Sığorta şirkətləri ilə müştəriləri ən çox vuruşduran problem...
İlkin İbrahimov: "Sığorta şirkətləri ilə vətəndaşlar arasında ən çox mübahisə halı zərərin qiymətləndirilməsi ilə bağlıdır"
Ölkəmizdə xeyli sayda sığorta şirkəti fəaliyyət göstərir, onlar vətəndaşlara məxsus evləri, avtomobilləri, daşınmaz əmlakı və sairi sığortalamaqla məşğul olur. Bizim cəmiyyətdə əmlakını sığorta etdirənlərin sayı çox olmasa da, heç az da deyil.
Bir sıra hallarda vətəndaşlar sığorta şirkətlərindən razı qalmır. Çox zaman narazılıq edirlər ki, sığorta şirkətləri onları aldadır.
Sığorta şirkətləri ilə vətəndaşlar arasında ən çox mübahisələr hansı məsələlər ətrafında yaranır?
Əsasən şikayətlər hansı sahələri əhatə edir? Sığorta şirkəti ilə müştərilər arasında yaranan problemlər əsasən nədən qaynaqlanır, səbəb nə olur?
"Sığorta şirkətləri daha az sığorta ödənişləri etməyə, vətəndaşlar da daha çox sığorta ödənişi almağa çalışır"
Sığorta eksperti İlkin İbrahimov "Bakı-Xəbər"ə şərhində "Sığorta şirkətləri ilə vətəndaşlar arasında ən çox mübahisə halı zərərin qiymətləndirilməsi ilə bağlıdır.
Yəni əsasən sığorta şirkətləri daha az sığorta ödənişləri etməyə, vətəndaşlar da daha çox sığorta ödənişi almağa çalışır. Əsas həqiqət hər ikisinin arasında olan məbləğdir. Mübahisələr də, ən çox şikayətlər də adətən ödənişlərlə bağlı olur. Ən çox hansı sahələr üzrə şikayətlərin olduğuna gəlincə, şikayətlər konkret olaraq avtonəqliyyat vasitələrinin mülki məsuliyyətinin icbari sığortası ilə bağlı olur. Çünki avtonəqliyyatla əlaqədar, demək olar ki, ölkəmizdə icbari sığortalanma 100 faizə yaxınlaşır. Burda da, təbiidir ki, sığorta şirkətləri daha az ödəniş etməyə, daha az məbləğ deməyə çalışır, vətəndaş isə daha çox sığorta ödənişi almaq istəyir. Ona görə də belə məsələlərlə bağlı adətən problemlər yaşanır və bu belə də davam edir"-deyə bildirdi.
İ.İbrahimovun sözlərinə görə, əvvəlki illərdə mübahisəni həll etmək üçün vətəndaşlar daha çox narazılıq edirdilərsə, indi konkret həll mexanizmləri tapmaq mümkündür. Ekspert qeyd etdi ki, hazırkı dövrdə müstəqil ekspertlərlə əlaqədar, yəni məsələnin həllii ilə bağlı mübahisə yarandıqda vətəndaş Mərkəzi Bankın reyestrinə üz tutur. "Orada bir siyahı mövcudur. Siyahı müstəqil ekspertlərin reyestri adlanır. O zaman vətəndaş həmin siyahıdan üç nəfər seçmək hüququna malikdir. Həmin üç nəfərdən isə sığorta şirkəti bir nəfəri seçir, ədaləti bərpa etmək üçün ixtisaslı şəxs problemi həll etməyə çalışır. Yox, əgər mübahisə, problem burada həll olunmursa, onda məhkəmə qaydasında məsələ həll olunmalıdır"-deyə İ. İbrahimov qeyd etdi.
İradə SARIYEVA
