Ermənistanın saziş mətnini 70 gün süründürməsinin kökü açıldı...
Afsəddin Nəbiyev: “Antiterror əməliyyatlarından sonra onların bir sıra gözləntiləri var idi”
Prezident İlham Əliyev yerli televiziya kanallarına müsahibəsində dedi ki, Ermənistan bir dəfə sülh mətninə 70 gün cavab vermədiyini və bunun arxasında gizlənən məqsədi ifşa etdi:
“Sentyabr hadisələrindən sonra isə biz yeni bir vəziyyətlə üzləşdik. Ermənistana verilən vədlər, xüsusilə də həm BMT-də, həm Avropa İttifaqında Azərbaycana qarşı sanksiyalar tətbiq ediləcək, Azərbaycan böyük təzyiq altına düşəcək, dırnaqarası bu əməliyyat Azərbaycana baha başa gələcək. Bu əməliyyat, bütün bu kommunikasiyalar Ermənistanda əminlik yaratdı ki, onlar sülh müqaviləsini istədiyi kimi tərtib edə bilərlər və bizə də kimsə təzyiq edib bizi də razı sala bilərlər. Məhz buna görə 70 gün ərzində bizim təklifimizə, - çünki burada təkliflər mübadiləsi 5-6 dəfə gedib, mətnlər göndərilir şərhlərlə, - cavab vermirdi. Biz onlardan fərqli olaraq öz şərhlərimizi 70 gündən sonra yox, 30 gündən sonra göndərdik və ondan iki həftə sonra onlar, bax bu ayın 4-də yeni şərhlər göndərdilər. Yəni, yenə də sual yaranır: Əgər bu şərhləri iki həftə ərzində vermək olarsa, sən keçən dəfə 70 gün nəyi gözləmisən?”.
“Hesab edirlər ki, geosiyasi vəziyyət dəyişəcək və guya hansısa böyük dövlət onları xilas edəcək”
Sözügedən məsələni “Bakı-Xəbər”ə şərh edən AMİP-in sədr müavini Afsəddin Nəbiyev hesab edir ki, məğlubiyyətə baxmayaraq erməni tərəfi hələ də nəyəsə ümid edir: “Görünən odur ki, Ermənistana rəhbərlik edən siyasi dairələr hələ də "fürsət pəncərəsi" ümidi ilə yaşayırlar. Hesab edirlər ki, geosiyasi vəziyyət dəyişəcək və guya hansısa böyük dövlət onları xilas edəcək. Antiterror əməliyyatlarından sonra onların bir sıra gözləntiləri var idi. Ancaq himayədarları nə qədər çalışsalar da, məsələni BMT müstəvisinə çıxarsalar da alınmadı. Onlar dərk edə bilmirlər ki, bu gün dünya dövlətlərinin hər biri öz dövlətinin mənafeyini qoruyub möhkəmləndirməyi özünün əsas prioritetlərindən biri hesab edir. Bu gün Fransa kimin dövlətlər Ermənistanı alət kimi istifadə etməklə ən böyük pisliyi elə bu dövlətə etmiş olurlar. Bir anlıq hadisələrinin ardıcıllığını nəzərdən keçirsək görürük ki, Ermənistanda rasional düşüncəyə sahib olan qüvvələr etiraf edirlər ki, Ermənistanı dalana gətirib çıxaran elə məhz bu ölkələr olub. Bu dövlətlər sülh "pərdəsi" altında oyunlar qurmaqla Ermənistanın bir dövlət kimi mövcud olmasının qarşısını alırlar. Bu onların öz seçimidir. Məkrli qüvvələr birdəfəlik başqa düşməlidir ki, heç bir təzyiq, heç bir qüvvə Azərbaycan dövlətinin iradəsinə təsir göstərə bilməz. Axı bu sülh birinci növbədə kimə lazımdır? Ermənilər bir daha yaxşıca fikirləşsinlər. Azərbaycan dövləti Cənubi Qafqazda əsas söz sahibi olaraq bölgənin açar dövlətidir. Sülh əsas Ermənistana lazımdır ki, özlərini bu dalandan xilas edə bilsinlər. Bunu etməyib bir çox dövlətlərin əlində alət olacaqlarsa, kimlərinsə sözünə aldanmağa davam edəcəklərsə, bu faydasız əməllərdən məhz ermənilər itirəcək”.
Vidadi ORDAHALLI
