedikləri demokratiya olsun, amma başqalarının qurduğu demokratiya olmasın. O vurğuladı ki, demokratiya ümumbəşəri bir dəyərdir və hər kəs onu özünün gücü-imkanı, özünün başa düşdüyü, daxili şəraitlərinə məqbul hesab etdiyi səviyyədə reallaşdırır. “Bu gün Avropanın heç bir ölkəsi deməsin ki, başqalarından daha demokratikdir. Fransa guya Türkiyədən və Azərbaycandan daha demokratikdir? Hardadır onların demokratikliyi ki, Azərbaycana və Türkiyəyə qarşı olmazın iftiralarını səsləndirirlər? Öz ölkələrinin daxilində nizam-intizam yarada bilməyən, proseslərə nəzarət edə bilməyən ölkələr və qurumlar Azərbaycana heç bir tövsiyə etməsinlər. Azərbaycan özü öz imkanları daxilində, öz qədim tarixinə, dövlətçilik ənənəsinə, milli mədəniyyəıtinə, milli dəyərlərinə söykənərək öz ədalətli cəmiyyətini qurmalıdır, burada demokratiyanın prinsipləri də, Azərbaycanın uğurları, möhtəşəm qələbəsi, ölkəmizə qarşı təhdidlər, ölkəmizin təhlükəsizliyi nəzərə alınmalıdır. Bu mövqedən çıxış edib daxilimizdə öz sistemimizi qurmalıyıq. Bu istamətdə də işlər gedir. Prezident seçkiləri də bunun bir hissəsidir...”-deyə A.Nağı əlavə etdi.
İradə SARIYEVA
