Rüşvət cinayətlərində artım - son 3 ildə 24-dən 47-yə çıxdı...
Ötən il rüşvətlə bağlı cinayətlərin sayında artım olub. Son illər Azərbaycanda prokurorluq orqanları tərəfindən rüşvət cinayətilə bağlı başladılan cinayət işlərinin sayı kəskin şəkildə artıb.
Ötən il Azərbaycanda rüşvət cinayəti ilə bağlı 47 cinayət işi başladılıb. Bu, əvvəlki illə müqayisədə 68 % çox olub. Müqayisə üçün qeyd edək ki, rüşvət cinayəti ilə bağlı başladılan cinayət işlərinin sayı son 10 ildə aşağıdakı kimi olub:
2013-cü ildə - 16, 2014-cü ildə - 15, 2015-ci ildə - 19, 2016-cı ildə - 6, 2017-ci ildə - 4, 2018-ci ildə - 16, 2019-cu ildə - 11,2020-ci ildə - 24, 2021-ci ildə -28, 2022-ci ildə - 47.
Maraqlıdır, son illər rüşvətlə bağlı cinayətlərin sayı niyə artıb?
Şəmsəddin Əliyev: “Rüşvət alma ilə bağlı cinayətlərin sayının artmasının səbəblərindən biri də vətəndaşların ərizə və şikayətlərində əks olunan neqativ faktların aşkar olunmasıdır”
Polisə Dəstək İctimai Birliyinin sədri Şəmsəddin Əliyev “Bakı-Xəbər”ə şərhində bildirdi ki, vəzifə cinayəti, rüşvət alma – vermə kimi hadisələr qəsdən törədilir: “Məmur və ya sıravi vətəndaş da rüşvətdə iştirakçı ola bilər. İnsanlar etdikləri əməlin nə olduğunun fərqindədirlərsə, bu o deməkdir ki, həmin şəxslərin şüurunda çat var. Ölkə prezidenti İlham Əliyevin qətiyyətli fikir və tapşırıqları sayəsində ötən illər ərzində bir sıra məmurlar öz vəzifələrindən sui-istifadıə etdikləri üçün onlar elə iş başındaca həbs olundular. Bu şəxslər Prezident İlham Əliyevin etimadını şəxsi maraqlarına qurban verdilər”.
Həmsöhbətimiz onu da əlavə etdi ki, rüşvət alma ilə bağlı cinayətlərin sayının artma səbəblərindən biri də vətəndaşların ərizə və şikayətlərində əks olunan neqativ faktların aşkar olunmasıdır. Həmin faktlar sayəsində dövlət qurumları sərt mövqe nümayiş etdirir.
Hüseyn Axundov: “Rüşvət verənlərin, rüşvət vermək arzusunda olanların sayı heç də az deyil, buna görə də qanunvericilik hər iki hal üçün cəza nəzərdə tutub”
Hüquqşunas Hüseyn Axundov “Bakı-Xəbər”ə bildirdi ki, son illər aktiv rüşvətxorluğa görə cəzalar artırılıb və sərtləşdirilib. Bütün bunlara baxmayaraq, rüşvət alma və rüşvət vermə tələb-təklif məsələsidir. Rüşvət verənlərin, rüşvət vermək arzusunda olanların sayı heç də az deyil. Buna görə də qanunvericilik hər iki hal üçün cəza nəzərdə tutub: “Qanunvericilik sadəcə icra etdiyi vəzifə funksiyalarından asılı olaraq baş verən ictimai münasibətlərə olan təhlükənin ağırlıq dərəcəsindən asılı olaraq vəzifəli şəxsi adi şəxsdən fərqləndirir. Dünyanın bütün ölkələrində hər iki hala yanaşma təxminən eynidir. Nəzərə alaq ki, rüşvət verən olmasa, rüşvət alan da olmaz. Bəzi hallarda işimizin tez bir zamanda həlli, övladlarımız, yaxınlarımız üçün əlavə imtiyazların verilməsi üçün bu yollara əl atırıq. Düşünürəm ki, korrupsiya cinayətlərinin baş verməsi üçün şəraitin yaradılmasına imkan verilməməlidir. Əvvəllər rüşvət verənlərin cinayət məsuliyyətinə cəlb edilməsi tək-tük hallarda baş verirdisə, indi bu hal çoxalıb. Korrupsiyaya Qarşı Mübarizə İdarəsi bu işə ciddi yanaşır, məsuliyyətə cəlb etməklə rüşvət alma və rüşvət vermənin qarşısını almağa çalışır. Bu isə digər şəxsləri də belə hərəkətlərdən çəkindirməyə xidmət edir”.
Günel CƏLİLOVA
