İvanişvili bu dəfə Rusiyanı Qərbə satacaq...
Abutalıb Səmədov: “İvanişvilinin Rusiya ilə əlaqələrini kəsməsi qeyri–mümkündür”
Gürcüstanın keçmiş Baş naziri, milyarder Bidzina İvanişvili siyasətə qayıdıb. Məlumata görə, ölkənin hakim “Gürcü arzusu – demokratik Gürcüstan” partiya qurultay zamanı sözügedən siyasi qüvvənin təsisçisi B.İvanişvilini onun fəxri sədri seçib.
Qurultayda çıxış edən İvanişvili bildirib: “Düz üç il əvvəl ictimaiyyəti aktiv siyasi proseslərdən uzaqlaşmaq qərarım barədə məlumatlandırmışdım. Bu gün isə, üç il sonra öz təşəbbüsümlə partiyanın fəxri sədri statusunda siyasiya həyata qayıdıram”.
Qeyd edək ki, İvanişvili siyasi fəaliyyətini 2021-ci ilin əvvəlində başa vurmuşdu. Belə ki, o bu zaman “Gürcü arzusu – demokratik Gürcüstan” partiyasının rəhbəri postunu tərk edib və siyasətdən getdiyini açıqlayıb. 67 yaşlı siyasətçi 2012-ci ilin oktyabrından 2013-cü ilin noyabrına qədər Gürcüstanın Baş naziri olub.
Rusiyapərəst mövqeyi ilə tanınan İvanişvili siyasətə qayıtdığını bəyan edəndən sonra Qərbə doğru inteqrasiyanın vacibliyindən danışıb. Onun bu mövqeyi imitasiyadır, yoxsa bu siyasətçi həqiqətən Rusiyadan uzaqlaşaraq Qərbə doğru səmimi yön götürüb?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki,
İvanaşvili siyasətə “Gürcü Arzusu” partiyasının fəxri sədri kimi qayıtmaq fikrini ifadə edib: “Adətən, fəxri sədr olan zaman siyasətdən gedirlər. Bizdə də bəzi partiyalarda liderlər var ki, onlar siyasətdən getmiş sayılırlar. İvanaşvili isə fəxri sədr kimi siyasətə qayıtmaq istədiyini bildirib. 2030 - cu ilə qədər Gürcüstanın Avropa İttifaqına üzv olması üçün çalışacağını deyib. Bu onun Rusiya ilə əlaqələrini kəsməsi kimi qəbul oluna bilərmi? Təbii ki, yox. İvanişvilinin Rusiya ilə əlaqələrini kəsməsi qeyri - mümkündür və verdiyi bəyanatlardan asılı olmayaraq Rusiya ilə əlaqələr bundan sonra daha da sıxlaşacaq. Nə üçün belə bir bəyanat verib və nə üçün Avropa İttifaqına, Qərbə inteqrasiya məsələsinin əsas hədəf olduğunu qeyd edib? Burada məqsəd nədir bəlli deyil. Bəlkə də Gürcüstanın gələcəyini Avropa İttifaqına üzv olmasında görür. Gürcüstanda vəziyyət kifayət qədər mürəkkəbdir. Belə görünür ki, İvanişvilinin başında da vəziyyət kifayət qədər qarışıqdır. Nə istədiyini bilmir, yaxud istəklərini sona kimi reallaşdırmasına Rusiya nə dərəcədə mane ola bilər. İvanaşvili baş nazir olmaq istəmədiyini deyib. Ancaq güman olunur ki, onun məqsədi 2024 - cü ilin sonlarında keçiriləcək parlament seçkilərində “Gürcü Arzusu” partiyasını daha böyük qələbəyə gətirmək, sonra isə Gürcüstanın prezidenti olmaqdır. Çünki son bir ildə Gürcüstanın prezidenti hökumət üçün kifayət qədər sıxıntılar yaratdı. Bunu da nəzərə alan İvanişvili dövlətin başçısı kimi fəaliyyət göstərmək, açıq şəkildə dövlətə rəhbərlik etmək istəyir. Konstitusiyaya görə, Gürcüstan prezidentinin səlahiyyətləri kifayət qədər məhdud olsa da, İvanaşviliyə aid ola bilməz. Onun vəzifəsi olmayanda da səlahiyyətləri kifayət qədər çox olub. Əgər prezident olarsa, qeyri - rəsmi Gürcüstanı prezidentli respublikaya çevirəcək və Gürcüstanı idarə edən əsas fiqur olacaq. İvanişvilinin öz bəyanatlarında nə qədər səmimi olması, Rusiya ilə əlaqələrini tamam kəsib Qərbə inteqrasiya etməsi məlum deyil. Rusiyanın boya - başa çatdırdığı, ciddi fiqura çevirdiyi, Rusiya ilə sıx əlaqələri olan bir adamın Qərbə yaxınlaşmaq xəttini götürməsi o qədər də real görünmür”.
Məhəmmədəli QƏRİBLİ
