7 fevraldan sonrakı yeni dövr - həqiqətən yeni olacaqmı və nə ilə?..
Mətin Məmmədli: “Düşünürəm ki, həm Cənubi Qafqaz miqyasında, həm Cənubi Qafqazdan kənar məsələlərlə, proseslərlə bağlı Azərbaycan daha fəal xarici siyasət həyata keçirəcək”
“...Təbii ki, bu yeni dövr başlayarkən, əlbəttə, prezident seçkiləri də bu yeni dövrün başlanğıcı olmalıdır. Çünki hər bir dövr bir zaman kəsiyidir və 30 il ərzində işğal altında olmuş ərazilərin işğaldan azad edilməsi və suverenliyi tam bərpa etməyimiz yeni dövrün başlanğıcı idi. Bu, birinci səbəbdir.
İkinci səbəb ondan ibarətdir ki, ilk dəfə olaraq müstəqil həyatımızda seçkilər ərazilərimizin hər bir yerində keçiriləcək. Prezident seçkiləri bütün digər seçkilərlə müqayisədə ən vacib seçkilər olduğu üçün mən hesab etdim ki, birinci bütün ərazilərdə keçiriləcək seçkilər prezident seçkiləri olmalıdır. Əgər biz seçkiləri vaxtında, yəni, 2025-ci ilin aprelində keçirməli olsaydıq, o zaman bələdiyyə seçkiləri daha tez keçiriləcəkdi. Mən hesab etdim ki, bu, düzgün olmaz. Azad edilmiş ərazilərdə və ölkəmizin hər bir yerində prezident seçkiləri birinci seçkilər olmalıdır.
Digər səbəb ondan ibarətdir ki, mənim Prezident kimi fəaliyyətimin 20 ili tamamlandı. Bu da bir dövrdür və bunu da biz bir yekun kimi qəbul etməliyik və 20 ildən sonra yenidən prezident seçkilərinin keçirilməsi təbii ki, bu xronoloji dövrü də əsaslandırmış olur. Yəni, əsas səbəblər bunlardır. Amma mən bu səbəbləri, bu sıralamanı əhəmiyyət üzrə etmişəm. Birinci səbəb, əlbəttə ki, yeni dövrün başlanğıcıdır və prezident seçkiləri bu yeni dövrə də xeyir-dua verəcəkdir”. Bunu Prezident İlham Əliyev yerli televiziya kanallarına müsahibəsində fevralın 7-nə təyin edilən növbədənkənar prezident seçkiləri barədə danışarkən bildirib.
Yeni dövr bəs əvvəlki dövrdən nə ilə fərqlənəcək və fərqlənməlidir?
“...Daxili siyasətdə də müəyyən dəyişikliklər olacaq”
Məsələyə şərh verən Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli “Bakı-Xəbər”ə bildirdi ki, ölkə başçısı yerli kanallara müsahibəsində qarşıdan gələn növbədənkənar Prezident seçkiləri yeni mərhələnin başlanğıcı olacaq. “Suala cavab olaraq bildirdi ki, yeni seçkilərin keçirilməsinin əsas səbəblərindən biri odur ki, ölkə daxilində tamamilə yeni bir dövr başlayır, əvvəlki dövr bitib. Bu dövrü də xarakterizə edən cəhət odur ki, Azərbaycan dövləti öz ərazi bütövlüyünü təmin edib, bütün torpaqları üzərində suverenliyini bərqərar etməyə nail olub. Yəni bu o deməkdir ki, mən ilk növbədə xarici siyasətə diqqəti yönəltmək istərdim. Azərbaycan Qarabağ münaqişəsi olduğu dövrdə, 2023-cü ilin 19-20 sentyabrına qədərki dövrdə xarici siyasət daha çox ərazi bütövlüyünün təmin olunması problemləri, Qarabağ probleminin həlli ilə məşğul olub. Biz o münaqişəni tam olaraq həll etdik, ərazi bütövlüyümüzü təmin etmişik. Hesab edirəm ki, artıq Azərbaycan daha fəal xarici siyasət həyata keçirmək üçün imkanlar əldə edib. Düşünürəm ki, həm Cənubi Qafqaz miqyasında, həm Cənubi Qafqazdan kənar məsələlərlə, proseslərlə bağlı Azərbaycan orta güc olaraq daha fəal xarici siyasət həyata keçirəcək. Artıq mən Azərbaycanı heç də kiçik dövlətlərdən saymıram”.
M.Məmmədli bu səbəbdən də düşünür ki, Azərbaycan həm regional, həm də qlobal proseslərdə daha fəal siyasət həyata keçirəcək. “Ölkəmizin daha fəal olmasını müjdələyən xəbərlərdən biri ilk növbədə COP29 tədbirinin bu ilin noyabrında Azərbaycanda keçirilməsi ilə bağlıdır. Bildiyiniz kimi, kifayət qədər böyük, on minlərlə insanın iştirak edəcəyi və dünyanın diqqət mərkəzində olan möhtəşəm bir tədbirdir. Bu tədbirə Azərbaycan ev sahibliyi edəcək. Yəni bu bir məqamdır, amma qeyd etdiyim kimi, həm qlobal, həm də regional səviyyədə düşünürəm ki, Azərbaycan daha fəal xarici siyasət yürüdəcək. Fikrimcə, eyni zamanda da daxili siyasətdə də müəyyən dəyişikliklər olacaq. Cənab Prezident bu dəfə də seçildikdən sonra hər halda cəmiyyət və dövlət həyatının müxtəlif sahələrində yeniləşmə, müasirləşmə istiqamətində əhəmiyyətli addımlar atılacaq”-deyə qeyd edən M.Məmmdəli bu cür gözləntilərinin olduğunu vurğuladı.
O, həmçinin sosial-iqtisadi, siyasi, məhkəmə-hüquq sistemində və sair sahələrdə inkişafın, yeniliyin gözlənildiyini də dedi.
İradə SARIYEVA
